16
David sia Kumpi in Sathau Kinoai
1 Topa in Samuel munah, “Saul tungtaang bang tanvei khuangai tu ni ziam? Israel kumpipa a hina nial zo khi hi. Ahihang tu in olive thau tawm la in a, Bethlehem khua ah pai in Jesse a kici pasal khat sia kungah haw ta'n, banghang ziam cile ama ii tapate khat kumpi tu in teal zo khi hi,” ci hi.
2 “Banghang tuabangin ngamta thei tu khi ziam, Saul in tua thu za le keima hong that tu hi,” ci in Samuel in dongh hi.
Topa in, “Khuino khat keng in a Topa tungah sangaw biakpiakna tua munah ka vawt tu ci in.
3 Sangaw biakpiakna ah Jesse sam in a, tuaciang na sep tu teng kong son tu hi. Keima ii kong son tu pa sia kumpi in sathau noai tu ni hi,” ci in zo hi.
4 Samuel in Topa sawl teng vawt tu in Bethlehem ah pai hi, tua munah ama muak tu in khuapi lampuite liing liangin hong pai uh a, “A mukhol thei pa awng, nong hawna sia kilem thu hi buang hi ngawl ziam?” ci in dongh uh hi.
5 Ama in, “Hi hi, Topa tungah sangaw biakpiakna khat vawt tu in kong pai hi. Kithiansua vun a, hong pai tavun,” ci in zo hi. Ama in Jesse le a tapate zongh amate le amate kithiansua tu in sawl a, sangaw biakpiakna munah sam hi.
6 Amate hong thet ciang, Samuel in Jesse ii tapa Eliab mu a, “Sia pa, hi sung Topa mai ah a dingpa sia ama ii teal sia hi nanak tu hi,” ci in ngaisun hi.
7 Ahihang Topa in ama munah, “A tun saanna le a mealphatnate awlmawk heak in. Ama sia nial zo khi hi, banghang ziam cile, mihing thukhen bangin thu ka khen bua hi. Mihing in a pua sang pianzia bek en hi, ahihang kei ka hile a thinsung ka en hi,” ci hi.
8 Tua zawkciang Jesse in a tapa Abinadab samin Samuel kungah paipui hi. Ahihang Samuel in, “Hi bo, Topa in ama zongh teal ngawl hi,” ci hi.
9 Jesse in tua zawkciang Shammah paipui hi. “Hi bo, Topa in ama zongh teal bo,” Samuel in ci hi.
10 Hi bangin Jesse in a tapa salite Samuel kungah paipui hi. Samuel in ama tungah, “Hi bo, Topa in hite kuama teal ngawl hi,” ci hi.
11 Tuaciang Samuel in ama tungah, “Tapa dang na nei lai ziam?” ci in dongh hi.
Jesse in, “A nobel sia om lai hi, ahihang ama sia tuute cingin om hi,” ci in zo hi.
Samuel in, “Hi sungah hong pai natu sawl in,” ci hi. “Sangaw biakpiakna sia ama hong pai mateng kivawt ngawl tu hi,” ci hi.
12 Tua ahikom Jesse in ama samsak hi. Ama sia tangval mealpha, a ciidam, a mit tee vakil khat ahi hi. Topa in Samuel tungah, “Hi sia pa hi — sathau noai in!” ci hi.
13 Samuel in olive thau la in a suapuite mai ah David sathau noai hi. Thakhat ma in Topa thaa in David uk a, tua ni pan kipan ama taw omkhawm top hi. Tua zawkciang Samuel sia Ramah ah heak kik hi.
Saul ii Zumtual ah David Om
14 Topa thaa in Saul nusia a, tuaciang Topa ii paisak thaa ngilo khat in ama vawtsia hi.
15 A naseamte in ama munah, “ Topa ii hong paisak thaa ngilo khat in nang hong vawtsiat sia he khu hi.
16 Tua ahikom thu hong pia ta'n, topa awng, tengtongh tum a thiam khat ka zong tu uh hi. Tua hile thaa ngilo sia nang tung hong thet ciang, tua pa in tengtongh hong tum tu a, nangma na dam kik tu hi,” ci uh hi.
17 Saul in amate thupia a, “Tumthei tum thiam khat zong tavun a, keima kungah hong paipui tavun,” ci hi.
18 Ama a cingte khat in, “Bethlehem khua mi Jesse in music a thiam tapa khat nei hi. Ama sia a hang, a mealpha, ngalkap pha khat hi a, thu son thiam khat zongh ahi hi. Topa sia ama taw omkhawm hi,” ci uh hi.
19 Tua ahikom Saul in kamtaite Jesse kungah paisak a, “Na tapa David, tuu cing thei sia hong puak ta'n,” cisak hi.
20 Jesse in David sia Saul kungah paisak a, kealngual khat, anluum a pua laa khat le savun ip dim sapittui kengsak hi.
21 David sia Saul kungah pai a, a naseam in tum hi. Saul in ama diksa mama a, a ngalhiamte pua tu in teal hi.
22 Tua zawkciang Saul in Jesse kam thaak hi: “David diksa khi hi. Keima ii naseam in hi munah hong omsak ta'n,” ci hi.
23 Tua hun pan kipan Pathian ii puak thaa ngilo sia Saul tungah a thet simin David in a tengtongh tum hi. Thaa ngilo in nusia a, Saul sia a om nuamtuamin hong dam kik hi.