22
Biakpiakna ah Piakte ii Thianthona
1 Topa in Moses ii Aaron le a tapate a son tu in
2 thupia a, “Ka min thiangtho na daisak ngawl het natu in Israel mite ii ka tungah hong aaptuam a thiangtho biakpiaknate ciliap tavun. Keima in Topa ka hi hi.
3 Na suan na paal khat po in biakna taw kisai a thian ngawl laitak, Israel mite ii ka tungah hong aaptuam a thiangtho biakpiaknate nai ah hong pai in ahile biaknatau ah naseam kik thei ngeingawl tu hi. Hisia maisang hun theampo ah a kizangh tu ahi hi. Keima in Topa ka hi hi.
4 “Aaron suan le paalte sung pan a kiitakhuai vun natna veite, ahibuale meima naai neite in biakna taw kisai in a thiantho mateng a thiangtho biakpiakna ante ne ngawl tu hi. Thiampi khat pawpo in mithiluang taw a kithutha a nin khat pawpo, ahibuale bawtui a tee pa khat,
5 ahibuale a thiang ngawl nganhing, ahibuale mihing khat a tham le ama thiang ngawl hi.
6 Thiampi khat pawpo a thiang buale nitak dongin a nin hi tu a, a kibual mateng a thiangtho biakpiakna ante ne thei ngawl tu hi.
7 Nitum zawkciang ama thiang a, tuaciang ama an ahi a thiangtho biakpiakna ante ne thei tu hi.
8 Ama in, ama thu in a thi thawthong nganhing ii sa ahibuale ngamsa ii thalup sate ne ngawl tu hi; tua in ama ninsak tu hi. Keima in Topa ka hi hi.
9 “Thiampi theampo in kong piaksa ngeinate zui tu hi. Tuabang a zui bua uh le amate a maw hi tu a thi tu uh hi, banghang ziam cile amate in a thiangtho ngeinate a zui ngawl hang ahi hi. Keima in Topa ka hi a, amate ka thiangthosak hi.
10 “Thiampi innkuanpuite bek in a thiangtho biakpiakna an pawpo ne thei tu a; kuama dang — thiampi taw a omkhawm khat, ahibuale a thacial khat zongh in ne thei ngawl tu hi.
11 Ahizong ama ii sum taw a lei silate ahibuale tualsuak silate in thiampi ii a nga ante ne thei tu hi.
12 Thiampi khat ii tanu in thiampi ahi ngawl khat a teenpui le a thiangtho biakpiakna an khat pawpo ne thei ngawl tu hi.
13 Ahizong thiampi khat ii tanu sia a pasal thi in meingong, ahibuale ta nei ngawlin a pasal in khul a, a pa inn ah bealhin a cia kik le a pa ii nga thiampi ante ne thei tu hi. Thiampi innkuanpuite bek in hi ante ne thei tu hi.
14 “Thiampi innkuanpui ahi ngawl khat in a thiangtho biakpiakna ante a heak ngawlin a ne tha le ama in thiampipa tungah a man a cingin liau kik tu a, zakhat ciang kul taw belap tu hi.
15 Thiampite in tua ante a ne thei ngawl tu midang khat pawpo a neaksakna taw,
16 a thiangtho biakpiakna ante ninsak ngawl tu hi; a ninsakte a maw hi tu a, daan thuak tu hi. Keima in Topa ka hi a, biakpiaknate ka thiangthosak hi,” ci hi.
17 Topa in Moses tungah,
18 Aaron le a tapate le Israel mite theampo ii zui tu in a nuai a ngeinate a piak tu in thupia hi. Israel mite khat pawpo in ahibuale Israel sung a teang ngamdangmi khat pawpo in meihal biakpiakna a piak ciang, kamciam taangtutna in a piak ahizong, thinzaw biakpiakna taw a piak ahizong, a mealhem ngawl nganhing zangh tu hi.
19 A kisaang thei tu in, a mealhem ngawl a tal hi nanak tu hi.
20 A mealhem nganno khat po na pia le Topa in saang ngawl tu hi. Ref 22:20 Thkna 17:1
21 Mi khat pawpo in kipawlkhop biakpiakna Topa tungah a piak ciang, kamciam taangtutna, ahibuale thinzaw biakpiakna a piak ciang, Topa ii saan thei tu in a mealhem ngawl nganhing hi tu hi.
22 Topa tungah a mittaw, a peangbai, a mealhem, meima vei, vun meima balh, a khiik nei meima vei nganhing khat pawpo pia heak vun. Hi bang nganhingte biaknatau ah an biakpiakna in pia heak vun.
23 Thinzaw biakpiakna ah a khansamh ahibuale a limci tatak ngawl nganhingte pia thei tu nu hi, ahizong kamciam taangtut natu in tuate kisaang ngawl hi.
24 A ciltang a tamhsa, a kingetsa, a kisuthamsa, a kilakeaksa nganhing khat pawpo Topa tungah pia heak vun. Hite sia na ngam sungah zak tu ki oai ngawl hi.
25 Ngamdangmite tung pan a kinga nganhing taw an biakpiakna pia heak vun. Hi bang nganhingte a sitbaang in kingaisun a, kisaang thei ngawl hi.
26-27 Khui, tuu, kealte a no a sua ciang ni sali sung a pui taw na khen buatu uh hi, ahizong tua zawkciang an biakpiakna in kisaang thei hi.
28 Ni khat sungin khuipui le a no, tuupui le a no, kealpui le a no, sangaw biakpiakna in piakhawm heak vun.
29 Topa tungah lungdamko biakpiakna na piak uh ciang hong san thei tu in ngeinate zui vun;
30 tua ni in a sa ne in, a khuavak ni zingsang dong bangma khe heak vun.
31 Topa in, “Ka thupiakte zui vun; Keima in Topa ka hi hi.
32 Ka min thiangtho daisak heak vun; Israel mite theampo in thiangtho ka hina hong saan kul hi. Keima in Topa ka hi a, note kong thiangthosak hi;
33 na Pathian ka hi natu in Egypt pan note kong pusuapui hi. Keima in Topa ka hi hi,” ci hi.