PSALM LATE
(Psalms)
Hi biakna late sia nam tam mama om hi. Pathian pokna le biakpiakna om a; hu ngetna; kidalna le ngupna atu thungetna om a, mawmaisak natu ngetna, Pathian thuphate hu a lungdamkona le, ngalte daan piak natu ngetna cite ahi hi. Hi thungetnate sia aituam le ngamminam bup a zongh ahi hi. La pawlkhatte sia mihing khat ii thinsung thuakna tatak lakna mun om a, pawlkhatte sia Pathian mihing theampo te ii kisapna le a thinsung thuaknate om hi.
Psalm late sia Jesus in zangh a, Thuciam Thak at te in, sisanh uh hi. Tuaciang Tapidaw Pawlpi kipatciil pan biakpiakna in a kikeamcing laibu manpha suak hi.
Psalm Late 1
LAIBU A KHATNA
Lungdamna Tatak
1 Mihing lungdam ih ci te in
mihing ngilote ii ngaisut piakna a nialte,
mawneite zia a zui ngawlte,
Pathian ii zak ngawlte taw a kizom ngawlte ahi hi.
2 Amate in Topa Thukham zuina
sungah lungnopna mu zaw uh a,
tua thute sun taw zan taw ngaisusun uh hi.
3 Amate in luihui ah a po thingkungte bang hi a,
a nga hunin nga a, a teete a vul bua hi.
A sep a vawt theampo a zo uh hi. Ref 1:3 Jer 17:8
4 Ahizong mihing ngilote in tuabang hi vet ngawl a,
vui ii letkeak taangphaw taw kibang uh hi.
5 Mawneite Pathian in
puavawk tu a,
Pathian ii mite sung pan a tuamin koi tu hi.
6 Thutangte Topa in
lamlakin dal a,
ahizong a ngilote sia amate lalcip natu munah a pai uh hi.