Psalm Late 2
Pathian Teal Kumpipa
1 Banghangin minamte in
leedo sawm thong ziam?
Banghangin mihingte in
a thimthaam tupnate vawt ziam? Ref 2:1-2 Sawl 4:25-26
2 A kumpite in leedo a,
a ukpite taw Topa le a teal kumpipa
a thimthamin langpan khawm uh hi.
3 Amate in “Hong ukna pan ei le ei kisuatak tawng i,
hong letna vawk keak tawng” ci uh hi.
4 Vantung ah a om ama tokhum tung pan Topa nui a,
amate ii a ngina ngawl ngealnate nunau lel hi.
5 Tuaciang ama in thin uukna taw
amate kidop natu thupia a, a thinsona hangin amate patausak uh hi.
6 Ama in “Ka mual thiangtho
Zion ah
ka kumpipa ka koi zo hi,” ci hi.
7 Kumpipa in “ Topa thu khensatna son tu khi hi,” ci hi.
Ama in kei tungah hi bangin hong ci hi,
“Nang sia ka tapa na hi hi,
tuni in na pa ka suak zo hi.” Ref 2:7 Sawl 13:33; Heb 1:5; 5:5
8 Hong ngen ta'n, minamte
theampo kong pia tu a,
leitung bup nangma aa hi tu hi.
9 Nangma in amate thikmol taw na veltham tu a,
leibeal tam bek bangin amate na sutham tu hi. Ref 2:9 Tpl 2:26-27; 12:5; 19:15
10 Tu in no kumpi te awng, hi kidop natu thu hong ngai tavun.
No leitung ukte awng, hi thu tel tavun.
11 Kiitakna taw Topa na seam vun a,
12 ama mai ah liinna taw kun vun;
tua ahibuale ama thin uuk vat tu a,
thakhat thu in na thi tu uh hi.
Ama a bealte in a lungdamte ahi uh hi.