22
1 Tua ahiciang David in, “Hi mun sia Topa Pathian Biakinnpi om natu mun hi. Hi lai ah Israel mite ii meihal biakpiaknate a piak natu biaknatau om hi,” ci hi.
Biakinnpi Sak natu Kinginkholna
2 David kumpipa in Israel ngam sungah a teang ngamdangmite theampo a kikhoptua natu thupia in na seamsak hi. Amate pawlkhat in Biakinnpi sak natu in suang king neite vawtkhol uh hi.
3 Ama in thikpim le thing kongkhapi te letnate vawt natu in a piak thik tam mama zo a, tuaciang taau a piak zongh tam leih ahikom kuama in toaitee zo ngawl hi.
4 Ama in Tyre le Sidon mite sia ama atu in Cedar thingluang tam mama puaksak hi.
5 David in, “Ka tapa Solomon ii a sak tu Biakinnpi sia nasia mama tu a, leitung ah a minthang hi tu hi. Ahihang ama moi lai a, bangma seam ngeingawl lai ahikom keima in ka kingin kholsak kul tu hi,” ci in ngaisun hi. Tua ahikom David in a thi ma in vanh tam mama nga khol zo hi.
6 David in a tapa Solomon samin Topa, Israel te ii Pathian biakinn khat sa tu in thupia hi.
7 David in ama tungah, “Ka tapa awng, Topa, ka Pathian patoai natu in biakinn khat sa nuam khi hi. Ref 22:7-10 2 Sa 7:1-16; 1 Khang 17:1-14
8 Ahihang Topa in ngal tam mama simin mihing tam mama that zo ni hi, hong ci hi. Tuabangin chi ka luansakte theampo hu in ama atu in biakinn hong sasak ngawl hi.
9 Ahitazong ama in kamciam khat hong pia hi. Ama in, ‘Tapa khat na nei tu a tua na tapa in kilemna taw ngam uk tu hi, banghang ziam cile a ngalte theampo taw ngal kilemna ama ka pia tu hi. Ama min sia Solomon hi tu hi, banghang ziam cile ama kumpi maan hun sung tengin Israel ngam sungah kilemna le ngammuanna ka pia tu hi.
10 Ama in keima atu in biakinn khat sa tu hi. Ama sia ka tapa hi tu a keima a pa ka hi tu hi. Ama kumpi khangngui zui in Israel ngam a tawntungin uk tu hi,’ ” ci hi.
11 David in a kampau zomin, “Tu in ka tapa awng, Topa na Pathian sia nang taw omkhawm tahen, ama atu in biakinn khat na sak zawk natu in ama in a kamciam taangtungsak tahen.
12 Israel ngam sia ama Thukham bangin na uk thei natu in Topa na Pathian in a thuk mu tel theina le ciimna hong pia tahen.
13 Topa ii Israel te atu in Moses tungah a piak thukhamte theampo na zui le zawna nga tu ni hi. Citakin kimuang in a, bangma in patausak heak in. Ref 22:13 Jos 1:6-9
14 Biakinnpi taw kisai in ka hanciamna taw Biakinnpi sakna ah zak tu in khamh tann 34,000 vaal le ngunn tann 34,000 vaal ka khol zo hi. Tua dom ngawlin taau le thik a kiciangtan om ngawl za dongin om hi. Kei zongh in thing le suangte khol zo khi hi, ahizong na belap kul tu hi.
15 Naseam mi tam mama nei ni hi. Suangkhuk ah naseamte, suangciangte, lettama te, tuaciang khut thiamna tuatuam a nei,
16 khamh, ngunn, taau le thik taw nasep a thiam zongh tam mama om hi. Tu in nasep kipan in a, Topa in hong ompui tahen,” ci hi.
17 David in Solomon hu tu in Israel lampui theampo thupia hi.
18 Ama in, “ Topa na Pathian sia nang taw omkhawm zo a, na kiim na paam theampo ah kilemna hong pia zo hi. Ama in keima sia ih ngam ah a teang ngei mite theampo hong zosak siat zo a, tu in amate sia nangma le Topa khutnuai ah om uh hi.
19 Tu in na thinsung theampo le na thaa theampo taw Topa na Pathian na seam in. Topa Thuciamna Thingkuang le ama biakna ah a kizangh vanh thiangtho dangte theampo a sungah na koi thei natu in tua Biakinnpi sak kipan in,” ci hi.