2
Elijah Vantung ah Kila to
1 Elijah sia suumpei taw vantung ah Topa ii a laakto tu hun hong theng hi. Elijah le Elisha sia Gilgal panin vaiding a,
2 tuaciang, a lampai kawmin Elijah in Elisha tungah, “Tu in hi sungah na om in; Topa in Bethel ah pai in hong sawl hi,” ci hi.
Ahihang Elisha in, “Nang hong nusia ngawl tu khi hi, ci in a nungta Topa tung le nang tungah ka thumaanna taw kiciam khi hi,” ci in zo hi. Tua ahikom amate Bethel ah paisuak uh hi.
3 Tua munah a teang kamsaang honkhat in Elisha kungah pai in, “ Topa in na topa sia tu ni in nang kung pan la tu ahi hunlam na he ziam?” ci in dongh uh hi.
Elisha in, “Hi hi, he khi hi. Ahihang tua thu son bua tawng,” ci in zo hi.
4 Tuasia ciang Elijah in Elisha munah, “Tu in hi sungah na om in; Topa in Jericho khua ah pai in hong sawl zo hi,” ci hi.
Ahihang Elisha in, “Nang hong nusia ngawl tu khi hi, ci in a nungta Topa tung le nang tungah ka thumaanna taw kiciam khi hi,” ci in zo hi. Tua ahikom amate Jericho ah paisuak uh hi.
5 Tua munah a teang kamsaang honkhat in Elisha kungah pai in, “ Topa in tu ni in na topa nang kung pan la tu ahi na he ziam?” ci in ama dongh uh hi.
Elisha in, “Hi hi, he khi hi. Ahihang tua thu son bua tawng,” ci hi.
6 Tuasia zawkciang Elijah in Elisha munah, “Tu in hi sungah na om in; Topa in kei Jordan ngun ah pai in hong sawl hi,” ci hi.
Ahihang Elisha in, “Nang hong nusia ngawl tu khi hi, ci in a nungta Topa tung le nang tungah ka thumaanna taw kiciam khi hi,” ci hi. Tua ahikom amate paisuak a,
7 kamsaangte sung pan 50 in amate Jordan dong zui uh hi. Elijah le Elisha te ngun hui ah tawlnga in, a kamsaang 50 teng sia tawm a kikhuala na ah ding uh hi.
8 Tuaciang Elijah in a puantual suutin, a zial zawkciang tui saatna in nei hi; tui hong kikhen a, ama le Elisha in a langkhat ah leiko tung tawnin kaantan uh hi.
9 Tuaciang, Elijah in Elisha munah, “Kei hong kilaak ma in nang atu bang kong vawtsak tu dei ni ziam hong son ta'n,” ci hi.
Elisha in, “Na zaa kong laih thei natu in na vaangletna tel ka saan tu za ( a zaa nii ) hong ngasak ta'n,” ci hi. note 2:9\xk za laihpa: Elisha in Elijah munah taciil ii a pa tung pan upadi ngeina bangin a nga tu za ngamh ngen hi. (En in. Thkna 21:17).\x*
10 Elijah in, “Tuasia piak tu a haksa mama ngetna hi,” ci in zo kik hi. “Ahihang nang kung panin kei hong kilaak nong mu le, tua ngetna sia na nga tu hi; nong mu buale na nga buatu hi,” ci hi.
11 Amate lam a pai kawmin thu son uh hi; tuaciang thakhat thu in meikuang siphute ii kai meikuang siphu ngalleang khat amate nii kilaklaw ah hong pai a, Elijah sia vantung ah suumpei in kaato pui hi.
12 Elisha in mu in, Elijah oksan a, “Ka pa, ka pa! Israel a dal a thahat pa! Nang pai zo hi teh!” ci hi. Tuaciang ama in Elijah mu kik nawn ngawl hi.
Elisha khuangai in a puantual eau a khen nii sua hi. Ref 2:12 2 Kum 13:14
13 Tuaciang hong taaksuk Elijah ii puantual sia tawm in hong heak kik a, Jordan ngun vaal ah ding hi.
14 Ama in nguntui sia Elijah ii puantual taw vaat a, “Elijah ii Pathian Topa a koi sungah om ziam?” ci hi. Tuaciang ama in tui vaat kik in, tui hong kikhen a, ngun langkhat ah pai hi.
15 Jericho pan kamsaang 50 teng in ama mu a, “Elijah ii vaangletna Elisha tungah om hi!” ci uh hi. Amate pai a, ama taw kisi in, a mai ah kun uh hi,
16 tuaciang, “Hi sungah a thahat tingtengh pasal sawmnga om khu hi. Na topa zong tu in pai tek tawng. Topa ii thaa in ama paipui a, mualtung khat, luam sung khat po ah nusia hi tha tu hi,” ci uh hi.
Elisha in, “Hi ngawl hi. Pai ngawl het tu nu hi,” ci in zo hi.
17 Ahihang amate a thukim dawdong a nget uh ciang paisak hi. Sawmnga teng in mun saang mun niamna ah Elijah sia ni thum sung zong ahihang mu ngawl uh hi.
18 Tuaciang Jericho ah amate ngakin a om Elisha kungah hong heak kik ciang, ama in, “Pai heak vun kong ci ma hi ngawl ziam?” ci hi.
Elisha ii Nalamdang Laknate
19 Jericho panin pasal pawlkhat Elisha kungah pai a, “Na heak bangma, topa awng, hisia in khuapi pha khat hi, ahihang a tui pha ngawl a, nau tolsak thei hi,” ci uh hi.
20 Ama in, “Kuang thak khat sungah ci tawm hong paipui tavun,” ci in thupia hi. Amate in ama kungah tuasia paipui uh hi,
21 tuaciang ama in cik ah pai in, tui sungah a ci lawn a, “Hisia Topa ii kammal hi: ‘Tui hisia thiangthosak khi hi, tua tui in thina ahizong, nautolna ahizong piangsak nawn ngawl tu hi,’ ” ci hi.
22 Tuaciang tua tui Elisha ii son bangma in tua hun pan kipan thiangtho hi.
23 Elisha in Jericho nusia in Bethel ah a pai le, patang pawlkhat khua khat panin hong pusuak in, ama ciammuina in nei a, “Hi sung pan tai in, lutol pa awng,” ci in oksan uh hi.
24 Elisha hong kingeilee in, amate salh a, Topa min taw haamsiat hi. Tua zawkciang vompui nii duisung pan hong pai in, patangte sung pan 42 laaitham uh hi.
25 Elisha Carmel Mual ah kaato a, tua zawkciang Samaria ah heak kik hi.