11
Solomon in Pathian Nungngat
1 Solomon in ngamdang numeite tam ma it hi. Egypt kumpipa ii tanu bek hi ngawl, Hit, Moab, Ammon, Edom le Sidon pan numeite teenpui hi. Ref 11:1 Thkna 17;17
2 Topa in Israel te sia hi mite taw a kiteen ngawl natu thupia hi, banghang ziam cile tua mite in Israel mite sia pathian dangte tungah thumaan zaw tu ahi hang hi, tua hi napi ama in amate teenpui hi. Ref 11:2 Pu 34:16; Thkna 7:3-4
3 Solomon in kumpi tanute 700 teenpui a, zino 300 nei si hi. Amate in Solomon sia Pathian nung ngat in omsak hi,
4 tuaciang a khanhaam hun ciangin amate in ngamdang pathiante biakna sungah tumpui hi. Ama in Topa a Pathian tungah a pa David ii thumaan bangza in thumaan ngawl hi.
5 Ama in Sidon te ii numeipathian Astarte, tuaciang Ammon te ii a thasiathuai pathian Molech bia hi.
6 A pa David bang hi ngawl a, ama in Topa tungah khialin a tungah thumaan ngawl hi.
7 Jerusalem nisuana sang mual tungah Moab te ii a thasiathuai pathian Chemosh biak natu mun khat, tuaciang Ammon te ii a thasiathuai pathian Molech biak natu mun vawt hi.
8 A ngamdang zite ii ngimnamtui a hal natu le sangaw biakpiaknate amate tek ii pathiante tungah a nei thei natu in biakna munte zongh vawtsak hi.
9-10 Topa, Israel te ii Pathian in niivei tak Solomon tungah kilaak a, ngamdang pathiante a biak ngawl natu thupia hikale Topa thu ni ngawlin nungngat hi. Tua ahikom Topa sia Solomon tungah thin uuk a,
11 ama tungah, “Nang sia kei taw na thuciamna palsat kaltang in, ka thupiakte zui ngawl na hikom na kumpi ngam kong laaksak tu a, na uliante khat pia tu in ka kamciam om hi. Ref 11:2 Pu 34:16; Thkna 7:3-4
12 Ahihang na pa David ka khualna in hisia na nuntak sungin ka vawt buatu a, na tapa ii uk hun sungin piang tu hi.
13 Tuaciang ama ii kumpi ngam bup ka la buatu hi; ama atu sia ka naseampa David le keima atu ka vawtsa Jerusalem khuapi ka khualna in minam khat ka nusiat zaw tu hi,” ci hi.
Solomon ii Ngalte
14 Tua ahikom Topa in Edom kumpi bangkua pan Hadad sia Solomon langpansak hi.
15-16 Hi hun ma pek in, David in Edom a zawthal lai in, a ngalkaphonpi ukpa Joab sia tua munah a thite ii luang phum tu in pai zo hi. Ama le a mite Edom ah tha luk a taam hun sungin Edom mite pa a minpiang,
17 Hadad le a pa ii naseam Edom mi pawlkhat Egypt ngam zuan in a suakta teng simngawl thatlum siat hi. Tua hun lai in Hadad sia patangno khat hi pheang hi.
18 Amate in Midian nusia in Paran ah pai a, tua munah mi pawlkhat in amate pawm hi. Tua zawkciang amate Egypt ngam ah khualhaw in, kumpipa kung a pai ciang Hadad sia leitang pawlkhat le inn khat pia hi, tuaciang anvaak hi.
19 Hadad sia kumpipa in pawl vawt a, kumpipa in a nuphal nu, Kumpinu Tahpenes ii suapuinu sia Hadad ii zi tu in pia hi.
20 Tua nu in Hadad taw tapa khat hing in, a min Genubath hi a, ama sia kumpinu in kumpi inn sungah khangsak a, kumpipa tapate taw teang khawm hi.
21 David ii thina le ngalkaphonpi ukpa Joab ii thina thu Egypt ah Hadad in a zaak ciang Hadad in kumpipa munah, “Ka ngam ah hong cia kiksak ta'n,” ci in ngen hi.
22 Kumpipa in, “Banghangin maw? Kong piak tu khat po kong piak ngawl om ziam? Tua hu in cia kik nuam ni ziam?” ci in dongh hi.
Hadad in, “Hong ciasak lel po ta'n,” ci in kumpipa tungah zo hi. Tuaciang a ngam ah ama ciakik hi.
Edom kumpipa a hina taw ama sia Israel te atu a ngilo a ngal cipha khat ahi hi.
23 Pathian in Eliada ii tapa Rezon zongh Solomon a langpan tu in vawt hi. Rezon sia a topa Zobah kumpipa Hadadezer kung pan tai a,
24 tuaciang ama sia thukham nei ngawl mihing tatsia pawlkhat ii lampui suak hi. Hisia David ii Hadadezer a zaw zawk, a kipawlpui Syria te a thalup zawkciang ahi hi. Rezon le a mite Damascus ah pai in tua munah teang uh hi, tua munah a mite in ama Syria kumpi suaksak uh hi.
25 Ama sia Solomon khan sung Israel te ii ngal ahi hi.
Jeroboam tungah Pathian ii Kamciam
26 Solomon kumpi a langpan midang khat sia a uliante khat ahi Jeroboam hi a, Ephraim ngam Zeredah pan Nebat ii tapa hi. A nu sia meingong khat hi a Zeruah hi.
27 Hisia tualngal thawna taanghthu hi.
Solomon sia Jerusalem ii nisuana sangah lei dimh in, khuapi luphungte pua hi.
28 Solomon in Jeroboam sia a kiveakseak nasep hanciam khangno khat hi ci in a mu ciang Manasseh le Ephraim ngamsung om zawthawk thu taw a kisawl naseam theampo uksak hi.
29 Ni khat ni in Jeroboam sia Jerusalem pan khualhaw in a pai laitak ama nguak hong pai Shiloh pan kamsaang pa Ahijah taw, ngam taanzauna khat lampi tungah kisi uh hi.
30 Ahijah in a puantual thak silh lai sia suutin, khen sawm le khen nii sua in eautham hi,
31 tuaciang, Jeroboam munah, “Puanbek sawm nangma la in, banghang ziam cile Topa, Israel ii Pathian in nangma tungah, ‘Keima in Solomon khut sung pan kumpi ngam ka la tu a, nang sia mi nam sawm hong pia tu khi hi.
32 Ka naseampa David le Israel ngam bup sung pan ka khuapi tu ka tealsa Jerusalem ka khualna in, Solomon in nam khat keam lai tu hi.
33 Hi bangin seam tu khi hi, banghang ziam cile Solomon in kei hong nial in ngamdang pathiante: Sidon te ii numeipathian Astarte;, Moab te ii pathian Chemosh; Ammon te ii pathian Molech te bia hi. Solomon in ka thu hong ni ngawl hi; ama in khialna vawt zo hi, a pa David ii a zui bangin ka thukhamte le ka thupiakte zui ngawl hi.
34 Ahihang Solomon tung pan kumpi ngam bup la ngawl tu khi hi, a nuntak lai teng vaang nei in ka koi tu hi. Ka teal pa, ka thukhamte le ka thupiakte hong zui ka naseampa David ii hu in hi bangin vawt tu khi hi.
35 Solomon ii tapa tung pan kumpi ngam laaksak in no minam sawmte hong pia tu khi hi,
36 ahihang Solomon ii tapa in nam khat ka keamsak tu hi, tuasia ciang ka naseampa David ii suan khat in kei hong kibiakna munin ka tealsa khuapi, Jerusalem panin a uk tawntung tu hi.
37 Jeroboam awng, nang sia Israel kumpipa hong suaksak tu khi hi, tuaciang ngam na dei zaza na uk tu hi.
38 ka thu a cing takin nong ni a, ka thukhamte taw nungta in, ka thupiak sia David ii hong nit bangin nong ni le nang taw kong omkhawm tawntung tu hi. Israel kumpipa kong suaksak tu a na suan le na paalte in nang zawkciang, David a tu ka vawt bangma in, ka uksak tu hi.
39 Solomon ii mawna hu in David ii suan le paalte daan ka pia tu hi, ahihang a tawntung hi ngawl tu hi, hong ci hi,” ci hi.
40 Tua ahikom Solomon in Jeroboam thalup tu in hanciam ahihang Egypt kumpipa Shishak bealh in tua munah Solomon ii thi dong om hi.
Solomon ii Thina
(2 Khangtaanghthu 9:29-31)
41 Solomon ii sep le vawt dang teng theampo, a nuntak sung a sepna le a ciimna teng Solomon ii Taanghthu sungah kikhum siat hi.
42 Ama in Jerusalem ah Israel bup uk in kum 40 kumpi seam hi.
43 Ama thi a, David Khuapi sungah kiphum hi, tuaciang a tapa Rehoboam in ama ii kumpi za laih hi.