27
Jeremiah in Khuital Hakkol Pua
1 Josiah ii tapa Zedekiah in Judah ngam kumpi a sua tuungin Topa in keima tungah, Ref 27:1 2 Kum 24:18-20; 2 Khang 36:11-13
2 savun khau le thing hakkol khat vawtin ka ngawng ah bul tu in hong sawl hi.
3 Tuaciang Jerusalem khua ah Zedekiah kumpipa taw kimu tu a hong pai tongciinte tungtawnin Edom, Moab, Ammon, Tyre, le Sidon kumpite tungah thu khat puak tu in Topa in keima hong sawl hi.
4 Vaanglianbelpa Topa, Israel ii Pathian, Topa in hi bangin ci hi ci in a kumpite tungah a son natu in a tongciinte thupia tu in kei hong sawl hi:
5 “Ka vaangletna le ka thahatna taw in leitung mihing nam le leitung ah a teang nganhingte theampo ka bitphua a; tuate sia ka piak nop pawpo tungah ka pia hi.
6 Ka naseam Babylon kumpipa Nebuchadnezzar khutnuai ah hi minamte theampo a koi pa sia Keima ka hi hi, tuaciang ngamsate ngawngawn in ama ii na ka seamsak hi.
7 Minam theampo in ama ii na seam tu uh a, ama ngam a bo tu hun a thet mateng in minamte in ama ii tapa le a tupa ii na sepsak tu uh hi. Tua zawkciang ama minam in a thahat minamte le kumpi liante ii na sepsak tu uh hi.
8 “Ahihang minam khat pawpo, ahibuale kumpi ngam khat in, Nebuchadnezzar ii ukna sungah a tum bua ahile tua minam sia, Nebuchadnezzar ii ka suksiat cipsak mateng in keima in ngal, kialpi le natna taw in daan ka pia tu hi.
9 Na kamsaangte ahibuale, mangmatna taw ahizong, mithite ii thaa samna taw ahizong mitbum taw ahizong mailam thupiang tute a sonkhol thei a ci khat pawpo ii thu ngai heak vun. Amate theampo in Babylon kumpipa khutnuai ah na tum ngawl natu in no hong son hi.
10 Amate in no hong theam a, na ngam uh panin a khuala na ah na paina tu uh hong vawt tu uh hi. Keima in no kong hawlkeak tu a, hong kisusia tu hi.
11 Ahihang minam khat pawpo in Babylon kumpipa khut sungah tum a, a na a seam le, a ngam ah lotho tu le a teang tu in ka om suaksak tu hi. Keima, Topa in ka ci zo hi,” hong cisak hi.
12 Judah kumpipa Zedekiah tungah ta bangma in, ka son a, “Babylon kumpipa khutnuai ah tum in. Ama le a mite ii na sepsak in, tua hile na nungta tu hi.
13 Banghangin nang le na mite sia ngal ahibuale kialpi ahibuale natna taw in thi tu nu ziam? Tua thu sia Babylon kumpipa khutnuai ah a tum ngawl minam khat pawpo tungah piang tu hi ci a, Topa ii sonsa thu ahi hi.
14 Babylon kumpipa khutnuai ah na tum ngawl natu in hong son kamsaangte ii thu ngai heak vun. Amate in no hong theam hi.
15 Kamsaangte sia ka sawl hi ngawl a, keima min suangin leilot thu hong son hi, Topa mama in ci hi. Tua ahikom ama in no hong bengkeak tu a, noma le hi leilot thute hong son kamsaangte kithatlum tu hi,” ka ci hi.
16 Tuaciang Topa ii hi bangin a ci sia thiampite le mipite tungah ka son hi: “Biakinn sum le vanh manphate Babylon panin kila kik pal tu hi ci a, kamsaangte thuson sia ngai heak vun. Amate in no hong theam hi.
17 Amate ii thuson ngai heak vun! Babylon kumpipa khutnuai ah tum vun, tua hile na nungta tu uh hi! Banghangin hi khuapi sia ninthuk suak tu ziam?
18 Amate in kamsaang tatakte hi in, ka thupuak a nei uh le, Biakinnpi sung le kumpi inn sungah a om lai sum le vanh manphate Babylon ah a kipuaksak ngawl natu in keima, Vaanglianbelpa Topa tungah hong ngen ta uh hen.”
19-20 Nebuchadnezzar kumpipa in Judah kumpipa, Jehoiakim ii tapa Jehoiachin le Judah ngam le Jerusalem khua lampuite Babylon ah a paipui lai in khuamte, taau tuikuang, leangte le a dang biakinn sum le vanh manpha pawlkhat nusia hi.
21 “Jerusalem khua sung Biakinnpi sung le kumpi inn sungah a kinusia sum le vanh manphate taw kisai in Keima, Vaanglianbelpa Topa Israel ii Pathian in hi bang kong son sia ngai vun:
22 Tuate sia Babylon ah kipua tu a, keima ii ka kat mateng in tua munah om suak tu hi. Tua zawkciang tuate ka la kik tu a, hi munah ka koi kik tu hi. Keima, Topa in ka ci zo hi,” ci in ka son hi.