14
Jeroboam ii Tapa Thina
1 Tua hun laitakin Kumpipa Jeroboam ii tapa Abijah a ciina hi.
2 Jeroboam in a zi munah, “Nangma le nangma, kuama ii hong tel ngawl natu in kimealseal in a, kei sia Israel kumpipa suak tu hong ci, Shiloh a teang kamsaangpa Ahijah kungah va pai ta'n.
3 Anluum luum sawm, moh pawlkhat le khuaitui thawl khat va puak ta'n. Ih tapa bang suak tu ziam ama munah dongh ta'n, hong son tu hi,” ci hi.
4 Tua ahikom ama Shiloh khua Ahijah inn ah pai hi. Khanghaam zo ahikom Ahijah sia a mittaw hi.
5 A tapa ciina sia huvau dongh tu in Jeroboam ii zi sia ama kungah a pai tu hunlam Topa in son zo hi. Tuaciang Topa in Ahijah ii pau natu teng hil zo hi.
Jeroboam ii zi hong thet ciangin, ama sia ngualdang khat bangin hong kivawt tawm hi.
6 Ahihang Ahijah in ama ii bangkua sung sangah hong tum a zaak ciang, “Hong tum ta'n, Jeroboam ii zi na hi sia hong he khi hi. Midang khat bangin banghangin kithoai ni ziam? Nang atu thupha ngawl kong son tu nei khi hi.
7 Pai in a Jeroboam munah va son ta'n, Israel ii Pathian Topa in ama tungah hi bangin ci hi: ‘Mite sung pan nang kong teal a, ka Israel mite uk pa in kong koi hi.
8 David suan le paalte khut sung panin kumpi ngam ka lakeak a, nang kong pia hi. Ahihang nang sia ka naseampa David bang na hi bua hi, ama sia kei tungah hong thumaan tinten a, ka thupiakte ni in, ka thukim teng bek seam hi.
9 Nang in na mai a ngamukte sangin mawna lianzawte na vawt hi. Nang in kei nong nial a, tuaciang ka thin uuk natu in milimte vawtin thik milimte na biak tu in na vawt hi.
10 Hi sia hu in na kumpi khang zui in tuasiatna kong tungsak tu a, tuaciang na suan na paal sung panin pa a minpiang a moi a haam a kibangin ka thatlum siat tu hi. Na bangkua kong heam tu a; eak bangin kiphiat keak tu hi. Ref 14:10 1 Kum 15:29
11 Khuapi sungah a thi na innkuanpuite sa sia ui in ne tu a, ngam taanzauna a thite sa sia vaciik in ne tu hi. Keima, Topa in pau zo khi hi,’ ” ci hi.
12 Tuaciang Ahijah in Jeroboam ii zi tungah a ci lai na pan, “Tu in inn ah cia ta'n. Khua sung na tum po ciangin na tapa thi tu hi.
13 Israel mi bup in ama atu khuangaina lakin phum tu hi. Jeroboam bangkua sung pan ama bekma pha takin kivui tu hi, banghang ziam cile ama ii tung bekma ah Israel ii Pathian Topa lungkim hi.
14 Topa in Israel te tungah kumpi khat koi tu a, ama in Jeroboam ii kumpi khangngui sia bosak tu hi.
15 Topa in Israel daan pia tu a, tuaciang lui sungah pumpate bangin ngawk tu hi. A taanghpupite tungah a piaksa hi leitang phate tung panin ama in Israel mite zunglok tu a, Euphrates ngun kalhin thethaang tu hi, banghang ziam cile amate in Asherah numeipathian sia ii limte a vawt hu in ama a thin uuksak hi.
16 Topa in Israel taisan tu hi banghang ziam cile Jeroboam in mawna vawt a, Israel mite mawna sungah lampui hi.”
17 Jeroboam ii zi sia Tirzah ah ciakik hi. A inn sung a tum bek lian ciangin a tapa thi hi.
18 A naseam pa, kamsaangpa Ahijah tungah Topa ii sonkhol bangma in Israel mite ama atu khuangai in phum hi.
Jeroboam ii Thina
19 Jeroboam ii sep le vawt a dang theampo, a ngal dona ahizong a uk zia ahizong Israel kumpite ii Taanghthu sungah kikhum hi.
20 Jeroboam in kum 22 sung kumpi in maang hi. Ama thi in kiphum a, a tapa Nadab in a kumpi za laih hi.
Judah Kumpipa Rehoboam
(2 Khangtaanghthu 11:5—12:15)
21 Solomon ii tapa Rehoboam sia Judah kumpipa a sua lai in, kum 41 pha hi, tuaciang Israel ngam bup sungah Topa a kibiak natu mun Topa ii tealsa Jerusalem khuapi pan kum sawm le kum sali uk hi. Rehoboam ii nu sia Ammon panin Naamah ahi hi.
22 Judah mite in Topa tungah maw a, ama thin uuk natu in a taanghpupite theampo ii vawt sangin a tamzaw in vawt uh hi.
23 Amate in pathian theamte biak natu in biakna munte vawt a, mualtung le thinglim nuaite ah biak tu in Asherah limte le suangkhuamte phut uh hi. Ref 14:23 2 Kum 17:9-10
24 A siatbelna sia, tua doai biakna munte ah numeite le pasalte sia pumpi zuakin om uh hi. Israel mite ii tua ngamsung a zot uh lai in Topa ii a nawkeak mite ii a maizumhuai ngamtatnate ma Judah mite in ngamtatna in nei uh hi. Ref 14:24 Thkna 23:17
25 Rehoboam ii uk zawk a kum ngana ciangin Egypt kumpipa Shishak in Jerusalem sim hi. Ref 14:25 2 Khang 12:2-8
26 Ama in Biakinnpi sung le kumpi inn sung a sumngum theampo la siat hi, tuate sungah Solomon ii vawt sa khamh lumte zongh kihel hi. Ref 14:26 1 Kum 10:16-17; 2 Khang 9:15-16
27 Tuate taangin Kumpipa Rehoboam in taau lumte vawt a, kumpi inn kongkhacing uliante tungah a kepcing tu in aap hi.
28 Kumpipa Biakinnpi ah a pai simin a cingte in tua lumte paipui in, tua zawkciang a cingte omna inndoi ah ciapui kik uh hi.
29 Kumpipa Rehoboam ii sep le vawt dangte theampo sia Judah Kumpite Taanghthu sungah kikhum hi.
30 Hi hunte theampo sungah Rehoboam le Jeroboam sia a tawntungin khat le khat kido uh hi.
31 Rehoboam thi a, David Khuapi sung kumpi thaan ah kiphumin, a tapa Abijah in a kumpi za laih hi.