14
Tuuno le A mihingte
1 Tuaciang ka et le Tuuno sia Zion Mual tungah a ding ka mu hi; ama taw mihing 144,000 dingkhawm uh a, ama min le a Pa min a talki tungah ki at hi.Ref 14:1 Eze 9:4; Tpl 7:3
2 Tuiteautuak hawk bang le vanto nging bang ahi, vantung panin awnging khat ka za hi. Music thiamte ii tengtongh tum aw bang zongh ahi hi.
3 Mihing 144,000 teng sia kumpi tokhum mai ah, nganhing li teng le upa kul le li teng taw ding uh hi; amate in lathak khat sa uh a, tua la sia amate bek ii heak thei ahi hi. Mihing nam theampo sung pan amate teng bekma a kitansa ahi uh hi.
4 Amate in numeite taw omkhopna a nei ngeingawl tangval thiangthote ahi uh hi. Amate in Tuuno paina theampo zui uh hi. Amate sia a taang lai mihing nam sung panin a kitan sate hi a, Pathian le Tuuno tungah a kipia masa phitte ahi uh hi.
5 Amate sia leilot thuson hi ci in kihe ngeingawl hi; amate sitbaanna nei ngawl hi.Ref 14:5 Zep 3:13
Vantunglalang Thum
6 Tuaciangin leitung mihingte, minam sim, bee le phung sim, paunam sim le ngam sim te ii tungah a kip tawntung Lungdamna Thupha son tu a nei vantunglalang dang khat a saangna vui sungah a leang ka mu hi.
7 Ama in awnging tak taw, “Pathian upat vun a, ama ii vaangletna pok vun! Banghang ziam cile ama ii thukhen tu hun hong theng zo hi. Vantung, leitung, tuipi le ciktuite a vawtpa bia vun!” ci hi.
8 Vantunglalang a niina sia in a masa sia zui a, “Numeinu lal zo hi. A lian mama Babylon lal zo hi. Ama in a paktatna sapittui sia mihing theampo in nesak zo hi,” ci hi.Ref 14:8 Is 21:9; Jer 51:8; Tpl 18:2
9 Vantunglalang a thumna sia in a masate nii zomin, awnging tak taw, “A kuama po nganhing lim bia a, ama ii tepteena sia a talki tung, ahibuale a khutte tungah a saangte in,
10 Pathian thangsiatna sapittui ne tu uh hi. A thin uukna hai sungah a thahatna a dim in a sunsuk sapittui dawn tu uh hi. Hi bang a ahite theampo in, vantunglalang thiangthote le Tuuno mai a meikuang le kaan sungah vawtsiat zazaanna a thuak tu uh hi.Ref 14:10 Is 51:17; Pian 19:24; Eze 38:22
11 Amate ngim a pia meikuang khu sia, a tawntung a tawntungin zaamto hi. Nganhing le milim bia in, a min tepteena a nei theampo sia sun zong zan zong noptuamna a nga bua uh hi,” ci in au uh hi. Ref 14:11 Is 34:10
12 Pathian thupiakte ni a, Jesus tungah a thumaan Pathian ii mihingte atu in thuak zawkna kisamh hi.
13 Tua zawkciang, vantung panin awnging khat ka za a, “Hi sia at in. Tu pan kipan Topa nasepna sungah a thite sia mihing thupha ngate ahi uh hi,” ci hi.
“Hi tatak hi! Amate in nasep haksatnate panin, tawlngakna nga tu hi, banghang ziam cile amate nasep phatna in amate zui tu hi,” ci in Thaa in zo hi.
Leitung Anlaakna
14 Tuaciang khua ka et le, meeikaang khat ka mu a, tua meei tungah mihing bang khat to hi; a lu tungah khamh kumpilukhu khat khu a, a khut sungah phiau hiam khat toai hi.Ref 14:14 Dan 7:13
15 Tuaciang vantunglalang a dangkhat biakinn sung pan hong pusuak a, meei tungah a to pa ii munah nging takin, “Na phiau zanghin anla in, banghang ziam cile a hun hong theng zo hi; leitung ante laak tu in min zo hi!” ci in oksan hi.Ref 14:15 Jol 3:13
16 Tuaciang meei tung a to sia in, a phiau lei ah vik a, leitung an kila hi.
17 Tua zawkciang vantunglalang dang khat sia vantung biakinn sung pan hong pusuak a, phiau hiam khat zongh nei hi.
18 Tua zawkciang meikuang a ukpa ahi vantunglalang dangkhat biaknatau panin hong pai hi. Ama in phiau hiam a nei vantunglalang tungah awnging tak taw au hi. “Na phiau zangh in a, leitung sapithuante panin sapitngate at in, banghang ziam cile, sapitte min zo hi!” ci hi.
19 Tua ahikom vantunglalang in, a phiau sia leitung ah vik a, sapithuan panin sapitngate a at zawkciang, Pathian thin uukna ahi sapittui suukna set sungah, tua sapitngate hong lawnsuk hi.
20 Sapit ngate sia khuapi pua a om, sapittui suukna set sungah kisuuk in, tuaciang tua sapittui suukna set pan chi luang a, tua chi sia metre 2 dektak thukin, kilometre 300 dong bang tuipawm bangin luang hi.Ref 14:20 Is 63:6; Kaa 1:15; Tpl 19:15