28
Jeremiah le Kamsaang Hananiah
1 Zedekiah kumpi a sua zawk a kum lina ii a tha ngana, tua kum sung ma in Gibeon khua mi Azzur ii tapa kamsaang Hananiah in Biakinnpi sungah kei hong paupui hi. Thiampite le mipite om honna ah ama in keima tungah, Ref 28:1 2 Kum 24:18-20; 2 Khang 36:11-13
2 Vaanglianbelpa Topa, Israel ii Pathian in “Babylon kumpipa vaangletna ka susia zo hi.
3 Nebuchadnezzar kumpipa ii Babylon ah a paipui biakinn sum le vanh manpha vanh manphate theampo kum nii sungin hi munah ka ciapui kik tu hi.
4 Keima in Judah kumpipa, Jehoiakim ii tapa Jehoiachin zongh Babylon ah saltaang a, a pai Judah mite theampo ka ciapui kik tu hi. Hi hi. Keima in Babylon kumpipa vaangletna ka susia tu hi. Keima, Topa in ka ci zo hi,” ci in hong son hi.
5 Tuasia ciang thiampite le Biakinnpi sungah a ding mipite theampo ii mai ah, keima in Hananiah tungah:
6 “Lamdang hi! Topa in hisia seam tu in lamen khi hi! Topa in na sonkholna sia taangtungsak tu a, thongtaakte bangin a kikai mihing theampo le Biakinnpi sum le vanh manpha vanh manphate theampo Babylon panin hong ciapui kik tu hi ci in ka um takpi hi.
7 Ahihang nang tung le mipite tungah ka son thu sia ngai in.
8 Nang le kei ii om hun ma in a om, taanghlai a thuson kamsaangte in minam tam mamate tung le a thahat a kumpi ngamte tungah ngal, kialpi le natna theng tu hi ci in sonkhol zo uh hi.
9 Ahihang kilemna le thinnopna hong theng tu hi ci in a sonkhol kamsaang pa sia, ama ii sonkholnate a taangtung takpi ahile Pathian ii sawl tatak kamsaang in kisaang thei pheang tu hi,” ka ci hi.
10 Tuasia ciang Hananiah in ka ngawng pan hakkol hong la in, a bebekin thiaktan hi,
11 tuaciang ama in mipi mai ah: “Nebuchadnezzar kumpipa ii minam theampo ii ngawng ah a bul hakkol sia hi bangin ka thiaktan tu hi Topa in ci hi; tuaciang ama in hi nasep sia kum nii sung sang seam tu hi,” ci in son hi. Tua zawkciang ka nusia hi.
12 Hisia zawk tawmvei ciang Topa in keima tungah,
13 pai in a, Hananiah kungah hi bang son tan: “ Topa in, thing hakkol khat sia thiaktan zo peu tu ni hi, ahihang thik hakkol khat taw ka laih tu ci hi.
14 Vaanglianbelpa Topa, Israel ii Pathian in hi minamte theampo tungah thik hakkol ka bul tu a, amate in Babylon kumpipa Nebuchadnezzar ii na a seam tu uh hi, ci hi. Topa in ngamsate ngawngawn in Nebuchadnezzar ii na ka seamsak tu ci hi,” hong ci hi.
15 Tua zawkciang Hananiah tungah hi thu ka son zawkciang, “Ngai in, Hananiah awng! Nang sia Topa ii hong sawl na hi bua hi. Hi mite leilot thu na umsak hi.
16 Tua ahikom Topa ama mama in nang kong heam tu hi ci hi. Tu kum bo ma in na thi tu hi, banghang ziam cile Topa langpan tu in mipite na son zo hi,” ka ci lai hi.
17 Tua kum a tha sali tha in Hananiah thi hi.