8
Aaron le A Tapate Thiampi Kipsakna
(Pusuana 29:1-37)
1 Topa in Moses tungah,
2 “Aaron le a tapate ka ompuina Puanbuk kongbiang ah paipui in, tuaciang thiampi puante, noi sathau, mawphel biakpiak natu in khuital moi sia, tuutal niite le tol saw ngawl anluum khum sia hong paipui ta'n.
3 Tua zawkciang tualai ah taangpi bup khawm in,” ci hi.
4 Topa thupiak bangin Moses in seam a, taangpi a kikhop uh ciang,
5 amate tungah Moses in, “Tu in ka sep tu sia, Topa hong thupiak ahi hi,” ci hi.
6 Moses in Aaron le a tapate mai sangah paipui a biakna zeksa om bangin, kibualsak hi.
7 Moses in Aaron laktong le puantual silhsak a, a kawng ah kawngsawmna sawm hi. Ama in ephod silhsak a, a pha mama a kitak kawngkhau taw a kawng sawmsak hi.
8 Ama in awmdal thuasakin, a tungah Urim le Thummim koi hi. note 8:8\xk urim le thummim: Hi thil niite sia Pathian ii deina zonna ah thiampite ii zak hi a, a zak dan kithiangtel ngawl hi.\x*
9 Topa thupiak bangin ama in a lu ah dial khimsak a, a dial mai sangah a thiangtho ki aapna lim, kizepna khamh sia belh hi.
10 Tua zawkciang Moses in noi sathau la in Topa ompuina Puanbuk tung le a sungah a om nazak theampo noai siat a, hi bangin Topa tungah aap siat hi.
11 Topa tungah tua teng aap natu in ama in sathau pawlkhat la in biaknatau tung, a vanh zakte tung, kuang tung le a ngaknate tungah salivei the hi.
12 Moses in Aaron lu tung sathau buakna taw Aaron sia thiampi a hina kipsak hi.
13 Tua zawkciang Moses in Topa thupiak bangin Aaron tapate mai sangah paipui a, laktongte silsakin a kawng uh ah kawngsawmte sawmsakin a lu uh ah lukhute khusak hi.
14 Tua zawkciang Moses in mawphel biakpiak natu in khuital moi sia paipui a, Aaron le a tapate in khui lu tungah a khutte nga uh hi.
15 Tua biaknatau aap natu in Moses in tuasia ngo a, a khut taw a chi tawm la in biaknatau kingdokte noai hi. Tuaciang a taanglai chite biaknatau bul ah sung hi. Hi bangin ama in biaknatau aapin thiansua hi.
16 Moses in a sungthau theampo, a thinsa a phabel teng le a nauta le a tuam a thau teng la in biaknatau tungah hal siat hi.
17 Ama in a taanglai khuital sa teng, a vun, a tak le a ngilpi a ngilzangte la in Topa thupiak bangin ngiaphual pua sangah hal hi.
18 Tuasia zawkciang Moses in meihal biakpiak natu in tuutal paipui a, Aaron le a tapate in a lu tungah a khutte nga uh hi.
19 Moses in tua tuu ngo a, biaknatau pangh li tengah a chi the hi.
20-21 Ama in Topa thupiak bangin tuusa sem a, a sungkua le a nung peangte tui taw silin, a lu, a thau, le a taanglai tuusa teng biaknatau tungah hal hi. Hi meihal biakpiakna sia an taw biakpiakna hi a, a ngimnam in Topa lungkimsak hi.
22 Tua zawkciang Moses in thiampite a kipsak natu in tuutal a niina sia paipui a, Aaron le a tapate in a lu tungah a khutte nga uh hi.
23 Moses in tuutal ngo a, a chi tawm la in Aaron ziatsang bil tung, a ziatsang khutpi tung le a ziatsang peangpi tungah noai hi.
24 Tuaciang ama in Aaron ii tapate mai ah paipui a, tuutal chi pawlkhat a ziatsang bil tung, a ziatsang khutpi tung le a ziatsang peangpi tung tek ah noai hi. A taanglai chi te Moses in biaknatau pangh li tengah the hi.
25 Ama in a thau, a meithau, a sungthau theampo, a thinsa phabel teng, a nauta le a tuam a thau teng le a nung peang ziatsang la hi.
26 Tua zawkciang ama in Topa tungah a ki aap khum sung pan tol saw ngawl anluum khat, sathau taw kivawt anluum khat, le moh phang khat la in a thau tung le a nung peang ziatsang tungah koi hi.
27 Ama in Aaron le a tapate khut tungah hi an teng koi a, amate in Topa tungah a tuam vilvel letsong in pia uh hi.
28 Tuaciang Moses in amate tung pan tua an teng la in kipsakna biakpiakna in nei a, meihal biakpiakna ii tungbel biaknatau tungah hal hi. Hisia in an taw biakpiakna hi a, a ngimnam in Topa lungkimsak hi.
29 Tuaciang Moses in a awmsa la in Topa tungah a tuam vilvel letsong in pia hi. Tua in kipsakna biakpiakna tuutal sa sung pan Moses ii satel ahi hi. Topa thupiak bangin Moses in seam siat hi.
30 Moses in noi sathau tawm le biaknatau tungah a om sachi tawm la in, Aaron le a tapate le a puante tungah the hi. Hi bangin amate le a puante Topa tungah aap hi.
31 Moses in Aaron le a tapate tungah, “ Topa thupiak bangin Topa ompuina Puanbuk kongbiang ah sate paipui in huan vun a, tuaciang khum sungah a om kipsakna biakpiakna anluum taw tualai ah ne vun.
32 A sa le anluum neakmongte hal vun.
33 Kipsakna biakpiakna a zeksa teng a cin mateng ni sali sung Puanbuk kongbiang pan puapial ngawl tu nu hi.
34 Na mawna uh a mai natu in Topa thupiak bangin tuni in ih vawt zo hi.
35 Topa thupiak bangin seamin, sun taw zan taw ni sali sung Puanbuk kongbiang ah om hamtang tu nu hi. Na om bua uh le thi tu nu hi. Hi thu in kei tungah Topa hong thupiak ahi hi,” ci hi.
36 Topa ii Moses tungtawnin a thupiakte Aaron le a tapate in tuabangin vawt siat uh hi.