42
1 Tua zawkciang Job in Topa kam zo hi.
Job
2 Topa awng, vaangletna theampo na nei hi;
na vawt nop theampo na vawt theina thu ka he hi.
3 Bangma tel ngawl pi in na ciimna kong dok ngamna thu taw kisai in nong dongh hi.
Keima in ka tel ngawl thute, kei heak tu in lamdangin a nasia leih thute a son ka hi hi. Ref 42:3 Job 38:2
4 Na pau laitakin kong ngai tu le nong doknate kong zo tu hanciam in nong sawl hi. Ref 42:4 Job 38:3
5 Hun bosa sungah ngual ii hong son teng bekma ka he hi,
ahihang tu in ka mittangte taw ma in nang kong mu zo hi.
6 Tua ahikom ka pau sa theampo tungtaang ka maizum a, kisik kik in
leivui sung le vut sungah ka om hi.
Thukhupna
7 Topa in Job a paupuina teng a man zawkciang ama in Eliphaz tungah, “Nangma le na lawmte nii tungah ka thin uuk hi, banghang ziam cile, kei huvau ka naseampa Job ii son bangin note in thumaan thutak na son bua uh hi.
8 Tu in khuital sali le tuutal sali Job kungah paipui vun a, noma atu in sangaw biakpiakna in tuate pia vun. Job in no atu thu hong ngetsak tu hi, tuaciang ama ii thungetna ka zo tu a, na kilawm uh bangin kong maimawlsak buatu hi. Ama ii son bangin kei huvau thumaan na son bua uh hi,” ci hi.
9 Eliphaz, Bildad le Zophar te in Topa ii amate sep tu a sawl bangin a sep uh ciang Topa in Job thungetna zo hi.
10 Tuaciang Job in ama ii a lawmte thum atu thu a ngetsak zawkciang Topa in Job sia nuamsasak kik a, nidangin a nei ngeiza ii a zaa nii pia hi. Ref 42:10 Job 1:1-3
11 Job ii a suapui pate, a suapuinumeite le, a ngualtamh luite theampo ama inn ah hawin ama taw anneakpoai vawt uh hi. Amate in Topa ii ama tung a tunsak ngimnate theampo hu in khuangai pui in heeneam uh hi. Amate khat simin sum pawlkhat le khamh khutzungbu khat tek ama pia uh hi
12 Topa in Job sia a khaksang a nuntak sungin a masa a nuntakna sangin thupha tamzaw lai pia hi. Job in tuu 14000, kalaoh 6000, khui 2000, le la 1000 nei hi.
13 Ama sia tapa salite le tanu thumte ii pa suak hi.
14 Ama in a tanu lianbel sia Jemimah, a niina sia Keziah, tuaciang a nobel sia Keren Hapuch ci in min phuak hi.
15 Leitung bup ah Job ii tanute bangin a mealpha numei dang om ngawl hi. A pa in a suapui pate a piak bangma in a tanute ngamh khensak hi.
16 Job in hisia zawkciang a tute le a tu selawnte a mu tu dongin kum 140 khansau in nungta hi.
17 Tuaciang ama kum haam tatakin thi hi.