10
Nadab le Abihu Mawna
1 Aaron ii tapate Nadab le Abibu in amate mei lakna kuang tek la in a sungah meikam koi a, ngimnamtui helin Topa tungah pia hi. Ahizong tua mei thiangtho ngawl hi, banghang ziam cile Topa in tuasia a piak tu in amate thupia ngawl hi.
2 Thakhat thu in Topa in mei puak a, Topa ompuina munah tua mei in amate kaanghlum hi.
3 Tuasia ciang Moses in Aaron tungah, “ Topa in ‘Ka na a seamte theampo in ka thianthona zakta tu hi; ka mite tungah ka vaangletna ka pualaak tu hi’ a ci ciang a deina sia, tubang ahi hi,” ci hi. Ahizong Aaron bangma pau ngawl hi.
4 Moses in Aaron pano, Uzziel tapate ahi, Mishael le Elzaphan sam a, amate tungah, “Hi sungah hong pai tavun a, a thiangtho Puanbuk sung pan ngiaphual pua sangah na suapuisealte ii luang pusuapui tavun,” ci hi.
5 Moses thupiak bangin amate in a luangte puan taw tunin ngiaphual pua sangah pusuapui uh hi.
6 Tua zawkciang Moses in Aaron le a tapate Eleazar le Ithamar tungah, “Na khuangaina na lakna in sam pot ngawl ahibuale puan balkeak in om heak vun. Tuabang na om uh le, na thi tu uh a taangpi bup tungah Topa thin uuk tu hi. Ahizong Topa ii puak mei taw a kaanghlumte hu in na Israel mipuite theampo in a khuangaina lak thei tu uh hi.
7 Puanbuk kongbiang nusia heak vun, na nusia uh le na thi tu uh hi, banghang ziam cile Topa ii noi sathau taw a ki aap sate na hi uh hi,” ci hi. Tua ahiciang amate in Moses ci bangin seam uh hi.
Thiampite Zui tu Ngeinate
8 Topa in Aaron tungah,
9 “Nangma le na tapate sapittui ahibuale beer na neak zawk uh ciang kong ompuina Puanbuk sungah tum ngawl tu nu hi; na tum uh le thi tu nu hi. Hi thukham na suan na paalte theampo ii zui tu ahi hi.
10 Note in Topa neisa le zak ngengei vanhte sia, biakna taw kisai in a thiangtho le a thiangtho ngawl khentel tu nu hi.
11 Moses tungtawn a kong piak thukham theampo note in Israel mite tungah hil nanak tu nu hi,” ci hi.
12 Moses in Aaron le a taanglai a tapa niite Eleazar le Ithamar tungah, “ Topa tungah a kipia ante sung pan a taanglai antang biakpiakna teng la vun a, tol saw ngawl anluum vawtin, biaknatau pangh ah ne vun, banghang ziam cile biakpiakna sia thiangtho mama hi.
13 A thiangtho munah ne vun; tua in Topa tungah a kipia an sung pan hong khensak nangma le na tapate ii tan tu ahi hi. Tua in Topa ii kei tungah hong thupiak ahi hi. Ref 10:12-13 Thiam 6:14-18
14 Ahizong nangma le na innkuanpuite in thiampite atu a Topa tungah a kituam piak letsong le a sa tel, a awmsa le a pheisate ne thei tu nu hi. Biakna taw kisai a thiangthona mun pawpo ah tua sate ne thei tu nu hi. Tuate Israel mite ii pawlkhop biakpiakna te sung pan hong khensak nangma le na tate tan tu in hong kipia biakpiaknate ahi hi, Ref 10:14-15 Thiam 7:30-34
15 Topa tungah an biakpiakna in a thau a kipiak hun ciang amate in a pheisa le a awmsa paipui tu uh hi. Topa thupiak bangin hi sanamte nangma le na tate neisa hi tawntung tu hi,” ci hi.
16 Mawphel biakpiak natu ahi keal sia ii thu Moses in a dok ciang tua keal, kihal tum zo ci sia he hi. Hi thu hangin Eleazar le Ithamar tungah thin uuk a, ama in,
17 “Banghangin mawphel biakpiakna sa a thiangtho munah ne ngawl nu ziam? Tuasia in a thiangtho mama an hi a, taangpi taangta mawmai natu in Topa ii no hong piaksa ahi hi. Ref 10:17 Thiam 6:24-26
18 A chi sia Puanbuk thiang sungah a kipaipui ngawl hu in, kong thupiak bangin biakpiakna sate tua munah na neak tu uh ahi hi,” ci hi.
19 Aaron in, “Mawphel biakpiakna sa sia tuni in ne hi leng Topa in hong saang tu ziam? Tuni in Topa tungah mipite in mawphel biakpiakna le meihal biakpiakna pia zo napi, kei tungah hi bang a lauhuai nate hong tung lalai hi,” ci in zo hi.
20 Moses sia hi thu a zaak ciang lungkim hi.