3
Israel te le Moab te Ngal kidona
1 Judah kumpipa Jehoshaphat a maan zawk a kum sawm le liat laitakin, Ahab ii tapa Joram sia Israel kumpipa suak a, tuaciang ama in Samaria panin kum sawm le kum nii sung uk hi.
2 Ama sia Topa tungah mawna vawt a, ahizong a pa ahibuale a nu Jezebel za in sia ngawl hi; ama in a pa ii vawt Baal biak natu milim sia kaivawk hi.
3 Ahizong, ama mai ah a maang Nebat ii tapa, Kumpipa Jeroboam bangma in mawna sungah Israel lampui a, kheal nuam ngawl hi.
4 Moab Kumpipa Mesha in tuu khoai a, kum simin Israel kumpipa tungah tuuno 100,000 le tuu 100,000 ii mul teng shia in pia hi.
5 Ahihang Israel kumpipa Ahab a thi ciang Kumpipa Mesha in Israel te langpanin leedo hi.
6 Thakhat thu in Kumpipa Joram in Samaria nusia in a ngalkapte khawmtua hi.
7 Ama in Judah kumpipa Jehoshaphat tungah kam thaak a: “Moab kumpipa in kei langpanin hong leedo hi; ama sim tu in kei nong pawm tu ziam?” ci in dongh hi.
Kumpipa Jehoshaphat in, “Hong pawm tu khi hi,” ci in zo hi. “Keima, ka mite le ka siphute, na dei babangin zeak in.
8 Ama ih sim natu koisung lampi tawn tu hi ziam?” ci hi.
“Edom duisung kaantan in a pai lam sau sia ih tawn tu hi,” ci in Joram in zo hi.
9 Tua ahikom Kumpipa Joram, Judah le Edom kumpipate ngamkuan uh hi. Ni sali a pai zawk uh ciang a tui neak tu uh bo a, mihingte atu ahizong, vanh pua ngannote atu ahizong bangma om nawn ngawl hi.
10 Kumpipa Jehoshaphat in, “Man sa hi hing!” ci hi. “ Topa in ei teng thum sia Moab kumpipa ii a uuk po hong vawt tu in hong koi hi!” ci hi.
11 Kumpipa Jehoshaphat in, “Ama tungtawnin Topa ih dok thei tu hi sungah kamsaang khat om hi ngawl ziam?” ci in dongh hi.
Kumpipa Joram ii ngalkap bu khat in, “Shaphat ii tapa Elisha hi sungah om hi. Ama sia Elijah ii khutdawn pa ahi hi,” ci in zo hi.
12 Kumpipa Jehoshaphat in, “Ama sia kamsaang maan khat hi,” ci hi. Tua ahikom kumpipate thum sia Elisha kungah pai uh hi.
13 Elisha in Israel kumpipa munah, “Banghangin nang hong hu tu khi ziam?” ci hi. “Na pa le na nu ii thudok tua kamsaangte dongh tu in va pai ta'n,” ci hi.
Joram in, “Hi ngawl hi, Topa in ko kumpi thum teng sia Moab kumpipa ii a uuk po hong law tu in hong koi sa hi,” ci in zo kik hi.
14 Elisha in, “A na ka sepsak a nungta Topa taw kiciam khi hi, na kipawl puipa Judah kumpipa Jehoshaphat ka zatak hang hi buale nang taw bangma kipee-aw nuam ngawl khi hi.
15 Tu in music thiam khat hong sam tavun,” ci in zo hi.
Music thiampa in a tengtongh hong tum tak ciang Topa ii vaangletna Elisha tungah hong pai a,
16 tuaciang, ama in, “Hi sia Topa pauna hi: ‘Hi luamko dung theampo ah dum to vun.
17 Vui ahizong ngua ahizong na mu mun uh a om ngawl hang, hi luam sia tui taw kidim tu a, noma, na ngannote uh le na vanh pua ngannote ii dawn tu kicing piikpeak tu hi,’ ” ci hi.
18 Tuaciang Elisha in zomto a, “Ahihang hisia in Topa sep tu in a ol mama nasep khat hi; Moab te zongh hong zosak lai tu hi.
19 Noma in amate ii a hoi mama a kip a kho in a vawt khuapi theampo na zothal tu uh hi; amate ii thingnga kung theampo phuktan in, a tuinaak teng kangsak tu nu hi, tuaciang, leipha a lo teng theampo suang dimsak in, na siasak tu uh hi,” ci hi.
20 A zing ciang zingsangin, sangaw biakpiakna vawt ngei hun laitakin, Edom sang pan tui hong luang a, lei khuum hi.
21 Tua kumpi thum teng amate sim tu in hong pai hunlam Moab te in a zaak uh ciang pa a minpiang ngalhiam toai thei theampo a moibel pan a haambel dong kiko in, ngamngi ah amate panmun la sak uh hi.
22 A zing ciang zingsang a thaw uh ciang, tui tungah ni hong taang a, tui sia chi bang a sanin kimusak hi.
23 “Chisan hi!” ci in amate in au uh hi. “Ngalte ngalkaphonpi thum sia amate le amate kido in kithat hi tu hi! A ngiaphual ah pai in phuul tawng,” ci uh hi.
24 Ahihang amate tua ngiaphual a thet uh ciang, Israel te in simin, not kik uh hi. Israel te in del tan in, Moab te that uh a,
25 a khuapite lalthamsak uh hi. Leipha lo khat pawpo a kaantan uh ciangin Israel mi simin tua lo sung teng theampo suang a dim dongin suang khat tek lawn uh hi; amate in ciktui naakte zongh kangsak in, thingnga kungte phuk uh hi. A khakbel ciangin Kir Heres khuapi bek taanglai a, tuaciang saili kapte in uumci in sim uh hi.
26 Moab kumpipa in a ngallelna a phaw tak ciang ama in namsau zangh thiam mihing 700 taw a ngalte kawm panin Syria kumpipa kungah suatak tu hanciam ahihang, suak zo ngawl hi.
27 Tua ahikom ama in ama za laih tu a tapa lianbel sia la in, khuapi luphung tung pan Moab pathian tungah sangaw biakpiakna in pia hi. Israel te sia lau ngawp ahikom tua khuapi pan nungkin in amate ngam ah heak kik uh hi.