11
Shemaiah ii Kamsaanna
(1 Kumpite 12:21-24)
1 Rehoboam kumpipa Jerusalem a thet ciang, Judah le Benjamin namte sung pan ngalkap thiambel 180,000 khawm hi. Ama in saksang ah a teang Israel minamte simin uk kik sawm hi.
2 Ahizong Topa in kamsaang Shemaiah tungah
3 Kumpipa Rehoboam le Judah le Benjamin namte theampo tungah hi thu puak in sawl hi:
4 “Na Israel mipuite sim heak vun. Na vekpi na inn tek ah cia vun. Hi bangin thupiang sia keima deina hi.” Amate in Topa thupiak ni in Jeroboam sim tu in pai nawn ngawl uh hi.
Rehoboam in Khuapite Kulh taw Uum
5 Rehoboam sia Jerusalem ah om lai a, Judah le Benjamin ngam sungah a om, a nuai a khuapite kulh taw uumsak hi:
6 Bethlehem, Etam, Tekoa,
7 Bethzur, Soco, Adullam,
8 Gath, Mareshah, Ziph,
9 Adoraim, Lachish, Azekah,
10 Zorah, Aijalon le Hebron te ahi hi.
11 Ama in hi khuapite sia nasia takin kulh taw uum a, khua sim ah a uk khat tek koi in, tua zawkciang ama in khua sim ah an, olive thau le sapittui,
12 tuaciang lum le teite zongh koi hi. Hi bangin ama in Judah le Benjamin ama ukna nuai ah keam hi.
Thiampite le Levi te Judah ah hong Pai
13 Israel ngam theampo panin thiampite le Levi te sia thangsang Judah ah pai uh hi.
14 Israel kumpipa Jeroboam le a zalaihte in Levi mite sia Topa thiampite bangin a sepsak nop ngawl hu in Levi te in nganthana le a leitang dang teng nusia in Judah ngam le Jerusalem ah kikhiin uh hi.
15 Jeroboam in doai sepna munte ah a seam tu le doai te le khuitalno lim in a vawt milimte biakna ah naseam tu in ama aituam thiampite panmun pia hi. Ref 11:15 1 Kum 12:31
16 Israel te ii nam theampo sung panin Topa, Israel ii Pathian a bia nuam takpi te in Topa, a taanghpupite ii Pathian tungah sangaw biakpiakna a piak thei natu in Jerusalem ah Levi mite zui uh hi.
17 Hi sia in Judah kumpi ngam thahatsak a, kum thum sung Solomon tapa Rehoboam tha pia in, David kumpipa le Solomon kumpipa uk sungah a om bangma in nungta in panpui uh hi.
Rehoboam ii Innkuan
18 Rehoboam in Mahalath teenpui hi, Mahalath ii pa sia David ii tapa Jerimoth hi a, a nu sia Eliab ii tanu Abihail hi a, Jesse ii tunu hi.
19 Amate in tapa thum nei a, Jeush, Shemariah le Zaham te hi.
20 Tua nungciang ama in Absalom ii tanu Maacah teenpui a, amate in tapa li nei a: Abijah, Attai, Ziza le Shelomith te ahi hi.
21 Rehoboam in a vekpi zi sawm le liat le zino sawmluk nei a, tapa kul le liat le tanu sawmluk nei hi. A zite le a zinote theampo sung pan ama in Maacah itbel hi,
22 ama in a ta dangte theampo sung pan Maacah taw a nei a tapa Abijah it tuamin a kumpi za laih tu in teal hi.
23 Rehoboam in a tapate tungah nasepte pha tak seesak a, Judah le Benjamin ngamsung theampo, kulh taw a ki uum khuapite ah koi hi. Ama in amate atu haza ngawlin a dei bang ngo takin pia a, zi tam mama zongh puisak hi.