9
Aaron in Sangaw Biakpiaknate Pia
1 Thiampi kipsakna a zeksa teng a man khuavak ni in Moses in Aaron le a tapate le Israel lampuite sam hi.
2 Ama in Aaron tungah, “A mealhem ngawl khuital khat le tuutal khat paipui in, Topa tungah pia in a, mawphel biakpiak natu in khuital le meihal biakpiak natu in tuutal hi tu hi.
3 Tua zawkciang Israel mite tungah mawphel biakpiak natu in kealtal khat, meihal biakpiak natu in a mealhem ngawl kum khat a pha khuino khat le kum khat a pha tuuno khat,
4 pawlkhop biakpiakna khat atu in khuital khat le tuutal khat a ken natu son in. Sathau taw a kihel antang taw biakpiakna taw in amate in Topa tungah sangaw biakpiakna pia tu uh hi. Amate in hi teng vawt nanak tu uh hi, banghang ziam cile tuni in amate kungah Topa kilangh tu hi,” ci hi.
5 Moses thupiak bangin amate in Puanbuk mai ah na theampo paipui a, Topa a bia tu in taangpi bup tua munah kikhawm uh hi.
6 Moses in, “ Topa ompuina khuavak taang velvol sia no tungah a kilangh thei natu in hi sep tu theampo Topa in note thu hong pia zo hi,” ci hi.
7 Tua ahiciang ama in Aaron tungah, “Biaknatau ah pai in na mawnate le na mite mawnate a mai natu in, mawphel biakpiakna le meihal biakpiakna pia in. Topa thupiak bangin, mite mawnate a mai natu in hi biakpiakna pia in” ci hi. Ref 9:7 Heb 7:27
8 Aaron in biaknatau ah pai a, a ma mawphel biakpiakna in khuital moi khat ngo hi.
9 A tapate in sachi puak a, ama in sachi sungah a khutme papin biaknatau king a dok teng sachi pawlkhat noai in, biaknatau bul ah a taanglai teng sung hi.
10 Tua zawkciang Moses tungah Topa thupiak bangin Aaron in a thau, a nautate le a thinsa a phabel teng biaknatau tungah hal hi.
11 Ahizong ama in a satak le a vun sia ngiaphual pua sangah hal hi.
12 Ama ii aituam meihal biakpiakna in ama in ngan ngo hi. A tapate in sachi puakin tuasia biaknatau pangh li tengah the hi.
13 Amate in a lu le a sabek dangte a khut sungah pia a, ama in tua sate biaknatau tungah hal hi.
14 Tua zawkciang ama in a sungkua teng le a nung peangte nii silin biaknatau tung, a om lai meihal biakpiaknate ii tungbel ah hal hi.
15 Tua zawkciang ama in mipite atu biakpiaknate pia hi. Ama in ama mawphel biakpiakna a vawt bangin mipite mawmai natu in a kipia keal sia kai in ngo a, biakpiakna in pia hi.
16 Ama in meihal biakpiak natu in nganno zongh paipui a, ngeina om bangin biakpiakna in pia hi.
17 Ama in antang biakpiakna pia a, anvui khutdim khat la in biaknatau tungah hal hi. Hisia ni sim meihal biakpiakna belapna ahi hi.
18 Ama in mipite atu kipawlkhop biakpiakna in khuital le tuutal ngo hi. A tapate in sachi puak a, ama in biaknatau pangh li tengah the hi. Ref 9:18 Thiam 3:1-11
19 Aaron in khuithau le tuutal thaute,
20 nganhingte ii awmsa tungah koi in biaknatau ah paipui siat hi. Ama in biaknatau tungah a thaute halin
21 Moses thupiak bangin a awmsate le a nung peang ziatsangte thiampite atu in Topa tungah a tuam vilvel letsong in pia hi.
22 Aaron in sangaw biakpiakna teng a man ciang mipite tungah a khutte laamin thupha pia a, tua zawkciang tuaksuk hi. Ref 9:22 Mi 6:22-26
23 Topa ompuina Puanbuk sungah Moses le Aaron tum in, hong pusua ciang amate in mipite thupha pia a, Topa ompuina khuavak taang velvol sia mipite tungah kilangh hi.
24 Thakhat thu in Topa in meikuang puak a, biaknatau tungah a om meihal biakpiakna le a thau teng haltum hi. Mipite sia tua meikuang a mu uh ciang au siat a lei maingat in kunsuk uh hi.