21
Jerusalem ii Ngallel tu Kison khol
1 Judah kumpi Zedekiah in Malchiah ii tapa Pashhur le Maaseiah ii tapa thiampi Zephaniah te ka kungah hong puak a, hi bangin hesuak hong ngensak hi,
2 “Nong hesuakna taw ko atu in Topa hong paupuisak ta'n, banghang ziam cile Babylon kumpipa Nebuchadnezzar le a ngalkaphonpi in khuapi uumci hi. Topa in ama ii nalamdang laknate khat ko atu in hong vawt tahen a, Nebuchadnezzar nungkin kik natu zawthawk thu zangh tahen,” Ref 21:2 2 Kum 25:1-11; 2 Khang 36:17-21
3 Tuaciang Topa in kei hong paupui a, Zedekiah ii kei kungah hong sawl mihingte munah,
4 Topa Israel ii Pathian in hi bangin a ci teng Zedekiah tungah son kik in ka sawl hi, “Zedekiah awng, Babylon kumpipa le a ngalkaphonpi a sim, na ngalkapte ka zo tu hi. Na ngalkapte ii ngalhiamte khuapi laizang ah ka seng tu hi.
5 Keima in ka tha neina, ka thin uukna, ka thin vei laakna le ka thinsona theampo taw nang kong sim tu hi.
6 Hi khuapi sungah a teang mihingte theampo ka thatlum tu hi; mihing le nganhing a kibangin natna ngilo taw thi tu uh hi.
7 Ahihang, nangma, na khutnuai a uliante le ngalsung, kialpi le natna ngilo pan a, a suakta mite sia — no hong that nuam Nebuchadnezzar kumpipa le na ngalte in na vekpi in kong mansak tu hi. Nebuchadnezzar in no hong thatlum tu hi. Ama in note hesuakna le deisakna hong nei ngawl tu a khat zongh hong khoaikhe buatu hi. Keima Topa in ka ci zo hi.”
8 Tuaciang Topa in mihingte tungah hi bangin son tu in kei hong sawl hi, “Ngai vun! Keima, Topa in khat sasang na teal tu in nuntakna lampi le thina lampi kong pia tu hi.
9 Khuapi sungah a om a kuama po sia ngalte thalup ahibuale pukthi in ahibuale natna taw thi tu hi. Ahihang tu laitakin khuapi hong sim Babylon mite kungah pai in a ki aap pawpo kithat ngawl tu hi; amate in a nuntakna beak suatak tu hi.
10 Hi khuapi sia khe tuan ngawlin suksiat tu in ka thin ka khensat zo hi. Babylon kumpipa khut sungah kipia tu a, ama in mei taw haltum tu hi. Keima, Topa in ka ci zo hi.”
Judah Kumpi Innkuan tungah Thukhenna
11-12 Topa in David ii suan le paal, Judah kumpi innkuan tungah hi thu son tu in kei hong sawl hi: “Keima, Topa ii ka son sia ngai vun. Ni simin thukhaikimna omsak vun. Ngualtheam a thuak pa sia a theam pa khut sung panin dal vun. Tuabangin na hi bua uh le, thusia na vawt sia in a kimit thei ngawl meikuang khat bangin ka thin uukna nasia tu hi.
13 Jerusalem awng, nang in leikuamte tungsia, zaangtam ii tung a saangna ah suang dokto khat bangin na to hi. Ahihang kei hong sim zo ngawl tu a, ka kidalna te hong sutham zo ngawl tu hi ci ni hi.
14 Ahihang na sepnate taw kizui in nang daan kong pia tu hi. Na kumpi inn mei taw ka hal tu a, a kiim a paam a om na theampo tua mei in kaanghtum tu hi. Keima, Topa in ka ci zo hi.”