20
Jeremiah le Thiampi Pashhur Kilem ngawlna
1 Hi thute ka thansak sia Biakinnpi ukpa Immer ii tapa thiampi Pashhur in a zaak ciang ama in,
2 kei hong kisaat natu le thikkol hong bulin Biakinnpi sung Benjamin Kongpi tungnung hui ah hong koi natu thupia hi.
3 A zingsang ciang, Pashhur in kol hong suut zawkciang, keima in ama tungah, “ Topa in nang sia Pashhur ci in min hong phua ngawl hi, ‘Mun theampo ah Launa’ ci in min hong sam zo hi.
4 Topa mama in ‘Nang sia nangma le nangma a kilausak tu le na lawmte a lausak tu in kong vawt tu a, a ngalte ii namsau taw na lawmte a thalup siat na mu tu hi. Keima in Judah mihingte theampo Babylon kumpipa khutnuai ka then siat tu hi; pawlkhat a ngam ah thongtaak tu in ciapui tu a, a dangte thatlum tu hi.
5 Hi khuapi ii hauna theampo, a nei a lamh le a vanh theampo, Judah kumpite ii sum le vanh manphate dongin a ngalte in ka suttolsak tu a, a khawng a kheakin Babylon ah ka paipuisak tu hi.
6 Pashhur awng, nang na hile, nangma le na innkuanpuite theampo zongh hong kiman tu a, Babylon ah hong kipaipui tu hi. Tua munah na thi tu a, na theam zazaan bul na lawmte taw hong kiphum khawm tu hi,’ ci hi,” ka ci hi.
Jeremiah in Topa Mawsiat
7 Topa awng, nangma in kei nong theam a,
keima theam ka thuak hi.
Nangma in kei sangin na hat zaw a, kei nong zo zo hi.
Mihing theampo in kei hong nunau uh a;
sunkhuateakin amate in kei hong selno uh hi.
8 Thu ka son simin, ka au keak kul a,
“Ngoltolna! Kisuksiatna!” ci in ka au hi.
Topa awng, nangma thupuak ka thansak hu in
a tawntungin simmawk vawtna le zawnsakna ka thuak hi.
9 Ahihang, “ Topa ka mangil tu a
ama min suangin thu ka son nawn buatu hi,” ka ci ciangin,
na thupuak sia mei bangin ka sung tawngh ah kuang hi.
Ka hi thei za iip tu ka hanciam hangin, ka iip zo nawn bua hi.
10 Mihing theampo kihuau a, “Mun theampo ah launa om hi!
Tua ahikom thu neite tungah ama khia tawng!” a ci ka za hi.
Ka itbel ka lawmte ngawngawn zongh in
ka puk tu bek ngak uh hi.
“Kitheam zo tha tu hi;
tuasia ciang ih man thei tu a, phu ih lam tu hi,” amate in ci uh hi.
11 Ahihang Topa awng,
nangma in keima sangah nong pang a, na thahat in na vaanglian hi,
Kei hong vawtsiate sia ngallel tu uh hi.
Amate a min kipaansak tawntung tu uh hi,
banghang ziam cile amate taangtun zo ngawl hi.
Amate ii minpaanna sia kimangil ngeingawl tu hi.
12 Ahihang, Vaanglianbelpa, Topa awng,
mihingte sia a maan takin na sittel a; amate ii thinsung le a ngaisutna na he hi.
Tua ahikom ka ngalte tungah phu na laakna hong musak ta'n,
banghang ziam cile na khut sungah ka vai teng kong aap zo hi.
13 Topa tungah lasa vun! Topa pok vun!
Ama in mi ngilote khut sung panin a kizothaw te suatak hi.
14 Ka sua ni haamsiat in!
Ka nu sung pan ka sua ni mangil in! Ref 20:14-18 Job 3:1-19
15 “Tu a sia pano hi! Tapa khat nei ni hi!” ci a ka pa kungah kamtai a,
ka pa a lungdamsak pa haamsiat in.
16 Ama sia Topa in hesuak ngawlin,
a suksiat tua khuapite bang hi tahen.
Ama in zingsang in bot a sate ii kaana aw le
sun in ngal patauna aw za tahen,
17 banghang ziam cile ama in ka pian ma in hong thatlum ngawl hi.
Hong thatlum hi thong le ka nu ngilsung sia ka thaan hi zo tu hi.
18 Banghangin piang khi ziam?
Ngimna le heena khuangaina bek thuakin
maizumna taw ka nuntakna bosak tu in a piang khi ziam?