19
A tamhtham Thambeal
1 Topa in thambeal khat lei tu in va pai ta'n hong ci hi. Ama in ulian pawlkhat le thiampi sung pan a uhaam zawhiat pawlkhat paipui in,
2 tuaciang Bealtamh Kongpi kaantan in Hinnom Kuam ah va pai ta'n, hong ci si hi. Tua munah hong son tu thupuak a thangsak tu ka hi hi. Ref 19:2 2 Kum 23:10; Jer 7:30-32; 32:34-35
3 Topa in hi bangin son tu in kei hong sawl a, “Judah kumpite le Jerusalem khua mite awng, keima, Vaanglianbelpa Topa Israel mite ii Pathian, ii kong son tu thu na ngai vun. Hi munah tuabang tuasiatna khat ka thengsak tu a tua thu a za theampo ingh keikoi tu uh hi.
4 Hi bangin ka vawt tu hi, banghang ziam cile mihingte in kei hong nusia zo uh a, hi mun sia pathian dangte biakpiakna taw in ninsak zo uh hi — tua pathiante sia amate, a taanghpupite, Judah kumpite ii a thu a heak ngeingawl pathiante ahi uh hi. Amate in hi mun sia a mawbaang ngawl mihingte ii chi taw kidimsak uh hi,
5 tuaciang amate in biakpiakna in a tate sia mei sungah halin Baal a biak natu in biaknatau vawt zo uh hi; hisia a vawt natu thu ka pia ngei bua hi; ka thinsung zongh ah ka ngaisun tha ngei bua hi. Ref 19:5 Thiam 18:21
6 Tua ahikom hi mun sia Topheth ahibuale Hinnom Kuam a kici nawn ngawl tu hun hong theng tu hi. Tua mun sia Kithalupna Kuam kici zaw tu hi.
7 Hi munah Judah le Jerusalem mite ii ngealnate theampo ka khak tu hi. A ngalte in ka zosak tu a ngal kidona ah ka thatlumsak tu hi. A luangte sia vacimte le ngamsate ii an tu in ka pia tu hi.
8 Hi khuapi tungah tuabang a lauhuai mama siatna ka tungsak tu a, tua khua a kaantan pawpo ingh liangin lamdang sa mama tu hi.
9 Ngalte in khuapi kiim uum tu a, a mite thalup tu hanciam tu uh hi. Ngalte uumcina in lauhuai leilam ahikom khuapi sung sangah a om mihingte sia khat le khat a sa uh kine a, a tate ii sa ngawngawn ne tu uh hi,” ci hi.
10 Tuaciang keima taw a paikhawm mihingte mai san ah thambeal saattham tu in Topa in keima hong sawl hi.
11 Tuaciang Vaanglianbelpa Topa in, “Hi mihingte le hi khuapi ka susia tu a, a kipua kik thei nawn ngawl a tamhtham hi thambeal taw kibang tu hi. Mithi phum natu mun dang om nawn ngawl ahikom mite in a thite sia Topheth ngawngawn ah phum tu uh hi.
12 Keima in hi khuapi le khuapi sungah a teangte Topheth taw kibangin ka vawt tu sia kong kamciam hi.
13 Jerusalem khua a innte, Judah kumpite ii innte, a tatakin ci leang inn theampo ii khuvumte tung pan aksite atu ngimnamtui hal biakna a kipiakna innte le pathian dangte tungah biakpiakna sapittui a kibuakna munte — tua teng theampo Topheth bangza ma in a nin suak siat tu uh hi,” a ci sia amate tungah son tu in keima hong sawl hi.
14 Tuaciang Topa in ama thupuak thangsak tu a hong sawlna mun Topheth ka nusia hi. Biakinnpi huang sungah pai in, ka ding a, mi theampo tungah,
15 Vaanglianbelpa Topa, Israel ii Pathian in, “Ka tungsak tu hi ka ci sa daan theampo sia hi khuapi le a naina khua theampo tungah ka tungsak tu hi, banghang ziam cile no na thinpui in kong son thu na ngai buatu uh hi,” a ci sia ka son hi.