23
1 David a huai mama ciang ama in a tapa Solomon Israel kumpi suaksak hi. Ref 23:1 1 Kum 1:1-40
Levi te Nasep
2 David kumpipa in Israel lampuite theampo le thiampite le Levi te theampo kaikhawm hi.
3 Ama in Levi mi pasal kum 30 le a tungsia theampo mi simna vawt hi. A vekpi in 38,000 pha hi.
4 Kumpipa in 24,000 sia Biakinnpi nasep uk tu in koi a,6,000 sia thu tepteena laibu keam tu le thukhen tu in koi hi,
5 4,000 in kongkha cingsak a, a dang 4,000 in kumpipa ii Topa pok natu a piak music vanhte zangh uh hi.
6 David in Levi te sia amate bee le phung zui in pawl thum in khen a: Gershon, Kohath, le Merarite ahi hi.
7 Gershon in tapa nii nei a: Ladan le Shimei te hi.
8 Ladan in tapa thum nei a: Jehiel, Zetham le Joel te hi a,
9 Ladan ii suan bee le phung lampuite veu hi. Shimei in tapa thum nei a: Shelomoth, Haziel, le Haran te hi.
10-11 Shimei in tapa li nei a: a piankum zui in Jahath, Zina, Jeush, le Beriah te hi. Jeush le Beriah in suan le paal tam nei ngawl ahikom amate sia bee le phung khat in kisim hi.
12 Kohath in tapa li nei a: Amram, Izhar, Hebron, le Uzziel te hi.
13 A tapa lianbel Amram sia Aaron le Moses ii pa hi. Aaron le ama suan le paalte sia biakna vanh thiangthote a keam tawntung tu, Topa a biak uh ciang paaknamtui hal tu, ama naseam tu le ama min taw mite thupha pia tu in kikoituam hi. Ref 23:13 Pu 28:1
14 Ahizong Pathian mihing Moses ii tapate sia Levi te sungah kihel hi.
15 Moses in tapa nii nei a, Gershom le Eliezer te hi.
16 Gershon ii tapate sungah a lampuipa sia Shebuel hi.
17 Eliezer in tapa Rehabiah bek nei a, ahizong Rehabiah in suan le paal tam mama nei hi.
18 Kohath ii tapa niina, Izhar in tapa khat Shelomith nei a, bee le phung lutang hi.
19 Kohath ii tapa thumna, Hebron in tapa li nei a: Jeriah, Amariah, Jahaziel, le Jekameam te hi.
20 Kohath ii tapa lina, Uzziel in tapa nii nei a, Micah le Isshiah te ahi hi.
21 Merari in tapa nii nei a, Mahli le Mushi te hi. Mahli zongh in tapa nii nei a, Eleazar le Kish te hi,
22 ahizong Eleazar sia tanu bek nei a, tapa nei ngawlin thi hi. A tanute in a suapui sealhte ahi Kish ii tapate teenpui hi.
23 Merari ii tapa niina, Mushi in tapa thum nei a: Mahli, Eder, le Jeremoth te hi.
24 Hite sia Levi suan le paal hi a, a bee le phung le a innkuan zui in mi sim a min taw a kiciamtee te hi. Ama suan le paalte kum kul le a tungsia khat simin Topa Biakinnpi sungah nasep hawmna khat tek nei hi.
25 David in, “Israel ii Topa Pathian in a mite tungah kilemna pia zo a, ama mama a tawntungin Jerusalem ah teang tu hi.
26 Tua ahikom Topa ompuina Puanbuk le biakna ah a kizangh vanhte theampo Levi mite in puak kul nawn ngawl hi,” ci hi. Ref 23:26 Thkna 10:8
27 David ii a khakbel a thupiakna doppha in amate kum kul a cin ciang naseam tu in a min kiciamtee hi,
28 tuaciang amate a nuai a bangin vaipuak kisee hi: Aaron ii suan le paal thiampite ii biakinn ah biakna vawt a hu tu, suum sung teng le a inndoite keamcing tu, le biakna vanh thiangthote theampo ninsak ngawl tu; Ref 23:28-32 Mi 3:5-9
29 Pathian tungah a kipia anluum, biakpiakna in a kizangh zungtaang vuite, tol kisaw ngawl muhpheangte, a ki em biakpiak nate, olive thau a kihel zungtaang vuite; biakinn ah a kipia vanhte toaikhai tu le teesak tu;
30 zing sim nitak simin Topa pok tu le a min thansak tu;
31 tuaciang Topa tungah biakpiaknate Sabbath ni, Thadet Poai le poai dangte ah a kihal simin Topa pok tu le ama min thansak tu ahi hi. Hun simin hi nasep a seam tu Levi mi phaza a see na in a zui tu ngeina te kivawt hi. Hun theampo ah Topa biak natu vaipuak sia Levi te kiseesiat hi.
32 Amate sia Topa ompuina Puanbuk le Biakinnpi kepcing tu le biakinn biakpiakna sungah a mealheakte ahi Aaron suan thiampite hu tu in nasep kipia hi.