12
Saksang Namte Tualngal Tho
(2 Khangtaanghthu 10:1-19)
1 Rehoboam sia Shechem ah pai a, tua munah Israel saksang mite theampo in ama kumpi suaksak tu in kikhawm uh hi.
2 Solomon kumpipa khut sung pan suakta tu in Egypt ngam ah a tai Nebat ii tapa Jeroboam in hi thu za a, Egypt ngam panin ama cia kik hi.
3 Saksang namte sung pan mite in ama samsak hi, tua zawkciang amate theampo Rehoboam kungah pai in ama tungah,
4 “Na pa Solomon in ko hong siat vawt a, vanhngit pi hong suan hi. Hi vanhngitte nong zaangsak a, nuntakna a ol zawhiat tu in nong vawt le ko sia a thumaan na uk sung mite hi tu khu hi,” ci uh hi.
5 “Ni thum zawkciang hong pai kik tavun, hong zo kik tu khi hi,” ci in ama in zo hi. Tua ahikom amate in nusia hi.
6 Kumpipa Rehoboam in a pa Solomon ii thudok uhaamzawte dongh hi. Ama in, “Hi mite tungah bangbangin zo tu khi ziam?” ci in dongh hi.
7 Amate in, “Hi mite atu a pha in a na na sepsak nuam le amate ii hong ngetnate tungtaang ah zawp in, tua hile amate in thumaan takin nang na hong sepsak tawntung tu hi,” ci in zo kik hi.
8 Ahihang ama in uhaamzawte ii ngaisut piakna sia melsia a, ama taw a khangkhawm, tu in a thudokin a koi khangmoite kungah pai zaw hi.
9 Ama in, “Ka ngamtat natu in bangbangin ngaisutna hong pia tu nu ziam? A vanhngit uh zaangsak zaw tu in hong ngen mite tungah bangbangin ci tu khi ziam?” ci in dongh hi.
10 Amate in, “Amate tungah hi bangin ci in: ‘Ka khutme nobel sia ka pa kawng sangin lian zaw hi!’
11 Amate tungah, ‘Ka pa in no, vanhngit hong suan hi; keima in tua sangin ngitsak zaw lai tu khi hi. Ama in khauhual kibul ciang taw hong saat hi; kei ka hi le siphu saatna taw hong vel tu khi hi va ci ta'n!’ ” ci in zo kik hi.
12 Ni thum zawkciang Jeroboam le mipite theampo Kumpipa Rehoboam kungah ama ii sawl bangin hong heak kik uh hi.
13 Kumpipa in uhaamzawte ii ngaisutna piakte melsia in tua mite tungah,
14 khangmoite ii ngaisut piak bangin aw ham taw pau hi. Ama in, “Ka pa in no vanhngit hong suan hi; tuate sangin a ngit zaw lai in ka vawt tu hi. Ama in khauhual kibul ciang taw hong saat hi; kei ka hile siphu velna taw kong vel tu hi!” ci hi.
15 Shiloh panin kamsaang Ahijah tungtawn a, Nebat tapa Jeroboam tungah a sonsa, Topa ii deina sia a taangtun natu in a pau ahi hi. Hisia hu in kumpipa in mipite bangma thudon ngawl hi.
16 Mipite in kumpipa ii a thudon ngawl a mu uh ciang in amate au hi. David le a innkuante kiamsuk tahen! Ei atu amate in bang hong vawtsak ngei na ziam? Israel mite awng, cia lel tawng! Rehoboam sia ama le ama kikeam tahen!” ci uh hi. Ref 12:16 2 Sa 20:1
Tua ahikom Israel mite tualngal tho a,
17 Rehoboam sia Judah ngam khen sungah a teang mite bek ii kumpipa tu in nusia uh hi.
18 Tua zawkciang Kumpipa Rehoboam in zawthawk thu taw a kisawl naseamte a uk Adoniram samin Israel te kungah paisak hi, ahihang amate in Adoniram suang taw deanglum uh hi. Tuasia ciang Rehoboam sia a siphu ngalleang tungah manlang takin kaato a, Jerusalem khua ah suakta hi.
19 Tua hun pan kipan Israel saksang kumpi ngammite in David ii kumpi nam sia leedo tan uh hi.
20 Israel mite in Jeroboam sia Egypt pan hong ciakik zo ci in a zaak uh ciang, amate in mipite kikhopna khat ah sam in, Israel kumpipa suaksak hi. Judah nam bek David ii suan le paalte tungah thumaan lai uh hi.
Shemaiah ii Kamsaanna
(2 Khangtaanghthu 11:1-4)
21 Rehoboam sia Jerusalem khua a thet ciangin ama in Judah nam le Benjamin namte sung pan ngalkap phabel 180,000 sam hi. Ama in saksang Israel namte simin uk kik sawm hi.
22 Ahihang Pathian in kamsaang pa Shemaiah kungah,
23 Rehoboam, Judah le Benjamin namte theampo tungah hi thu puakin sawl hi:
24 “Na suapui tilteal ahi Israel mite sim heak vun. Na vekpi inn ah cia kik vun. Thu piang sa sia keima ii deina hi,” cisak hi. Amate in Topa ii thupiakna mang siat in inn ah cia kik uh hi.
Jeroboam in Topa Nungngat
25 Israel kumpipa Jeroboam in Ephraim mualtung ngam ah Shechem khua kulh taw uumin tua munah tawmvei teang hi. Tua zawkciang ama in tua mun nusia in Penuel khua ah kulh vawt hi.
26-27 Ama le ama hi bangin kici hi, “Tu a thu omzia bangin ka mite Jerusalem khua ah pai in Topa atu sangaw biakpiaknate tua mun Biakinnpi sungah vawt thong le amate in Judah kumpipa Rehoboam panpui leleau tu a, kei hong that tu hi.”
28 Khua a ngai susut zawkciang ama in khamh khuital no nii ii lim vawtin a mite tungah, “Biakna vawt tu in Jerusalem ah na pai zawk uh ngei zo hi. Israel mite awng, hi sungah Egypt pan hong pusuasak na pathiante om hi!” ci hi. Ref 12:28 Pu 32:4
29 Ama in a khamh khuital note khat Bethel ah koi a, khat sia Dan ah koi hi.
30 Tuabangin mipite in biakpiakna pia tu in Bethel le Dan ah a pai hu in maw uh hi.
31 Jeroboam in mualdawnte ah biak natu munte zongh vawtin, Levi nam ahi ngawl innkuante sung panin thiampite teal hi.
Bethel ah Biakpiakna Kipuavawk
32 Judah poaipi taw kibangin Jeroboam in biakna poaipi khat zongh tha liat tha, ni sawm le ni nga ni in phuan hi. Ama in Bethel biaknatau tungah a khamh khuitalno a vawtte a tu in biakpiaknate pia a, ama saksa Bethel biakna tu munte ah a seam tu in thiampite koi hi.
33 Tuaciang tha liatna ni sawm le ni nga ni, ama ii see ni in, ama Bethel ah pai a. Israel te atu ama ii phot tawm poai khaamsak in biaknatau tungah sangaw biakpiakna khat pia hi. Ref 12:32-33 Thiam 23:33-34