15
Asa ii a Puuaphatte
1 Pathian ii thaa sia Oded ii tapa Azariah tungah theng a,
2 tuaciang, Azariah sia Asa kumpipa taw kimu tu in pai hi. Ama in, “Asa kumpipa, no Judah mite le Benjamin mite awng, hong ngai tavun! Topa na bel uh laiteng ama in hong ompui tu hi. Ama na zong uh le ama hong musak tu a, ahizong na nungngat uh le ama in hong nusia tu hi.
3 Israel sia khuangei hialma Pathian maan nei ngawl a, a hil tu thiampite le thukham zongh nei ngawlin nungta uh hi.
4 Ahizong a ngim nga uh ciang amate in Topa, Israel te ii Pathian zuan uh hi. Amate in ama zongin mu uh hi.
5 Tua hun lai in kuama ngammuangin a vak a cia ngam om ngawl hi, banghang ziam cile ngam theampo ah ngimna le buaina om hi.
6 Pathian in ngimna le heena amate tungah tungsak ahikom minam khat le minam khat, khuapi khat le khuapi khat kinengcip uh hi.
7 Ahizong note tha hat vun a thinkiam peuma heak vun. Na nasepna thaman hong kipia tu hi,” ci in au hi.
8 Asa in Oded ii tapa Azariah ii kamsaanna a son sia a zaak ciang tha nga hi. Ama in Judah le Benjamin ngam sungah a om milimte theampo le Ephraim mualtung ngam pan a laak khuapite sungah a om milimte theampo vawk siat hi. Ama in biakinn leitual ah a om Topa ii biaknatau zongh pua kik hi.
9 Ephraim, Manasseh le Simeon ngam te panin mi tam mama Asa sangah pai in a kumpi ngam sungah teang uh hi, banghang ziam cile Topa ii ama taw a omkhop hunlam amate in mu uh hi. Asa in amate theampo le Judah le Benjamin mite sam hi.
10 Amate sia Asa ii kumpi a sep zawk kum sawm le kum nga kum, a tha thum tha in Jerusalem ah kikhawm uh hi.
11 Amate in a ngalte vanh a laaksakte sung pan: khui 700 le tuu 7,000 Topa tungah sangaw biakpiakna in tua ni in pia uh hi.
12 A thin theampo le a thaa theampo taw a taanghpupite ii Pathian, Topa biak tu in amate lungkimin thuciamna khat vawt uh hi.
13 A moi a haam ahizong, numei pasal ahizong ama a bia ngawl pawpo thalup tu ahi hi.
14 Tua thuciamna a kepcing natu in Topa min taw awnging in kiciamna nei hi, tua zawkciang amate au in lemle tum uh hi.
15 A thin theampo uh taw hi thuciamna vawt zo ahikom Judah mite theampo lungdam uh hi. Topa a biakna ah amate a lungdam uh ciang ama in saang a, mun theampo ah amate kilemna pia hi.
16 Asa kumpipa in a pi Maacah sia ta a neisak thei Asherah numeipathian milim kiihuai khat a vawt hu in ama ii nu, kumpinu a hina pan heam hi. Asa in tua milim phuktanin ektham a, Kidron kuam sungah a bek teng haltum hi.
17 Asa in Israel ngamsung doai sepna mun theampo susia siat ngawl ahihang a nuntak sung teng Topa tungah thumaan hi.
18 Ama in Pathian tungah a pa Abijah ii a aap vanhte theampo le ama mama ii a aapsa ngunn le khamh taw a kivawt nate zongh Biakinnpi sungah koi hi.
19 Ama ii kumpi maan sung kum 35 kum ciang dong ngal om nawn ngawl hi.