14
Asa Kumpipa in Ethiopia te Zo
1 Abijah kumpipa thi a, David Khuapi sung kumpi thaan ah kiphum hi. A tapa Asa in a kumpi za laih a, Asa khutnuai ah a ngam sia kum sawm sung kilem in nuam sa uh hi.
2 Asa sia a maan le a pha in naseam ahikom Topa, a Pathian lungkimsak hi.
3 Ama in ngamdangte biaknataute le a doai sepna mun te phiat a, biakna suangkhuam te saattham in a numeipathian Asherah ii limte phuktan hi.
4 Ama in a taanghpupite ii Pathian, Topa deina bang vawt tu le a hil nate le a thupiakte zui tu in Judah mite thupia hi.
5 Ama in Judah ngamsung khuapi theampo ah doai sepna munte le ngimnamtui halna biaknataute a phiat hu in a kumpi ngam sungah kilemna om hi.
6 Hi hun sungin ama in Judah khuapite atu ngaldalna kulhte vawt a, Topa in kilemna pia ahikom kum tam mama sung ngal om ngawl hi.
7 Ama in Judah mite tungah, “Ih khuapite sia luphungte, khua etna tausaangte, a kikhak thei le a kikalh thei kongpite vawtin ih dal tu hi. Topa ih Pathian ii deina bang ih vawt hu in ih ngam sia pha takin ih len zo hi. Ama in mun theampo ah hong pao hong dal a, ngammuanna hong pia hi” ci hi. Tuabangin amate in vawt a, nuam sa uh hi.
8 Asa kumpipa in Judah ngalkaphonpi, lum le tei toai pasal 300,000 nei a, Benjamin ngalkaphonpi lum le thal toai pasal 280,000 nei hi. A vekpi in ngalkap thiamsa le ngalhangte veu ahi uh hi.
9 Ethiopia te Zerah a kici pa in ngalkaphonpi awn khat le siphu ngalleang 300 taw Judah ngam sim a, Mareshah khua dong kuan uh hi.
10 Asa in ama sim tu in pai a, Mareshah khuahui Zephathah Kuam sungah a panmun tek la uh hi.
11 Asa in Topa a Pathian tungah thungen a, “ Topa awng, ngalkaphonpi thahat khat na hu bangin a thazawm ngalkaphonpi khat zongh ol takin na hu thei hi. Topa kote Pathian awng tu in hong hu ta'n, banghang ziam cile nangma kong muang kong suang uh a, nangma min suangin hi za in a tam ngalkaphonpite sim tu in ka kuan uh hi. Topa awng nang sia kote Pathian na hi hi; nangma zozo tu in a ki um ngam kuama om ngawl tu hi,” ci hi.
12 Asa le Judah ngalkaphonpite in Ethiopia ngalkaphonpi a sim ciang Topa in Ethiopia ngalkaphonpi zawsak hi. Amate tai a,
13 Asa le a ngalkapte in Gerar dong del uh hi. Ethiopia te tam mama kithat ahikom a ngalkaphonpite ngalsim tu in kikaikhawm kik zo ngawl hi. Topa le a ngalkaphonpite in amate zothaw ngawp ahikom a vanh tam mama laaksak uh hi.
14 Tua munah a om mite in Topa a kiitak lei hu in ama te in Gerar kiim a om khuapite siasak thei uh hi. Tua khuapite theampo ngalkaphonpite in phuul in a vanh tam mama laaksak uh hi.
15 Amate in tuucingte pawlkhat ii ngiaphualte zongh simin tuu le kalaoh tam mama matsak uh hi. Tua zawkciang amate Jerusalem ah heak kik uh hi.