9
Abimelech
1 Gideon tapa Abimelech sia a nu ii nungsang a mealheak theampo te teenna Shechem khua ah pai a, ama in Shechem mite munah,
2 “Koi sia na uuk zaw uh ziam? Gideon tapa sawmsali teng ii hong uk tu uuk zaw nu ziam, ahibuale pasal khat bek ii hong uk tu uuk zaw nu ziam? Na teptee tu uh sia Abimelech sia noma chi le sa hi,” ci in donghsak hi.
3 A nu ii nungsangte in Shechem a mite hi thu huvau ama atu a sonpui ciang, Shechem mite in Abimelech nungzui tu khensat zaw uh hi, banghang ziam cile ama sia a mealheak ahi hi.
4 Amate in Abimelech sia Thuciamna-ii-Baal biakinn panin ngunntang sawmsali pia uh hi, tuaciang tua sum taw ama in mi ngina ngawl honkhat ama taw koppui tu in cial hi.
5 Ama in a pa inn Ophrah ah pai in, tua mun suangpheak khat tungah Gideon tapate, a suapui 70 teng thatlum hi. Ahihang Gideon tapa nobel Jotham sia, buu ahikom a that bua hi.
6 Tua zawkciang Shechem le Bethmillo a om pasal theampo kikhawm in, Shechem a thiangtho oak thingkung sia ah pai a, tua nai ah Abimelech sia kumpi suaksak hi.
7 Jotham in hi thu a zaak ciang Gerizim Mual tungah pai in, amate oksan hi. “Shechem mite awng, ka aw hong ngai tavun, tuaciang Pathian in no aw hong ngai tu hi.
8 Khatvei lai in thingkung theampo kikhawm in, amate kumpi tu teal sawm uh hi. Amate in olive kung tungah, ‘Kote ii kumpipa hong hi ta'n,’ ci uh hi.
9 Olive kung in, ‘No kong uk thei natu in pathiante le mihingte zatak a pia sathau ka piansak sia ka tawp kul tu hi,’ ci in zo hi.
10 Tuasia ciang thingkungte in theikung munah, ‘Hong pai ta'n a, kote ii kumpi hong suak ta'n’ ci uh hi.
11 Ahihang theikung in, ‘No kong uk natu in ka nga a thumte nga nawn ngawlin ka tawp kul tu hi,’ ci hi.
12 Tua ahiciang thingkungte in sapitkung tungah, ‘Nang hong pai ta'n a kote ii kumpi hong suak ta'n,’ ci uh hi.
13 Ahihang sapitkung in, ‘No kong uk natu in pathiante le mihingte a lungdamsak sapittui ka piansak teng ka tawp kul tu hi,’ ci hi.
14 Tua ahikom thingkungte theampo in lingkung munah pai a, ‘Kote ii kumpi tu in hong pai ta'n,’ ci uh hi.
15 Lingkung in, ‘Na kumpi tu in nong dei takpi uh le hong pai tavun a, ka lim ah hong bealh tavun. Tuabangin na hi bua uh le ka baakte panin meikuang hong pusuak tu a, Lebanon a cedar thingkung te dongin kaanghtum tu hi,’ ci in zo hi.
16 Jotham in “Tua ahile Abimelech kumpipa na suasak uh ciang thin thiangtho le thin takpi taw ma ahi na ziam? Ama sepsa te taw kilawm in Gideon sia zatakna taw na phawk uh ziam, a innkuanpuite tungah pha takin na vawt uh ziam?
17 Ka pa ii no atu ngal hong dosak sia phawk vun. Midian te khut sung pan na nuntakna uh hong hutkhiat natu in ama in a luang kham hi.
18 Ahihang tuni in ka pa ii innkuante sia na langpan uh hi. Ama tapate — sawmsali sia suang tungah ni khat thu in na thatlum uh hi, tuaciang a innteang nu taw a tapa Abimelech sia na mealheak uh ahikom Shechem kumpipa in na koi uh hi.
19 Tua ahiciang tu in, Gideon le a innkuanpuite tungah na vawt uh teng sia thin thiangtho le thin takpi taw ahile Abimelech taw lungdam khawm vun a, Abimelech zongh no taw lungdam khawm tahen.
20 Ahihang tuabang ahi bua ahile, Abimelech tung pan meikuang hong lengkeak tahen a Shechem le Bethmillo mite hong haltum tahen. Shechem le Bethmillo te tung pan meikuang hong lengkeak tahen a, Abimelech haltum tahen,” ci hi.
21 Jotham in a suapuipa Abimelech kiita ahikom Beer ah a teang tu in tai hi.
22 Abimelech in Israel kum thum sung uk hi.
23 Tuaciang Pathian in Abimelech sia Shechem mite taw a kilem ngawl natu in vawt a, amate in ama langpanin tualngal tho hi.
24 Hi bangin hong pianna sia Gideon tate 70 a kithalupna thu taw kisai Abimelech le ama a hanthawn Shechem mite thuak natu a piang thu ahi hi.
25 Shechem mite in mualdawnte ah Abimelech a suam tu in pasalte in pangsak a, amate kaantanin a pai peuma suttol uh hi. Abimelech tungah hi thu kison hi.
26 Tua zawkciang Ebed ii tapa Gaal sia a suapuite taw Shechem ah hong pai uh a, Shechem mite in ama muang uh hi.
27 Amate sia a sapithuante sungah pai siat in sapitnga lo a, sapittui a vawt zawk uh ciang poai khaam uh hi. A pathian biakinn sungah amate tumin tua munah ne in dawn in om a, Abimelech simmawkna kam pau uh hi.
28 Tuaciang Gaal in, “Ei Shechem ah bangbang mi hi thong hi ziam? Banghangin Abimelech na sepsak tu hi ziam? Ama akua hi peang na ziam? Gideon tapa hi! Tuaciang Zebul in ama thupiakte seam hi, ahihang eite in ama na banghangin sepsak hi ziam? Noma bee le phung a piangsak na taanghpupi Hamor tungah thumaan vun!
29 Hi mite ii lampui hi leng uuk meak ing! Tua hile Abimelech ka heam tu hi. Ama munah na ngalkapte belap thua in kisim tu in hong kuan ta'n, ka ci tu hi,” ci hi.
30 Khuapi uk pa Zebul in Gaal ii pauna a zaak ciang a thin uuk hi.
31 Ama in Arumah a om Abimelech kungah kamtai te paisak a, hi bangin cisak hi, “Ebed ii tapa Gaal le a suapuite Shechem ah hong pai a, amate in nang sia khuapi sungah tumsak ngawl tu hi, ci hi.
32 Tua ahikom tu in nang le na mite sia zanin ngelin lo sungah na buu tu uh hi.
33 Zing ciang zingsang ni sua ciang tho in, khuapi sia heakkhol ngawlin sim vun. Tuaciang Gaal le a mite hong sim tu in hong pusua po ciang, na tha neiza in do vun!”
34 Tua ahikom Abimelech le a mite theampo sia pawl li kisua in, zanin hong ngel uh a, Shechem khua pua ah buu uh hi.
35 Gaal hong pusuak a, khuapi kongpi ah a ding a mu uh ciang, Abimelech le a mite a bukna uh pan hong dingto uh hi.
36 Gaal in amate mu a, Zebul mun ah, “En in! Mualdawn panin mihing hong paisuk om hi!” ci hi.
Zebul in, “Tuate mihing hi bo, mualtung ah a om limhte hi lel hi” ci in zo hi.
37 Gaal in, “En in! Mualdawn panin mihing hong pai hi, tuaciang pawlkhat sia aisaan theite ii oak thingkung sia pan lampi tawnin hong pai hi!” ci kik hi.
38 Tuasia ciang Zebul in ama tungah, “Tu in na kam khakngal teng koisung then ni ziam? Hi Abimelech sia banghangin a na sepsak tu hi ziam ci in a dongh sia nangma hi ka na ngawl ni ziam? Hi mite sia simmawkna taw na ci ngawpte hi. Tu in pai in a, va sim ta'n!” ci hi.
39 Gaal in Shechem mite lampui a, Abimelech sim hi.
40 Gaal sia tai in, Abimelech in del hi. Khuapi kongpi ngawngawn ah mi tam ma liam hi.
41 Abimelech sia Arumah ah teang a, tuaciang Zebul in Gaal le a suapuite Shechem ah a teen thei nawn ngawl natu in not hi.
42 A khuavak ni ciangin Abimelech in Shechem mite, lo sung zot a sawm uh sia phawk hi,
43 tua ahikom ama in a mite pawl thum in khen a, lo sungah buusakin ngaksak uh hi. Ama in mihingte khuapi sung pan hong pusua uh a mu ciang amate that tu in a bukna pan hong pusuak hi.
44 Abimelech le a pawlte in khuapi kongpi cing tu in manlang in hong pai laitak, a pawl dangte nii in lo sungah tua mite thatlum siat uh hi.
45 Ngal kidona sia sunkhuateak ma ahi hi. Abimelech in khuapi la a, a khua mite thatlum in, khuapi nuaitham a, a leitang ci buak nelh hi.
46 Shechem khua a lampuite theampo in khuapi kulh sung panin hi thu a zaak uh ciang, amate ngammuan natu in Thuciamna-ii-Baal biakinn, ngalnanna mun sia hong tu uh hi.
47 Tua munah amate kikaikhawm hi ci in Abimelech tungah kison hi,
48 tua ahikom ama in Zalmon Mual ah a mite taw paito hi. Tua munah ama in hei khat la a, thingbaak khat siiktan a, a liang ah hong pu hi. Ama in a mite munah manlang takin ama hi babangin hi vun ci in sawl hi.
49 Tua ahikom mi simin thingbaak khat tek siiktan a; Abimelech nung zui in, kulhpi pangh ah a thingte seng uh hi. Amate in kulhpi sia a sungah om mihingte taw cipin hal a, mihing a om theampo — pasal le numei a kingawm tulkhat bang thi siat uh hi.
50 Tua zawkciang Abimelech sia Thebez ah pai a, tua khuapi kiim uum in la hi.
51 Tua munah tausaang muanhuai khat om a, khuapi sung a om pasal le numei theampo, lampuite zongh kihel in, tua mun zuanin tai uh hi. Amate teng a sungsang pan kikalh in, innkhum tungah kaato uh hi.
52 Abimelech sia tausaang sim tu in hong kuan ciang, tausaang sia a kongkha pan hal tu in hong paito hi.
53 Ahihang nupi khat in an ngoaina suang khat sia ama lu tungah lawnsuk a, a lu ngu tamh hi. Ref 9:53 2 Sa 11:21
54 Tuasia ciangin a ngalhiamte a pua tangval sia samin, “Na namsau dok in a, hong hollum ta'n. Numei khat ii thalup hi hong kici tu sia ka dei bua hi,” ci hi. Tua ahikom tangvalpa in namsau taw hollet a, thi hi.
55 Abimelech a thi a mu uh ciang Israel te inn ah cia siat uh hi.
56 Hi bangin Abimelech ii a suapuite 70 a thalupna taw a pa tungah khialna lian a vawt sia Pathian in thuk kik hi.
57 Pathian in Shechem mite zongh a seksolna hu in thuaksak a, Gideon ii tapa Jotham in amate a tomlaw lai in, piang tu hi a ci bang keakin piang hi.