16
Pathian ii Thin uukna Khawbeamte
1 Vantunglalang salite tungah biakinn panin awnging tatak khat in: “Pai tavun a, Pathian thin uukna khawbeam salite leitung ah sungsuk tavun!” a ci ka za hi.
2 Vantunglalang a masabel sia pai in leitung ah a khawbeam a sungsuk hi. A kiitakhuai le a bot mama meimate sia a nganhing ii kitepteena a neite le tua ii lim a bia teng tungah hong piang hi.Ref 16:2 Pu 9:10
3 Tua zawkciang vantunglalang a niina sia in a khawbeam sia tuipi tungah sungsuk hi. Tui sia mithi khat ii chisan bang suak a tuipi sungah nuntakna a neite theampo thi siat hi.
4 Tua zawkciang vantunglalang a thumna sia in a khawbeam sia ngunte le ciktuite tungah sungsuk a, tuate chisan suak siat hi.Ref 16:4 Pu 7:7-21; Ps 78:44
5 Tuite a uk vantunglalang in, “Tu hun le a bosa hunin a om a Thiangtho Pa awng, na thukhennate tang hi!
6 Amate in Pathian ii mihingte le, kamsaangte chisan keesak ahikom amate dawn tu in chisan a pia zo hi. Amate in a kiphu a kilawm in thuak hi,” a ci ka za hi.
7 Tuaciang biaknatau pan aw khat ka za a, “Topa Pathian Vaanglianbelpa awng! Na thukhennate maanin tang takpi hi,” ci hi.
8 Vantunglalang a lina sia in, ni tungah a khawbeam hong sung a, tuasia ciang, nisatna meisa bang hi in, mihingte kaanghsak hi.
9 Amate sia a sa mama nisa in hal uh a, tuaciang hi ngimna tungah a thunei Pathian ii min amate in haamsiat uh hi. Ahihang amate in a mawnate pan kisiik ngawlin ama ii letna zongh a pok buatu uh hi.
10 Tua zawkciang vantunglalang a ngana sia in, nganhing sia ii kumpi tokhum tungah a khawbeam hong sungsuk hi. Nganhing ii ukna ngam sungah khuazing hong theng a, mihingte in na a sak hu in a leei pet uh hi, Ref 16:10 Pu 10:21
11 tuaciang vantung Pathian tungah a meima botte hu in, haamsiat uh hi. Ahihang amate ngitlona pan a kisiik tuan bua uh hi.
12 Vantunglalang a lukna in, Euphrates ngun tungah a khawbeam sungsuk hi. Nguntui hong kang a nisuana sang panin hong pai tu kumpipate atu in lampi piangsak hi.Ref 16:12 Is 11:15
13 Tua zawkciang ulol taw a kibang thaa nin thum ka mu hi. Tuate in ngulpui kam sung, nganhing kam sung le leilot kamsaangpa kam sung panin hong pusuak uh hi.
14 Amate sia nalamdang laknate a vawt doaite thaa ahi uh hi. Vaanglianbelpa Pathian ii ni thupi Ni in, ngal kidona sungah a khawmtua tu in leitung kumpipate theampo kungah hi thaa thumte pai uh hi.
15 “Ngai vun! Nguta khat taw kibangin kong pai tu hi! Ngual mai ah pumnguak in om a, maizum a nga ngawl natu in, mu ngawlin a puansilhte a keamcing pa sia mihing lungdam ahi hi.” Ref 16:15 Mt 24:43-44; Lk 12:39-40; Tpl 3:3
16 Tua zawkciang tua thaate in kumpite sia Hebrew kam a Armageddon a kicina munah hong paipui uh hi.Ref 16:16 2 Kum 23:29; Zec 12:11
17 Tuasia ciang vantunglalang a salina sia in, a khawbeam sia vui sungah hong sungsuk hi. Biakinn sung kumpi tokhum tung pan, awnging tatak khat hong nging a, “Kiman zo hi!” ci hi.
18 Khua hong leng vazal a, luum vangam in vanto a, a lauhuai mama in zinliing hi. Hisia in zinliing theampo sung pan a nasiabel hi; mihingte a kibitphua pan kipan tuabang zinliing a om ngei bua hi! Ref 16:18 Tpl 8:5; 11:13,19
19 Khuapi lian sia khen thum in hong kiphaltham uh a, tuaciangin ngam theampo a khuapite sia kilalsak siat hi. Pathian in Babylon khuapi sia phawkin a thin uuk thangsiatna sapittui sia — ama ii hai panin dawnsak hi.Ref 16:19 Is 51:17
20 Tuikulh theampo bo in, mual theampo mangthang siat hi.Ref 16:20 Tpl 6:14
21 Khat ciang kilogramme sawm nga bang a pha tu, a lian mama ngialtangte van panin mihingte tungah kia hi, tua ngimna lian sia nasia lei lawlawm ahikom, tua ngialkiate hangin mihingte in Pathian haamsiat uh hi.Ref 16:21 Pu 9:23; Tpl 11:19