13
Abijah ii Jeroboam taw A Kidona
(1 Kumpite 15:1-8)
1 Israel kumpipa Jeroboam ii kumpi maanna a kum sawm le kum liat kum in Abijah sia Judah kumpi suak a,
2 tuaciang ama in Jerusalem khua pan kum thum sung ngam uk hi. A nu sia Gibeah khuapi pan Uriel ii tanu Micaiah hi.
Abijah le Jeroboam kilaklaw ah ngal piang hi.
3 Abijah in ngalkaphonpi 400,000 khawm a, tuaciang Jeroboam in ngalkaphonpi 800,000 taw nang hi.
4 Ephraim mualtung ngam ah a ngalkaphonpite kisi uh hi. Zemaraim Mual ah Abijah kumpipa paito in, Jeroboam le Israel mite oksan a: “Hong ngai tavun!
5 Topa, Israel ii Pathian in David taw a kipalsat thei ngawl thuciamna khat vawt a, David le a suan a paalte sia Israel tungah kumpi seam tawntung tu in kumpi za a piak hunlam he ngawl nu ziam?
6 Nebat ii tapa Jeroboam in a kumpipa Solomon leedo hi.
7 Tua zawkciang ama in a ngina ngawl mihing ngilo te samin, amate in Solomon ii tapa Rehoboam sia amate deina bang a vawt tu in zawthawk thu taw sawl hi, Rehoboam sia amate a nang zo tu in khangmoi leih in a heakna kicing ngawl lai hi.
8 Topa in David suan le paalte tungah a piak a kumpi thuneina sia tu in do tu in na vaihawm uh hi. Ngalkaphonpi tam mama le na pathian tu in Jeroboam ii hong vawtsa khamh khui milimte na nei uh hi.
9 Aaron ii suan le paal, Topa ii thiampite le Levi te na notkeak uh hi. Amate taangin a dang minamte ii vawt bangin thiampite panmun na pia uh hi. Khuital khat ahibuale tuu sali taw hong pai pawpo sia noma pathiante ii thiampi khat a suak tu in ama le ama ki aapsak thei hi.
10 “Ahihang kote in Topa ka Pathian nusia ngawlin ama na ka seam lai uh hi. Aaron suan thiampite in thiampi na seamin Levi te in amate hu uh hi.
11 Zing sim nitak simin amate in ama tungah ngimnamtui biakpiakna le nganno taw pumhal sangaw biakpiaknate nei uh hi. Amate in zeksa ngeina bangin a thiangtho sabuai tungah anluum biakpiakna pia a, tuaciang nitak simin khamh meivak khuam tungah meiinnte de uh hi. Kote in Topa thupiak bang ka seam uh hi, ahihang note in ama na nusia uh hi.
12 Pathian ama mama kote lampui hi a, ama ii thiampite sia hi sungah lemle taw om in, noma a sim tu in hong sapna lemle tum tu in kinging uh hi. Israel mite awng, na taanghpupite ii Pathian, Topa do heak vun! Zo zo ngawl tu nu hi!” ci in au hi.
13 Tua laitakin Jeroboam in a ngalkapte pawlkhat sia Judah ngalkaphonpite nungsang pan a suam tu in kuansak a, a dang teng in a mai pan pangsak hi.
14 Judah te in a kiim a paam en kawkoai a, amate a ki uumci sia mu uh hi. Amate in Topa tungah hu ngenin au a, thiampite in lemle tum hi.
15 Judah te au vazak in Abijah lampuina taw ngalsim hi; Pathian in Jeroboam le Israel ngalkaphonpite zo hi.
16 Judah te kung pan Israel te tai a, Pathian in Judah mite in amate zothawsak hi.
17 Abijah le a ngalkaphonpite in Israel te zocip a, — Israel ngalkap phabel tul za nga that uh hi.
18 Tuabangin Judah mite in Israel tungah zawna nga hi, banghang ziam cile amate in a taanghpupite ii Pathian, Topa suang uh hi.
19 Abijah in Jeroboam ii ngalkaphonpi del a, a khuapite pawlkhat sut hi: Bethel, Jeshanah le Ephron, tuaciang, hi khuapite khat sim ii nai ah khuanote ahi uh hi.
20 Abijah ii kumpi maan sungin Jeroboam sia thahat kik ngei nawn ngawl hi. A khakbel ciang Topa in ama vaatvawk in thi hi.
21 Abijah ahile a tha hat vaial hi. Ama in zi sawm le li nei a, tapa 22 le tanumei sawm le luk te ii pa ahi hi.
22 Abijah ii taanghthu dangte, ama sonte le a nasepnate Kamsaang Iddo Taanghthu sungah ki at hi.