3
Aaron ii Tapate
1 Hiteng sia, Topa ii Sinai Mual tungah Moses a paupui hun lai a, Aaron le Moses ii innkuanpuite ahi hi.
2 Aaron in tapa li nei a: a tapa lianbel Nadab hi a, Abihu, Eleazar le Ithamar te ahi hi. Ref 3:2. Mi 26:60
3 Amate thiampi suak tu in sathau kinoai a, thupha piak kipsakna a ngate ahi hi.
4 Ahizong, Nadab le Abihu te sia Sinai Sennealngam ah a thiangtho ngawl meihal biakpiakna Topa tungah a piak ciang, kithatlum hi. Amate in ta nei ngawl ahikom Aaron nuntak hunsung teng Eleazar le Ithamar in thiampi na seam uh hi.Ref 3:4 Thiam 10:1-2; Mi 26:61
Thiampite Na Sepsak tu in Levi te Panmun Kipia
5 Topa in Moses tungah,
6 “Levi minamte paipui in a, thiampi Aaron ii naseam tu in panmun pia in.
7 Amate in keima ompuina Puanbuk atu in a kisamh bang le thiampite atu le taangpite atu a kisamh bang seam tu uh hi.
8 Amate in Puanbuk sungah a om vanh theampo keamcing tu uh a, a taanglai Israel te atu in naseam tu uh hi.
9 Levi mite ii vaipuak sia Aaron le a tapate ii na a sepsak tu bek ahi hi.
10 Thiampi na a seam tu in Aaron le a tapate nasep na pia tu a; midang khat pawpo hi na a seam nuam sia kithatlum tu hi,” ci hi.
11 Topa in Moses tungah,
12-13 “Tu in Levi mite keima aa hi tu hi. Egypt te ii taciil theampo ka thalup lai in Israel te innkuan tek pan tapa upabel le a ngannote sung pan a suakciil theampo keima atu in ka thiangthosak hi. Tu in Israel mite tapaciilte taangin Levi mite keima aa ahi hi; amate keima neisa hi tu hi. Keima in Topa ka hi hi.” ci hi. Ref 3:13 Pu 13:2
Levi mite Misimna
14 Sinai Sennealngam ah Topa in Moses tungah,
15 Levi mite ii bee le phungte le innkuante zui in, tha khat pan a tungsia a pha pa peuma a min la in tepteena vawt tu in sawl a,
16 a thupiak bangin Moses in seam hi.
17-20 Levi in tapa thum nei a: Gershon, Kohath le Merari ahi hi. Tuate amate min a kivaw bee le phungte ii taanghpupite ahi hi. Gershon in tapa nii nei a: Libni le Shimei ahi hi; Kohath in tapa li nei a: Amram, Izhar, Hebron le Uzziel ahi hi; Merari in tapa nii nei a; Mahli le Mushi ahi hi. Amate sia amate min a kivaw innkuante ii taanghpupite ahi uh hi.
21 Gershon ii bee le phung sia Libni innkuante le Shimei innkuante ahi hi.
22 Tha khat pan a tungsia a pha pa peuma kisim a, a vekpi in 7,500 pha hi.
23 Hi bee le phung sia nitumna sang Puanbuk nungsangah ngiaphual saat tu a,
24 Lael tapa Eliasaph in bee le phung ii ukpi seam tu hi.
25 Amate in Puanbuk, a sungsang sitna, a puasang sitna, a sung tumna kongbiang puankhai,
26 biaknatau le Puanbuk kiim kikhop na munah a om puankhakte le tuasia sung tumna kongkha puankhaite vaipuak la tu hi. Amate in hi nate taw a kipee-aw nasep theampo vaipuak la tu uh hi.
27 Kohath bee le phungte sia Amram innkuante, Izhar innkuante, Hebron innkuante le Uzziel innkuante ahi uh hi,
28 Tha khat pan a tungsia pa peuma sazian kila a, a vekpi in 8,600 pha hi.
29 Hi bee le phung te sia Puanbuk thang sangah ngiaphual saat tu a,
30 Uzziel ii tapa Elizaphan in bee le phung ukpi seam tu hi.
31 Amate in Thuciamna Thingkuang, Sabuai, meidetna khuam, biaknataute, Mun Thiangtho ah thiampite ii zak vanhte le Thiangthobel Mun sung tumna ah puankhai vaipuak la tu uh hi. Amate in hi nate taw a kipee-aw nasep theampo vaipuak la tu uh hi.
32 Levi mite ii ukpi sia thiampi Aaron tapa Eleazar hi. Ama sia Mun Thiangtho ah naseamte a ukpa ahi hi.
33 Merari bee le phung sia Mahli le Mushi innkuante a kingawm ahi hi.
34 Kum khat pan a tungsia pa peuma sazian kila a, a vekpi in 6,200 pha hi.
35 Hi bee le phung sia Puanbuk saksang ah ngiaphual saat tu a, Abihail tapa Zuriel in bee le phung ii ukpi seam tu hi.
36 Amate in Puanbuk sakna thingpheakte, a zawlte, a khuamte, a tawdapte le a kipeepui theampo vaipuak la tu uh hi. Ama te in hi nate taw a kipee-aw nasep theampo vaipuak la tu uh hi.
37 Amate in khuamte, tawdapte, khetphinte le a puasang kikhopna mun atu khaute zongh vaipuak la tu uh hi.
38 Moses le Aaron le Aaron tapate in nisuana sang Puanbuk mai ah ngiaphual saat tu uh hi. Amate in Israel mite atu in Mun Thiangtho ah sep tu nasep theampo vaipuak la tu uh hi. Mihing khat pawpo tua nasep sep tu a sawm sia kithatlum tu hi.
39 Topa thupiak bangin Moses in Levi te bee le phung zui in tha khat pan a tungsia a pha pa peuma sazian la a, a vekpi in 22,000 pha hi.
Levi te in Tapaciilte ii Dinmun La
40-41 Topa in Moses tungah, “Israel te tapa a suakciil theampo keima aa hi. Tua ahiciang tha khat pan a tungsia Israel te tapa a suakciil theampo min tepteena lai vawt in. Ahizong amate tapa suakciil theampo taangin Levi te theampo keima aa ka suaksak hi! Keima in Topa ka hi hi! Tua banah nganno suakciil theampo taangin Levi te ngannote keima aa ka suaksak hi.” ci hi.
42 Moses in a thu ni a, tapa suakciil tha khat pan a tungsia theampo sazian la in,
43 a vekpi kingawm in 22,273 pha hi.
44 Topa in Moses tungah,
45 “Tu in Israel te tapa suakciil theampo taangin Levi te keima atu in hong aap ta'n a, Israel te nganno suakciil theampo taangin Levi te ii ngannote zongh hong aap ta'n.
46 Israel te tapa a suakciilte sia Levi te sangin 273 in tamzaw ahikom a vaal tapate lei kik nanak tu ni hi.
47 Biakbuk ah a kizangh ngeina om bangin tapa khat ciang ngunntang nga pia in a,
48 hi sumte Aaron le a tapate tungah pia in” ci hi.
49 Moses in a thu ni a,
50 ngunntang 1,365 la in,
51 Aaron le a tapate tungah pia hi.