15
A khakbel Tuasiat ngimna liante taw Vantunglalangte
1 Tuaciangin van ah a lian a lamdang lim khat ka mu hi. Tuasiat ngimna lian nam sali a toai vantunglalang sali om a, Pathian thin uukna a lak a tawpkhakna ahikom, tuate sia a khakbel ngimna liante ahi uh hi.
2 Tuaciangin meikuang taw kihel limlangh tuipi bang khat ka mu hi. Nganhing, ama lim le a min nambat taw a kipia sate tungah zawna a ngate zongh ka mu hi. Amate sia Pathian piaksa tengtonghte toai in limlangh tuipi hui ah dingin
3 Pathian naseampa Moses la le Tuuno lasa uh a:
“Topa Pathian vaanglianbelpa,
Na sep, na vawtnate bangza in
lianin lamdang ziam!
Minamte ii Kumpipa awng,
na lampi sia bangza in
tang a, maan ziam?Ref 15:3 Pu 15:1
4 Topa awng nang lamdang hong sa ngawlin
akua ding tu ziam?
Akua in na letna a thansak tu
nial ngam tu ziam?
Nangma bek na thiangtho hi.
Minam theampo hong pai in
nang hong bia tu hi,
banghang ziam cile, thumaanin na ngamtatnate
mihing theampo in hong mu siat uh hi,” ci hi. Ref 15:4 Jer 10:7; Ps 86:9
5 Tuasia zawkciang a sungah Pathian ii a Thiangtho Buk a om, vantung biakinn a kihong sia ka mu hi.Ref 15:5 Pu 38:21
6 Ngimna lian nam sali a nei vantunglalang salite, biakinn pan hong pusuak uh a, a thiangtho puanpaak neal, a tee ziazuate silh in, a awm uh ah khamh kawngkhaute kisawm hi.
7 Tua zawkciang a nungta nganhing lite sung pan khat in vantunglalang salite tungah a tawntung a tawntungin a nungta Pathian thin uukna taw a kidim khamh khawbeam sali pia hi.
8 Biakinn sia Pathian minthanna le vaangletna meikhu taw kidim hi, tuaciangin vantunglalang salite ii hong paipui uh ngimna lian nam salite a ven dongin kuama in biakinn sungah a tum thei bua uh hi.Ref 15:8 Pu 40:34; 1 Kum 8:10-11; 2 Khang 15:13-14; Is 6:4