12
Egypt te Tumin Judah A simna
(1 Kumpite 14:25-28)
1 Rehoboam in a kumpi thuneina a kip zawk po ma ciang ama le a mite theampo in Topa Thukham nusia uh hi.
2 Rehoboam in a kumpi maan zawk a kum nga kumin Topa tungah a thumaan ngawl hu in amate daan kipia hi. Egypt kumpipa Shishak in Jerusalem sia,
3 siphu ngalleang 1,200 siphu ngalkap 60,000 le Libyan, Sukki le Ethiopia ngalkap te a kihel ngalkap a kisim zo ngawl taw sim hi.
4 Ama in kulh taw a ki uum Judah khuapite la in Jerusalem khua dong nawk hi.
5 Shishak khut sung pan a suatak natu in Jerusalem ah a kikhawm Rehoboam kumpipa le Judah lampuite kungah kamsaang Shemaiah pai in, amate tungah “ Topa ii no atu thupuak sia hi bang hi: ‘Keima nong nusiat uh bangma tu in note Shishak khut sungah kong nusia zo hi, ’ ” ci hi.
6 Kumpipa le tua lampuite in maw zo khu hi ci a, amate in “ Topa ii sepna maan hi,” ci hi.
7 Topa in hi thu a mu ciang Shemaiah kungah a son kikna pan, “A mawna pualaak ahiciang amate ka susia buatu hi. Ahihang Shishak in a sim ciang a suakta valiai bekma hi tu uh hi. Jerusalem in ka thin uuk tutna a cingin thuak ngawl tu hi,
8 ahizong Shishak in amate zothal tu a, amate in keima na a sep le leitung ngamukte ii na a sep, a kilamdanna he tu uh hi,” a ci hi.
9 Jerusalem ah Shishak kumpipa pai in Biakinnpi pan le kumpi inn panin sum le vanh manphate la hi, ama in na theampo la in, a laaksak sungah Solomon kumpipa vawt khamh lumte zongh kihel hi. Ref 12:9 1 Kum 10:16-17; 1 Khang 9:15-16
10 Tuate laih natu in Rehoboam in taau lumte vawtin kumpi inn kongpi cing ngalkap bute tungah aap hi.
11 Kumpipa Biakinnpi ah a pai simin a cingte in lumte pua in, tuasia zawkciang a cingte ii inndoi ah koi kik uh hi.
12 Ama in Topa tungah kiniamkhiak ahikom Topa thin uukna in ama susia bup ngawl a, Judah atu in na te a dik a pha in piang hi.
Rehoboam ii Kumpi Maanna Tomsonna
13 Rehoboam in Jerusalem pan uk a, a kumpi hina vaang khang hi. Ama kumpi a sua laitakin kum 41 pha a, Israel ngam bup pan Topa in ama biak natu a teal Jerusalem khuapi pan ama in kum sawm le kum sali sung uk hi. Rehoboam ii nu sia Ammon ngam pan Naamah hi.
14 Rehoboam in thusia vawt hi, banghang ziam cile ama in Topa deina zong ngawl hi.
15 Rehoboam ii ngamtatnate a kipatna pan a tawpna dong le a innkuan thutepteena sia Kamsaang Shemaiah Taanghthu le Kamsaang Iddo Taanghthu sungah kimu hi. Rehoboam le Jeroboam sia khat le khat kido tan uh hi.
16 Rehoboam thi in David Khuapi sung kumpi thaan ah kiphum a, a tapa Abijah in a kumpi za laih hi.