8
Midian te ii A khakbel A lelna
1 Ephraim mite in Gideon munah, “Midian te na sim tu lai in banghang hong sam ngawl ni ziam? Banghangin ko hi bangin hong vawt nu ziam?” ci in nasia takin phun uh hi.
2 Ahizong ama in, “Kei ii tawm ka sep teng sia no ii septe taw teengat taak ngawl hi. No Ephraim te ii tawm na sep uh teng sia ko minam bup ii sep sang zong man nei zaw hi.
3 A dang son ta bualeang, Pathian thahatna taw Midian ukpite Oreb le Zeeb that nu hi. Tua taw a kiteengat thei tu kei sep bang om thong na ziam?” ci hi. Hi bangin a ci zawkciang amate sia tuaza pi in thin uuk nawn ngawl hi.
4 Hisia hun ciang Gideon le a mihing zathum teng in Jordan ngun ah hong pai in kaantan uh hi. Amate sia toi mama hi, ahihang Midian te ma del tan lai hi.
5 Amate Sukkoth hong thet uh ciangin a khua mite munah, “Nong hesuakna in ka mite anluum hong piaksak tavun. Amate sia toi mama zo a, tuaciang Midian kumpipate ahi Zebah le Zalmunna te del suak lai tu khu hi,” ci hi. Ref 8:3-5 Ps 83:11
6 Ahihang Sukkoth lampuite in, “Banghang peuma na ngalkapte an hong piaksak tu khu ziam? Zebah le Zalmunna zongh na mat pepeu ngawl lai uh po,” ci uh hi.
7 Tua ahikom Gideon in, “Pha hi! Topa in Zebah le Zalmunna ka khut sungah hong aap ciangin, sennealngam pan ling le ngeaukal te taw hong saat tu khu hi!” ci hi.
8 Gideon pai suak a Penuel ah, tua mite munah an a nget ciang, Sukkoth te ci bangma in Penuel te zongh in a na ci uh hi.
9 “Cidam ludam in hong heak kik tu khi hi, tuasia ciang na tausaang uh baltham tu khi hi,” ci hi.
10 Zebah le Zalmunna sia a ngalkaphonpi taw Karkor ah om hi. Sennealngam minamte ii ngalkap bup sung pan 15,000 khawng bek taanglai hi. Ngalkap 120,000 kithatlum hi.
11 Gideon in sennealngam hui Nobah le Jogbehah ii nisuana sang lampi zui in, ngalkaphonpi sia heakkhol ngawlin sim hi.
12 Midian kumpite nii, Zebah le Zalmunna te taikeak ahihang ama in del in pummat hi, a ngalkaphonpi bup patau keaksak hi.
13 Gideon sia ngalphual panin hong heak kik ciang Heres Mualciangh tawn a,
14 ama in Sukkoth pan khangmoi tangval khat manin thu dongh hi. Tangvalpa in Gideon atu in Sukkoth khua lampui 77 teng ii min atsak hi.
15 Tua zawkciang Gideon sia Sukkoth khua mite kungah hong pai a, “Nong hu nop ngawl uh sia na ciamtee lai uh ziam? Zebah le Zalmunna ka mat zawk ngawl lai hu in, a toi mama ka ngalkapte an kong piaksak buatu ci nu hi. Pha hi, hi sungah amate om hi!” ci hi.
16 Ama in tuasia zawkciang sennealngam pan ling le ngeaukal la in tuate taw Sukkoth khua lampuite vel in daan pia hi.
17 Ama in Penuel khua a tausaang sia pheltham in tua khua mite thatlum hi.
18 Zebah le Zalmunna munah Gideon in, “Tabor a na thalup uhte bangbangziam?” ci in dongh hi.
Amate in, “Amate nangma taw kibang hi — khat simin kumpipa tapate taw kibang hi,” ci in zo hi.
19 Gideon in, “Ama sia ka suapuite hi, ka nu ii tapate hi. Amate that buale uhte no zongh hong thatlum ngawl tu in ka kiciam hi,” ci hi.
20 Tuaciang a tapa lianbel Jether munah, “That in” ci in sawl hi. Ahihang patang sia in a namsau a dok bua hi. Ama sia patangno hi lai ahikom a khensat thei zok bua hi.
21 Tuaciang Zebah le Zalmunna in Gideon munah, “Hong pai ta'n a, nangma hong that ta'n. Pasal nasep a seam tu sia pasal ma kul hi,” ci uh hi. Tua ahikom Gideon in thatlum a, a kalaoh ngawng ah kizepnate laaksak hi.
22 Tuasia zawkciang Israel mite in Gideon munah, “Ko hong uk ta'n, nang le na suan na paalte Midian te khut sung pan hong hun khia zo ni hi,” ci uh hi.
23 Gideon in, “Kei ka hi zong ka tapa ahizong no ii uk pa hong suak ngawl tu khu hi, Topa sia no hong uk pa hi tu hi,” ci in zo hi.
24 Ahizong ama in a kampau zomto a, “No tung pan na khat hong ngensak tavun. mi simin na bilbaa laak uhte kei hong pia tavun. Midian te in sennealngam midangte bangma in bilbaa a baa uh hi.
25 A mite in, “Lungdam takin tuate hong pia tu khu hi,” ci in zo hi. Amate in puan khat pha in, mi simin bilbaa a laak tek koi uh hi.
26 Gideon ii saan bilbaate a kingawmin kilogramme 20 pha a, tuate sungah kizepna dang, le Midian kumpipa puan silh sandup le, kalaoh ngawng aw te kihel ngawl lai hi.
27 Gideon in khamh milim khat vawt a, a pianna khua Ophrah ah koi hi. Israel te theampo in Pathian nusia in tua munah milim bia tu in pai uh hi. Tuasia in Gideon le a bangkua atu in thaang khat hong suak hi.
28 Tuabangin Midian te sia Israel te in zo a, amate sia ngual a lauthawn zo tu ahi nawn bua uh hi. Gideon thi dong ngam sungah kum 40 kilemna om hi.
Gideon ii Thina
29 Gideon sia a inn ah heak kik in tua munah teang hi.
30 Ama in tapa 70nei hi, banghang ziam cile zi tam ma nei hi.
31 Ama in Shechem ah zino khat nei a, tua taw a tapa sia a min Abimelech phuak hi.
32 Joash ii tapa Gideon sia a huai a teakin hong thi a, Abiezer bee le phung ii khua Ophrah khua a pa thaan ah kiphum hi.
33 Gideon thi zawkciang Israel mite sia Pathian tungah thumaan ngawl leleau a, Baal te bia uh hi. Thuciamna-ii-Baal sia amate ii pathian in hong nei hi,
34 tuaciang amate in Topa a Pathian ii a kiim a paam a ngalte khut sung pan a hunpa na a seam nawn bua hi.
35 Israel atu in phatna a vawtna teng huvau in Gideon bangkua tungah amate in lungdamna a nei meal bua uh hi.