10
Tola
1 Abimelech thi zawkciang Dodo ii tupa, Puah ii tapa Tola sia Israel te suatakna pia tu in hong pai hi. Ama sia Issachar nam hi a, Ephraim mualtung ngam Shamir ah teang hi.
2 Ama sia Israel te ii lampui in kum 23 sung seam hi. Tua zawkciang ama thi a Shamir khua ah kiphum hi.
Jair
3 Tola pai zawkciang Gilead panin Jair hong pai hi. Ama in Israel sia kum 22 lampui hi.
4 Ama in tapa 30 nei a laa 30 tungah to uh hi. Amate in Gilead ngam ah khuapi 30 nei in, tuate sia Jair khuanote kici lai hi.
5 Jair thi in Kamon khua ah kiphum hi.
Jephthah
6 Khatvei ma Israel te in Baal te, Astarte te, Syria te, Sidon te, Moab te, Ammon te le Philistia te ii pathiante zongh a biakna uh taw Topa tungah maw uh hi. Amate in Topa nusia uh a, ama a biak uh tawp hi.
7 Tua ahikom Topa sia Israel te tungah thin uuk a, Philistine te le Ammon te in amate zothalsak hi.
8 Amate in Gilead ngam Jordan nisuana Amor ngam a teang Israel te sia nengniam in kum sawm le kum liat sung vawtsia uh hi.
9 Ammon te in Judah, Benjamin, le Ephraim namte sim tu in Jordan ngun ngawngawn hong kaantan uh hi. Israel sia ngim nga mama hi.
10 Tua zawkciang Israel te au in Topa tungah, “Nangma tungah hong maw zo khu hi, nang ka Pathian uh kong nusia a, Baalte ka bia uh hi,” ci uh hi.
11 Topa in hi bangin zo hi: “Egypt te, Amor te, Ammon te, Philistine te,
12 Sidon te, Amalek te le Maon te in hun bosa sungah hong nengniam a, tuaciang in keima ko in nong au uh hi. Tuate khut sung pan hong suatak ngawl ka na khi ziam?
13 Ahihang nong nusia veve uh a, pathian dangte na bia uh hi, tua ahikom hong suatak kik ngawl tu khi hi.
14 Pai tavun a, na teal uh pathiante munah ko tavun. Amate in ngim na nga uh ciang hong suatak tahen.”
15 Ahihang Israel mite in Topa tungah, “Ko maw zo khu hi. Na uuk po hong vawt ta'n. Ahizong, nong hesuakna in, tu ni in hong hun ta'n,” ci uh hi.
16 Tua ahikom amate in ngamdang pathiante vawkin, Topa bia uh hi; tuasia ciang ama sia Israel te ii ngim ngana tungtaang ah a thinnuam ngawl hi.
17 Tua zawkciang Ammon ngalkaphonpi sia Israel te sim tu in Gilead ah ngiaphual saat hi. Israel mite zongh hong kikaitua uh a, Gilead ngamsung Mizpah ah ngiaphual saat uh hi.
18 Tua munah mipite le Israel namte ii lampuite in amate khat le khat kidongh in, “Ammon te taw kidona sungah akua in hong lampui tu ziam? Hong lampui pawpo sia Gilead ah a om mihing theampo ii lampui hi tu hi,” ci uh hi.