21
Thiampite ii Thianthona
1-3 Aaron suan thiampite tungah a son tu in Topa in Moses thupia a, “Thiampi peuma sia a nu, a pa, a tapa, a tanu, a suapuinu, a suapuipa le inn ah a om pasal nei ngawl a suapuinu a thi ciang simngawl a dang mealheak khat mithi vuina ah a kihelna hu in, biakna taw kisai in a nin kisua heak hen.
4 Kiteenna hu in a kinai pui a mealheak te a thi ciang mithi sungah a kihel hu in ama le ama kininsak ngawl tu hi.
5 “Thiampi peuma khuangaina lakna in a sam mun khat zongh meet ngawl tu a, a khamul zongh tan ngawlin, a ci tung kiliamsua ngawl tu hi. Ref 21:5 Thiam 19:27-28; Thkna 14:1
6 Ama thiangtho tu a, ka min daisak ngawl het tu hi. Ama in an taw biakpiaknate hong pia ahiciang ama a thiangtho kul hi.
7 Thiampi khat in pumpi kizuak ngei numei khat, ngaknu thiangtho ngawl, ahibuale pasal ii khul numei khat teenpui ngawl tu hi; ama thiangtho hi.
8 Mite in thiampipa a thiangtho in ngaisun tu hi, banghang ziam cile an taw biakpiaknate kei tungah hong pia hi. Keima in Topa ka hi hi; keima ka thiangtho a, ka mite ka thiangthosak hi.
9 Thiampipa tanu khat pumpi kizuak numei a suak le, a pa maimawlsak hi; ama kihallum tu hi.
10 “A lu tung sathau buak sa le thiampi puan silh tu in a ki aapsa Thiampi Lianbel khat in khuangaina lakna in a sam pot ngawlin, a puante balkeak in om ngawl het tu hi.
11-12 Ama kei tungah hong ki aapsa ahiciang biakna taw kisai a thiangtho ngawl kisuaksak heak hen a, a nu a pa tatak thi le zong ka Puanbuk nusia in mithi koina inn ah a tum hu in a thiangtho ka Puanbuk ninsak heak hen.
13 Ama in ngaknu thiangtho khat teenpui tu a,
14 meingong ahibuale pasal taw kikhen sa numei, ahibuale pumpi kizuak ngei numei teenpui ngawl tu hi. Ama suante sung pan ngaknu thiangtho bekma teenpui tu hi.
15 Tuabang ahibuale a thiangtho tu a tate sia biakna taw kisai in a thiang ngawl suak tu hi. Keima in Topa hi a, ama sia Thiampi Lianbel in ka koituam zo hi,” ci hi.
16 Topa in Moses ii
17 Aaron tungah a son tu in a thupiakna pan, “Na suan na paal sung pan pumpi mealhemna khat pawpo a neite in ka tungah an taw biakpiakna hong pia heak hen. Hi thu in maisang hun theampo ah zui tu ahi hi.
18 Pumpi mealhem peuma in biakpiakna pia thei ngawl tu hi, tuate in mittaw, peangbai, mealhem ahibuale pumpi sitbaang;
19 khutkon peangkon te;
20 cingkuul ahibuale mihing khansamh te; mit natna nei ahibuale vun natna nei; cil kingette ahi uh hi.
21 Thiampi Aaron suan pumpi mealhemte in kei tungah an taw biakpiakna hong pia thei ngawl tu hi.
22 Tuabang mihing khat in ka tungah hong kipia biakpiakna, a thiangtho biakpiakna le a thiangtho mama biakpiakna ante ne thei tu a,
23 ahizong ama pumpi sitbaang ahikom a thiangtho puankhai kungah pai ngawl tu a, ahibuale biaknatau neak ngawl tu hi. Ama in hi a thiangtho nate ninsak ngawl het tu hi, banghang ziam cile Keima in Topa ka hi a, amate ka thiangthosak hi,” ci hi.
24 Hi thu Moses ii Aaron, Aaron ii tapate le Israel mite theampo tungah a son thu ahi hi.