13
1 Topa ii sawlna taw Judah panin kamsaang khat Bethel ah hong pai a, sangaw biakpiakna pia tu in Jeroboam biaknatau mai ah hong din laitak hong theng hi.
2 Topa ii sawlna zui in kamsaangpa in biaknatau sia siat son hi: “Oh biaknatau, biaknatau awng, hisia Topa ii pauna hi: David ii bangkua sungah Josiah a kici nausen khat hong piang tu hi. Ama in doai biaknataute tungah seam in nang tungah sangaw biakpiakna a vawt thiampite nangma tungah that tu a, mihing ngute nang tungah hal tu hi,” ci hi. Ref 13:2 2 Kum 23:15-16
3 Tuaciang kamsaang pa in a ci lai na pan, “Hi biaknatau sia cimhtham tu a, a tungah vutte kithezau tu hi. Tuasia ciang Pathian in kei tungtawn a hong pau zo hi ci in na he tu hi,” ci hi.
4 Kumpipa Jeroboam in hi thu a zaak ciang ama kawkin thupia hi: “Pasal ziasia man vun!” Thakhat thu in kumpipa ii baan zaw a, dok kik thei nawn ngawl hi.
5 Thakhat thu in biaknatau sia cimhtham a, Topa min taw kamsaang pa ii sonkhol bangma in vutte lei ah kithezau hi.
6 Kumpipa Jeroboam in kamsaangpa munah, “Ka khut hong damsak natu in Topa na Pathian tungah nong hesuak na in thu hong ngetsak ta'n!” ci hi.
Kamsaang pa in Topa tungah thu a nget le kumpipa baan dam hi.
7 Tuasia ciang kumpipa in kamsaangpa munah, “Kei taw cia khawm in bang khat po ne tawng. Na sepsa te hu in thaman hong pia tu khi hi,” ci hi.
8 Kamsaangpa in, “Na hauna a lang keak nong pia hial tu ahizong nang taw paikhawm ngawl tu khi hi, ahibuale zong nang taw bangma ne ngawl dawn ngawl tu khi hi,
9 Topa in bangma ne ngawl dawn ngawl tu in thu hong pia a, kong paina lampi tawnin a ciakik ngawl tu in hong sawl hi,” ci in zo hi.
10 Tua ahikom ama in a paina lampi pan ciakik ngawlin lampi dang khat tawn hi.
Bethel pan Kamsaang Huaipa
11 Tua hun laitakin Bethel ah a teang kamsaang pasal huai khat om hi. A tapate hong pai a Judah pan a kamsaang khat ii Bethel ah a ngamtatna teng le Jeroboam kumpipa tungah a pauna teng ama munah son hi.
12 “A heakkik ciangin koisung tawn ziam” ci in kamsaang huaipa in amate dongh hi. Amate in a lampi lak a,
13 tuaciang amate in a laa kungh thuasak in sawl hi. Amate in a sawl bang a vawt zawk uh ciang ama sia laa tungah to in pai a,
14 Judah panin kamsaang pa ii nung pan a zui le oak thingkung nuai khat ah a to mu hi. “Nang Judah pan a kamsaangpa na hi ziam?” ci in dongh hi.
“Hi khi hi,” ci in pasalpa in zo hi.
15 Ama in, “Inn ah cia in, kei taw an nekhawm tawng,” ci hi.
16 Ahihang Judah panin kamsaangpa in “Nang taw cia khawmin nong zindo nopna hong saang zo ngawl tu khi hi, tuaciang hilai ah nang taw bangma nekhawm ngawl tu khi hi,
17 banghang ziam cile Topa in bangma ka neak ka dawn ngawl natu le ka paina lam tawnin ka cia kik ngawl natu thu hong pia hi,” ci in zo hi.
18 Tuasia ciang Bethel pan kamsaang huai pa in ama munah, “Kei zongh nangma bangma kamsaang khat khi hi, tuaciang Topa ii sawlna taw vantunglalang khat in nang sia inn ah ciapui in zindo in hong sawl hi,” ci hi. Ahihang kamsaang huai pa sia leilot thu son ahi hi.
19 Tua ahikom Judah pan kamsaangpa sia kamsaang huaipa taw ciakhawm in ama taw an nekhawm hi.
20 Sabuai ah an ne in a to laitak Topa kammal sia kamsaang huai pa tungah hong theng hi,
21 tuaciang ama in tua Judah kamsaang pa tungah, “ Topa in ama ii thu ni ngawlin, a thupiak bang seam ngawl hi hong ci hi.
22 Tua taangin na heakkik a, an ne ngawl a hong sawlna munah tumin an na ne hi. Hi sia hangin nang sia thalup na thuak tu a, na luang sia na innkuan thaan ah kivui ngawl tu hi,” ci in au hi.
23 Anneak zawkciang kamsaang huai pa in Judah pan kamsaangpa atu a laa kungh thuasak a,
24 ama sia laa tungah tosak hi. Lampi ah tawpi khat taw kisi a, tawpi in ama thatlum hi. A luang sia lampi tungah kisial a, a laa le tawpi te sia a luang hui ah ding uh hi.
25 Mihing pawlkhat in tua mun hong kaantan a, lampi tungah a luang mu uh hi, tawpi sia a kungah dingin om hi. Amate sia Bethel ah paisuak in, amate ii mu teng son hi.
26 Kamsaang huai pa in tua thu a zaak ciang, ama in, “Tuasia Topa ii thupiakna a ni ngawl kamsaang pa hi! Tua ahikom Topa in ama a that tu in tawpi paisak hi, Topa ii ka vawt tu a ci bangma in kivawt hi,” ci hi.
27 Tuasia zawkciang a tapate munah, “Ka laa kungh hong thuasak tavun,” ci hi. Amate in tuabangin seam uh a,
28 tuaciang ama laa tungah to in a pai le kamsaang pa ii luang lampi ah kisial in mu hi, laa le tawpi zongh a kungah dingkhawm nginge lai hi. Tawpi in mithi luang le ne ngawl a, laa zongh bangma law ngawl hi.
29 Tua tungtangin a khuangai natu le a phum natu in kamsaang huai pa in a luang phaam a, laa tungah suanin Bethel ah ciapui hi.
30 Ama in a innkuan thaan ah phum a, tuaciang ama le a tapate khuangai in, “Oh, ka suapui, ka suapui awng!” ci hi.
31 A phum zawk uh ciang, kamsaangpa in a tapate munah, “Ka thi ciangin hi thaan sungah ama ii luang hui ah hong phum tavun.
32 Topa ii thupiakna taw Bethel ah biaknatau le Samaria khuate sungah a biakna munte langpanin a pau teng sia tung takpi tu hi,” ci hi.
Jeroboam ii Lalna piangsak Mawna
33 Israel kumpipa Jeroboam in ama tatsiatnate kheal tuan ngawl a, ama saksa biaknataute ah thiampi seam tute sia bangkua thawthongte panin teal lai hi. Ama in thiampi a uuk pawpo thiampi in koi hi.
34 Hi mawna in siatna le ama ii kinguizui kumpi ukna a bo cimitna suak hi.