23
Biakna Poaite
1 Topa in Moses tungah
2 Israel mite ii a biak kikhop ciang, biakna poaite atu in a zui tu a nuai a ngeinate pia hi.
3 Note in na nasep natu in ni luk sung nei nu hi, ahizong ni sali ni, Sabbath sia tawlngakna ni ahi phawk vun. Tua ni in naseam heak vun, ahizong biakpiakna vawt tu in kikhawm vun. Koisung po na teang uh zong Sabbath sia Topa neisa ahi hi. Ref 23:3 Pu 20:8-10; 23:12; 31:15; 34:21; 35:2; Thkna 5:12-14
4 A kisee hun a tun simin a nuai a poaite thangsak vun.
Paisan Poai le Tol saw ngawl Anluum Poai
(Mi Simna 28:16-25)
5 Topa patoaina in a kivawt Paisan Poai sia tha masabel ni sawm le ni li ni, nitum ciang kipan hi. Ref 23:5 Pu 12:1-13; Thkna 16:1-2
6 Ni sawm le ni nga ni in Tol saw ngawl Anluum Poai kipan a, ni sali sung tol kisaw anluum peuma na ne buatu uh hi. Ref 23:6-8 Pu 12:14-20; 23:15; 34:18; Thkna 16:3-8
7 Poai sung ni masabel ni in biakna vawt tu in na kikhawm tu uh a, kuama in noma ii ni sim nasep bangma seam ngawl het tu nu hi.
8 Ni sali sung Topa tungah an taw biakpiaknate pia vun. A ni sali ni in biakna vawt tu in kikhawm kik vun, ahizong kuama in noma ni sim nasep bangma seam heak vun.
9-10 Topa hong piakna ngam thengin an na laak uh ciang anpal taangvawng sia thiampipa pia vun.
11 No hong kisaan thei natu in thiampipa in Topa tungah tuasia a tuam vilvel biakpiakna in pia tu hi. Tuasia Sabbath khuavak ni in thiampipa in pia tu hi.
12 Antang biakpiakna na piak ni in meihal biakpiakna in a mealhem ngawl kum khat a pha tuutal khat zongh na pia tu uh hi.
13 Tua taw an biakpiakna in olive thau taw a kihel anvui kilogramme nii na pia tu uh hi. Hi biakpiakna ii ngimnam in Topa lungkimsak hi. Biakpiakna in sapittui litre khat zongh pia tu nu hi.
14 Pathian tungah hi biakpiakna na piak uh mateng anthak peuma, a sial, a kan ahibuale anluum em ne heak vun. Hi ngeina sia na suan le na paalte theampo ii maisang hun theampo ah a zui tu ngeina ahi hi.
Anlaak Poai
(Mi Simna 28:26-31)
15 Topa tungah anpal na piak ni, Sabbath khuavak ni pan nipi sali a cin dong simto vun. Ref 23:15-21 Pu 23:16; 34:22; Thkna 16:9-12
16 Sabbath salivei a cin zawk ni sawmnga ni in Topa tungah a dang antang biakpiakna thak pia vun.
17 Innkuan simin anluum lum nii tek keng tu a, a tuam vilvel letsong in Topa tungah pia tu hi. Anluum khat sia anvui kilogramme nii tol kisaw in a ki em hi tu a, laak pheang tu anpal biakpiakna in Topa tungah pia tu nu hi.
18 Tua anluum taw taangpite in a mealhem ngawl kum khat a pha, tuuno sali, khuital khat le tuutal nii pia tu uh hi. Tuate Topa tungah meihal biakpiakna in antang biakpiakna le sapittui biakpiakna taw kipiakhawm tu hi. Hi biakpiakna ii ngimnam in Topa lungkimsak hi.
19 Mawphel biakpiakna in kealtal khat le kipawlkhop biakpiakna in kum khat a pha tuutalno nii zongh pia vun.
20 Thiampipa in thiampite atu in Topa tungah a tuam vilvel letsong in anluum sia tuunote nii taw pia tu hi. Hi biakpiaknate thiangtho hi.
21 Tua ni in kuama in noma ii ni sim nasep bangma seam heak vun, ahizong biak kikhopna nei vun. Koisung po ah na teang uh zong na suan na paalte in hi ngeina sia maisang hun theampo ah zui tu uh hi.
22 Na lo ante na laak uh ciang lomong a om ante la heak vun a, na nusiat sa ante at kik tu in pai kik heak vun; tuate sia mizawngte le ngamdangmite atu in nusia vun. Topa sia na Pathian ahi hi. Ref 23:22 Thiam 19:9-10; Thkna 24:19-22
Kumthak Poai
(Mi Simna 29:1-6)
23-24 A tha salina ni masabel ni sia a tuam vilvel tawlngakna ni in tang vun a, lemle hong kitum ciang biakna vawt tu in kikhawm vun.
25 Topa tungah an taw biakpiakna pia vun a, noma ii ni sim nasep bangma seam heak vun.
Mawsuutna Ni
(Mi Simna 29:7-11)
26-27 Tha salina ni sawm ni sia mite mawmai natu in kumcin biakna a zeksa sep ni tu ahi hi. Tua ni in bangma ne heak vun a; biak kikhopna ah pai tekin Topa tungah an taw biakpiakna pia vun. Ref 23:26-32 Thiam 16:29-34
28 Tua ni in naseam heak vun, banghang ziam cile tua ni sia mawna a mai natu a zeksa sep ni ahi hi.
29 Tua ni in an khat pawpo a ne sia, Pathian mi khatin kingaisun nawn ngawl tu hi.
30 Tua ni in na seam a om le Topa ama mama in thisak tu hi.
31 Koisung po ah a teang zong hi ngeina sia na suan na paalte theampo atu ahi hi.
32 Tua tha ni kua ni nitum pan kipan ni sawm ni nitum dong sia a tuam vilvel tawlngakna ni in na tan tu uh hi a, tua hun sungin bangma kine thei ngawl tu hi.
Buk Poai
(Mi Simna 29:12-40)
33-34 Buk poai sia tha salina, ni sawm le ni nga ni pan kipan ni sali sung hi tu hi. Ref 23:33-36 Thkna 16:13-15
35 Ni masabel ni in biakna vawt khawm vun a, kuama in noma ii ni sim nasep bangma seam heak vun.
36 Ni sali sung ni simin an taw biakpiakna na vawt tu uh hi. A ni liat ni in a bia tu le an taw biakpiakna pia tu in na kikhawm kik tu uh hi. Tua ni sia biak kikhop ni hi a, kuama naseam ngawl tu nu hi.
37 Hi biakna poaite sia a kisamh bangin biakna vawt khopna nei a, ni khat zawk ni khat an taw biakpiakna, meihal biakpiakna, antang biakpiakna, sangaw biakpiakna, le sapittui biakpiakna te taw Topa patoaina poaite ahi hi.
38 Hi poaite in Sabbath tan ngeina sia belapna hi a, hi biakpiaknate sia Topa tungah na piak ngengei letsongte le kamciam taangtut biakpiaknate le thinzaw biakpiaknate belapna ahi hi.
39 Lo an na laak zawk uh ciang, tha salina ni sawm le ni nga ni pan kipan ni sali sung hi poai khaam tu nu hi. Ni masabel ni sia a tuam vilvel tawlngakna ni hi tu hi.
40 Tua ni in na thingnote ii nga phabelte, palm baakte, thingtee baakboaite pawlkhat la in Topa na Pathian patoaina in biakna poai kipan tu nu hi.
41 Tua poai ni sali sung vawt tu nu hi. Hi ngeina sia na suan na paalte ii maisang hun theampo ah a zui tu ahi hi.
42 Israel mite theampo ni sali sung bukte sungah teang tu a,
43 tua hile Topa in Egypt pan hong pusuapui lai in Israel mite ii buk sak tawmte sungah hong teensakna thu na suan na paalte in hong he thei tu hi. Ama in Topa na Pathian ahi hi.
44 Hi bangin Topa patoaina in biakna poaite a khaam ciang Israel mite zui tu ngeinate Moses in pia hi.