29
Babylon ah a om Judah Mite tungah Jeremiah ii Laithak
1 Jerusalem khua panin Nebuchadnezzar in Babylon ah thongtaak in a paipui thiampite, kamsaangte, mipi lampuite le a dangte theampo ii tungah lai khat ka thaak hi. Ref 29:1-2 2 Kum 24:12-16; 2 Khang 36:10
2 Hi lai sia Jehoiachin kumpipa, a nu, kumpi inn sung uliante, Judah ngam le Jerusalem lampuite, khutthiam mite le naseam thiamte a saltanna munah a kipaipui zawkciang ka at ahi hi.
3 Tua laithak sia Judah kumpipa Zedekiah ii Babylon kumpipa Nebuchadnezzar tungah a thaak hi a Shaphan ii tapa Elasah le Hilkiah ii tapa Gemariah khut tungah ka pia hi. Tua laithak sungah:
4 “Vaanglianbelpa Topa Israel ii Pathian in Jerusalem panin Babylon ah Nebuchadnezzar ii thongtaakin a paipuisak tua mite theampo tungah hi bangin ci hi:
5 ‘Inn sa vun a teang vun. Huan vawt vun a, a sungah na ciin uhte ne vun.
6 Kiteang vun a ta nei vun. Ama te zongh ta a nei thei natu in na tate uh kiteangsak vun. Na pungto tu uh a, na kiamsuk buatu uh hi.
7 Thongtaak a kong paisakna khuapite ii phattuam natu in naseam vun. Amate taangin ka tungah thu ngen vun, banghang ziam cile amate a nuamsa uh le no zong na nuamsa tu uh hi.
8 Note sungah a teang kamsaangte in hikale maisang thu ka sonkhol thei hi a ci midangte in hikale na theamsak ngawl natu in Keima, Topa Israel ii Pathian in na kidop natu kong hilkhol hi. Amate ii mangmatte na thudon heak vun.
9 Amate in ka min suangin no tungah leilot thu hong son uh hi. Amate ka sawl bua hi. Keima, Vaanglianbelpa Topa in ka son zo hi,’ ci hi.
10 “ Topa in, ‘Babylon ah na om zawk uh kum sawmsali a cin ciang no kong thin nopmawkna kong lak tu a, na khua na tui uh ah na cia kik natu uh in ka kamciam ka len tu hi. Ref 29:10 2 Khang 36:21; Jer 25:11; Dan 9:2
11 No atu in tupna ka neite sia na tuasiat natu hi ngawlin mi nuamsa na sua natu le mai sangah lametna kong piak natu ngealnate ahi hunlam keima bek in ka he hi.
12 Tuaciang kei nong sam tu uh hi. Kei kung hong zuanin thu nong ngen tu uh hi, tuaciang kong zo tu hi.
13 Kei nong zong tu uh a, nong mu tu uh hi, banghang ziam cile na thinsung theampo taw nong zon tu uh hang ahi hi. Ref 29:13 Thkna 4:29
14 Hi hi, Kei nong mu tu uh a, na ngam uh ah kong koi kik tu hi, ka ci hi. Note kong thethaangna ngam theampo le mun theampo panin kong kaikhawm kik tu a, saltaang a kong puak ma na omna munah kong ciapui kik tu hi. Keima, Topa in ka ci zo hi.’
15 “ Topa in Babylon pan kamsaangte note hong pia hi, ci nu hi.
16 David ii kumpi ngam a uk kumpipa le hi khuapi mite ahi noma taw thongtaak bangin a paikhawm ngawl na mealheakte taw kisai in Topa thusonte ngai vun.
17 Vaanglianbelpa Topa in, ‘Keima in amate tungah ngal, kialpi le natna ka tungsak tu a, amate sia neak thei ngawl theinga muat bang ka hisak tu hi.
18 Ngal, kialpi le natna taw amate ka zuizen tu a, leitung minam theampo in tuasia a mu uh ciang lau tu uh hi. Mun theampo ah amate ka thethaang tu a, amate tung thupiangte hangin mihingte ingh in lau tu uh hi. Mihingte in amate nunau in, a min uh sia kihaamsiatna in zangh tu uh hi.
19 Hi thu sia amate tungah tung tu hi, banghang ziam cile amate in ka naseam kamsaangte tungtawn a ka puak tawntung ahi ka thupuak sia a nit ngawl uh hang ahi hi. Amate in ngai nuam ngawl uh hi.
20 Babylon ah saltaang in kong puak note theampo awng, Keima, Topa ii ka son sia ngai vun,’ ci hi.
21 “Vaanglianbelpa Topa, Israel ii Pathian in, ama min suangin no tungah leilot thu hong son, Kolaiah ii tapa Ahab le Maaseiah ii tapa Zedekiah te ii thu son zo hi. Topa in amate sia Babylon kumpipa Nebuchadnezzar khut sungah aap tu a, ama in noma mu tang ma in thatlum tu hi, ci zo hi.
22 Jerusalem pan Babylon ah thongtaak bangin a kipuak mite in khat pawpo a haamsiat nop uh ciang, ‘Babylon kumpipa ii a hingtang a mei sung a em Zedekiah le Ahab bangin Topa in nang hong vawt tahen!’ ci tu uh hi.
23 Hi bangin a thuak tu uh ma ahi hi, banghang ziam cile amate in a lauhuai mawna khialnate — palngul mawna vawtin Topa ii min suangin leilot thute son uh hi. Hi thu sia Topa ii dei ngawl ahi hi; ama in amate ii vawt theampo he a, ama sia a langpan tetti khat ahi hi. Topa in ci zo hi,” ci in ki at hi.
Shemaiah ii Laithak
24-25 Vaanglianbelpa Topa, Israel ii Pathian in Nehelam mi Shemaiah atu in thupuak khat kei hong pia hi, Shemaiah in ama min mama taw in Jerusalem khua mite theampo le Maaseiah ii tapa thiampi Zephaniah tung le thiampi dangte theampo ii tungah lai khat thaak hi. Shemaiah in Zephaniah tungah a thaak hi lai sungah:
26 “ Topa in Jehoiada taangin nangma thiampi in hong koi zo hi, tua ahiciang tu in nang sia Biakinnpi sungah ulianbel na hi hi. Kamsaang khat in a kivawt tawm a mawmaw theampo ii ngawng ah thikkual bulin na khii tu sia nangma vaipuak ahi hi.
27 Banghangin mipite tungah kamsaang khat bang a thu a son Anathoth khua mi Jeremiah tungah hi bangin vawt ngawl ni ziam?
28 Ama thu son tu sia khaam kul hi, banghang ziam ci le ama in Babylon ah a om mipite tungah, tua munah khuangei ma thongtaak tu uh hi, inn na sa tu a, teangin, huan vawt a, na ciinte na ne tu uh hi, a ci hang ahi hi,” ci in at hi.
29 Zephaniah in tua laithak sia kei hong sim hi,
30 tuasia ciang Topa in,
31-32 Shemaiah ii thu taw kisai in Babylon ah thongtaakte theampo tungah hi thu puak in ci in kei hong sawl hi: “Keima, Topa in, Shemaiah le a suan a paalte theampo daan ka pia tu hi. Ama in ka sawl ngawl bulin kamsaang khat bangin no tungah thu hong son in leilot thute no hong umsak uh hi. Ama in no sungah suan le paal nei ngawl tu hi. Ama sia ka mite atu in a pha ka vawt tu nate a mu tu in nungta ngawl tu hi, banghang ziam cile ka mite ii hong langpan natu in ama in sawl hi. Keima, Topa in ka ci zo hi.”