4
Levi nam Kohath Bee le Phung Nasepte
1 Topa in Moses tungah,
2 Levi nam Kohath bee le phung ii a bawng le a innkuante zui in mi simna vawt tu le,
3 Topa ompui na Puanbuk sungah naseam thei tu kum sawmthum le kum sawmnga kilaklaw pa theampo sazian la tu in sawl hi.
4 A nasep sia a thiangthobel nate kihel hi.
5 Topa in a nuai a bangin thuhilnate Moses tungah pia hi. Ngiaphual na phel tu uh hun a tun ciang Aaron le a tapate Puanbuk sungah tum tu a, Thuciamna Thingkuang mai ah a om puankhai la in tuasia taw tua Thingkuang siin tu uh hi.
6 Amate in tuasia savun pha khat taw siin tu a, a tungbel ah vancii puan khat taw siinin, tua zawkciang a zawn natu thingpumte thun tu uh hi.
7 Topa tung anluum piakna sabuai tungah amate in vancii puan pha tu a tua tungah pakante, ngimnamtui bungte, biakpiakna kuangte le sapittui biakpiakna thawlte koi tu uh hi. Sabuai tungah anluum om tawntung tu hi.
8 Amate in tuate theampo puansan khat taw siin tu a, savun pha khat taw tuate siin thua in, a zawn natu thingpumte thun tu uh hi.
9 Amate in vancii puan khat la in, meiinnte taw meidetna khuam, taitee, kuangte le olive thau koina bung theampo siin tu uh hi.
10 Amate in tuasia le a vanhte theampo savun pha khat sungah tunin puak natu thingzawl tungah koi tu hi.
11 Tua zawkciang amate in vancii puan khat taw khamh biaknatau siin tu a tua tungah savun pha khat koi in, tuaciang zawn natu thingpumte thun tu uh hi.
12 Amate in Mun Thiangtho ah a kizangh vanh theampo la tu a vancii puan khat taw tunin savun pha khat a tungah koi in tuaciang puakna tu thingzawl sia tungah tuate koi tu uh hi.
13 Amate in sathau a nel vutte biaknatau pan luak tu a, a tungah puan sandup khat pha tu hi.
14 Amate in biaknatau nasepna ah a kizangh vanhte: meihalna kuangte, thikkoaite, kawkeaute le kisilna kuangte theampo tua tungah koi tu uh hi. Tuaciang amate in savun pha khat tua tungah koi tu uh hi, tuaciang a zawnna thingpumte thun tu uh hi.
15 Ngiaphual kiphel tu hun a cin ciang a thiangtho nate le vanhzakte theampo Aaron le a tapate in a sit zawkciang a pua tu in Kohath bee le phung pan hong pai tu uh hi. Kohath bee le phung in a thiangtho nate thutha ngawl tu a, a thutha le amate thi tu uh hi.
Puanbuk a kikhiin simin hite sia Kohath bee le phung ii vaipuak ahi hi.
16 Puanbuk bup le meidet tu sathau, ngimnamtui, antang biakpiakna, noi sathaute le Topa tungah a ki aapsa puanbuk sungah a om theampo thiampi Aaron tapa Eleazar ii vaipuak hi tu hi.
17 Topa in Moses le Aaron tungah,
18 “Kohath ii bee le phung sia
19 hi biakna taw kisai a thiangthobel nate nai ah a paina hu in thalup thuaksak heak in. Hisia a pian ngawl natu in Aaron le a tapate a sungah tumin, mi simin a sep tu te pia in, a vawt tu te son tu uh hi.
20 Ahizong Kohath mite puanbuk sungah tumin biakna taw kisai a thiangtho nate tua tu in a kithoai thiampite a mu le amate thi tu uh hi,” ci hi.
Levi nam Gershon Bee le phung ii Sep tute
21 Topa in Moses tungah,
22 Levi nam Gershon bee le phungte a innkuan le a beete taw kizui in mihing simna vawt tu le,
23 Topa ompui na Puanbuk sungah na a seam thei tu kum sawmthum pan kum sawmnga kilaklaw pa peuma sazian la in sawl hi.
24 Amate in a nuai a vanhte puak tu vaipuak nei uh hi:
25 Puanbuk, a sung sitna, a pua sitna, a tung sitna a kipha savun, a sung tumna puankhai,
26 biaknatau le puanbuk kiimkot ah a om kikhopna mun puankhakte le khauhualte, tuasia sung tumna puankhakte le tua nate thua natu vanhzakte theampo ahi hi. Amate in hi nate atu a kisamh theampo vawt tu uh hi.
27 Aaron le a tapate ii Gershon suante tungah puak tu le sep tu vaipuak a piak theampo a sep siat natu in Moses le Aaron in pha takin en tu hi.
28 Hite sia Puanbuk sungah a sep tu Gershon bee le phungte ii vaipuak ahi hi; amate in tua nasepte thiampi Aaron tapa Ithamar ii thupiakna bangin seam tu uh hi.
Levi nam Merari Bee le Phung ii Sep tute
29 Topa in Moses tungah Levi nam Merari bee le phung ii bawngte le innkuante zui in mihing simna nei tu le,
30 Topa ompui na Puanbuk sungah na a seam thei tu kum sawmthum pan kum sawmnga kilaklaw, pa peuma sazian la in sawl hi.
31 Amate in puanbuk ii thingpheakte, zawlte, khuamte, le tawdapte,
32 tuaciang khuamte, tawdapte, khetphinte le puanbuk kiim kikhop na munah khaute, tuate taw a kizom nate theampo puak tu vaipuak nei uh hi. A puak tu vanhte mi simin vaipuak tekin nei tu hi.
33 Hite sia Puanbuk sungah Merari bee le phungte ii vaipuak hi a: amate in thiampi Aaron tapa Ithamar thupiakna bangin seam tu uh hi.
Levi te Mihing simna
34-48 Topa thupiakna taw kizui in, Moses, Aaron, le taangpi lampuite in Levi mi nam thumte ahi, Kohath, Gershon, le Merari suan teng a mihing simna nei hi, amate in Topa ompui na Puanbuk sungah na a seam thei tu kum sawmthum le kum sawmnga kilaklaw, pa peuma a bawngte le innkuante zui in sazian la a, a nuai a bang ahi hi.
49 Topa in Moses tungah a thupiak bangin mi simin min sazian kila hi; Topa in Moses tungtawnin a thupiak bangin, a nasep tu le a puak tu vaipuakte mihing sim tungah kipia hi.