4
Elisha in a Zawng Meingong Nu khat Hu
1 Kamsaang honkhat sung a kihel khat ii zi meingong nu sia Elisha kungah pai in, “Topa awng, ka pasal thi zo hi! Na heak bangma in ama sia Pathian kiita pasal khat hi, ahihang tu in a leibatna pasal khat in, ka pasal ii leiba taangin ka tate nii sila in a la tu hong pai zo hi,” ci in son hi.
2 Ama in, “Nang atu bang hong vawtsak tu khi ziam?” ci in dongh hi. “Inn ah bang nei ni ziam, hong son ta'n,” ci hi.
Ama in, “Olive thau thawl khat simngawl a dang nei mama ngawl khi hi,” ci in zo hi.
3 Elisha in, “Na innpaamte kungah va pai ta'n a, bealhawm a tam thei zaza zawng in,” ci in sawl hi.
4 “Tua zawkciang nangma le na tapate inn sungah tum in, kongkha khak vun a, bealte ii sungah sathau sung tavun. Khat a dim simin a hui ah heam vun,” ci hi.
5 Tua ahikom nupi nu in a tapate taw inn sungah tumin, bangkua a kha zawkciang olive thau a om thawlno sia la in a tapate ii hong paipui bealte sungah sathau sungsuk hi.
6 Amate in bealte a dip siat zawk uh ciang nupi nu in a dang a om lai ziam ci in dongh hi. A tapate khat in, “Tuasia a khakbel hi,” ci in zo hi. Tuasia ciang olive thau luang nawn ngawl hi.
7 Ama kamsaangpa Elisha kungah pai kik a, kamsaang pa in ama munah, “Olive thaute zuak tavun a, na leiba theampo lo tavun, tuaciang nang le na tapate kivaak khom natu in sum a khomkhat ma hong vaal lai tu hi,” ci hi.
Elisha le Shunem pan Nupi Hau Khat
8 Ni khat ni in nupi hau khat ii a teenna Shunem khua ah Elisha haw hi. Ama in kamsaang pa an ne tu in sam a, tuasia pan kipan Shunem ah a pai simin ama inn ah an ne hi.
9 Ama in a pasal munah, “Hi sungah hong pai tawntung pasal sia mi thiangtho khat hi vangiat tu hi.
10 Innkhum tungah inndoino khat vawtsak in, lupna khat, sabuai khat, tokhum khat le meiinn khat tua inndoi sungah koisak tawng, ama hong haw simin tua munah om thei tu hi,” ci hi.
11 Ni khat ni ciang Elisha sia Shunem ah hong zuan kik a, toitang tu in a inndoi ah kaato hi.
12 Ama in a naseampa Gehazi sawl in, nupinu samsak hi. Tua nu hong pai ciang,
13 ama in Gehazi munah, “Ei ii ih kitaangsap teng hong sik natu hong ngim law hu in ama atu bang ka vawtsak thei tu ziam ci in dongh in. Kumpipa tungah ahizong ngalkaphonpi ukpa tungah ahizong ama atu kampha khat po sonsak le hong oai hi tha tu hi,” ci hi.
Tua nu in, “Hi sungah ka mite kawmah ka kisap theampo nei khi zam,” ci hi.
14 Elisha in Gehazi munah, “Tua ahile ama atu bang vawtsak thei tu khi ziam?” ci dongh hi.
Ama in, “Pha hi, tua nu in tapa nei ngawl a, a pasal le huai zo hi,” ci hi.
15 Elisha in, “Ama hi sungah hong pai natu son in,” ci in thupia hi. Ama hong pai a, bangkua ah hong ding hi,
16 tuaciang Elisha in ama munah, “Mai ciang tubang hun in tapa khat na khut sungah toai tu ni hi,” ci hi.
Ama in, “Oh! Topa awng nong hesuakna in leilot thu hong son heak in. Nang sia Pathian mihing khat na hi hi!” ci hi. Ref 4:16 Pian 18:4
17 Ahihang Elisha ii ci bangin a mai kum tua hun khawng ciangin ama in tapa khat hing hi.
18 Kum tawmvei zawkciang anlaak hun laitakin, patangno sia zing khat, a pa kung zuan tu in pusuak hi, a pa sia lo sungah an late taw diang hi.
19 Thakhatin patangno sia in a pa tung ah, “Ka lutang na hi! Ka lutang na hi!” ci hi.
A pa in, “Patangno sia a nu kungah na puak ta'n,” ci in naseam khat sawl hi.
20 Naseam pa in patangno sia a nu kungah puak kik a, a nu in ni sun dong a kaang sungah toai hi, tua hunsung in a ta thi hi.
21 A nu in patangno sia Elisha ii inndoi ah toai to in lupna tungah sial a nusia hi, tuaciang kongkha khak hi.
22 Tua zawkciang ama in a pasal samin, ama munah, “Naseamte khat hi sungah laa taw hong paisak ta'n. Kamsaang pa Elisha kungah ka pai kul tu hi. A manlang thei belin hong heak kik tu khi hi,” ci hi.
23 “Banghang tu ni na pai kul tu ziam? Tu ni sia Sabbath le hi ngawl Thathak Poai ni le hi ngawl hi,” a pasal in ci hi.
Tua nu in, “Pha maw bo,” ci in zo hi.
24 Tuaciang ama in laa kungh thuasakin, naseampa tung ah, “Laa sia a manlang thei za in paisak in, keima kong sawl ngawl po haisak heak in,” ci in thupia hi.
25 Tuabangin ama vaiding in Elisha ii omna Carmel Mual ah pai hi.
Ama ii hong pai sia Elisha in a khuala thithim na pan mu a, a naseampa Gehazi munah, “En in — zia sungah Shunem pan nupinu hong pai hi!
26 Manlang in va pai ta'n a, ama ahizong a pasal ahizong a tapa ahizong a dam tek ziam, va dawp ta'n,” ci hi.
Nupinu in Gehazi munah na theampo pha hi ci hi,
27 ahihang Elisha kung a thet ciang a mai ah kun sukin a peangte pom hi. Gehazi in ama sawn tu in kithoai ahihang Elisha in, “Koi po in. Ama nasia takin a thin hee ahi hunlam mu thei ngawl ni ziam? Tuaciang Topa in a thu khat zong kei hong son ngawl het hi,” ci hi.
28 Nupi nu in ama tungah, “Topa awng, tapa khat nang tungah hong ngen kana khi ziam? Lametna saangpi ka nei thaak tu in hong hi heak in hong ci hi ka na ngawl khi ziam?” ci hi.
29 Elisha sia Gehazi sangah kiheakin, ama munah, “Manlang in! Ka ciangkhut la in va pai ta'n. Lampi ah na kisik pui pawpo paupui tu in tawlnga heak in, tuaciang khat po in hong paupui le zong ama na zo kik natu hun bosak heak in. A inn ah tangtan in va pai ta'n a, patangno sia tungah ka ciangkhut va nga ta'n,” ci hi.
30 Nupi nu in Elisha munah, “A nungta Topa tung le nang tungah ka thumaanna taw kiciam khi hi, nang hong nusia ngawl tu khi hi!” ci hi. Tua bangin amate nii hong heak kik khawm uh hi.
31 Gehazi sia mai ah paikhol a, Elisha ciangkhut sia patangno ii tungah nga ahihang bangma a nging le om ngawl, nuntakna lim a dang le a om bua hi. Tua ahikom ama Elisha taw kimu tu in hong pai kik a, tuaciang, “Patangno sia khanglo ngawl hi,” ci hi.
32 Elisha hong thet ciangin, ama nguak inndoi sungah hong tum a, patangno a lupna tungah a thisa in mu hi.
33 Ama in kongkha khak in Topa tungah thu ngen hi.
34 Tua zawkciang ama in patangno tungah boksuk a, a kam le a kam, a mit le a mit, a khut le a khut kisisak hi. Tuabangin patangno ii tungah kizanin a om ciang patangno ii ci lum tu in hong kipan hi. Ref 4:34-35 1 Kum 17:21
35 Elisha tho a, inndoi sung tengah vakin, tua zawkciang hong pai kik a, patangno ii tungah khatvei ma kizan kik hi. Patangno sia salivei hetchia lo a, tua sia zawkciang a mit hak hi.
36 Elisha in Gehazi sam in, patangno ii nu sam a sawl hi. A nu hong sungtan ciang ama in, “Hi sungah, na tapa om hi!” ci hi.
37 Ama in Elisha peang ah boksuk a, a mai lei phasak hi; tua zawkciang a tapa la in paisan hi.
Nalamdang Lakna A dang Niite
38 Khatvei lai, ngam bup sungah kialpi khat a tun lai in Elisha sia Gilgal ah heak kik hi. Ama in kamsaangte honkhat a hil laitakin, a naseampa munah amate atu bealpui khat taw mei tungah sa tuihuan in sawl hi.
39 A naseamte khat lo sungah ngamh an pawlkhat la in pai hi. Ama in uum ngui khat mu a, uum nga a puak zawk za lo hi. Ama in tuate ciapui in bang ziam ci in he ngawl bul ma in, a sem zawkciang satui sungah tha hi.
40 Pasalte neak tu in satui thuuk hi, ahihang amate in a tep po uh ciang, Elisha munah “Hisia ngu kisaw hi!” ci in a ne bua uh hi.
41 Elisha in, an tawm ngenin beal sungah tha hi, tuaciangin ama in, “Amate ii neak tu satui tawm thuuk thua lai vun,” ci hi. Tua zawkciang satui sia bangma siat huai nawn ngawl hi.
42 Hun dang khat ciang, Baal Shalishah panin pasal khat hong pai a, tua kum in a lak anpal mangtaang taw a vawt anluum luum kul le a balh tawm vaimim ngap pawlkhat hong paipui hi. Elisha in a naseampa munah tua kamsaangte, tuate taw vaakin sawl hi,
43 ahihang naseampa in, “Mihing zakhat atu hi teng kikhom tu in um ni ziam?” ci in zo hi.
Elisha in, “A neak tu in amate pia in, banghang ziam cile amate in ne tu a, a neak vaal zongh om tu hi, Topa in ci hi,” ci in zo kik hi.
44 Tua ahikom a naseampa in an lui a, tuaciang Topa ii ci bangma in, amate theampo in ne a, pawlkhat vaal lai hi.