11
1 Gilead pan ngalhang ngalkap Jephthah sia, pumpi kizuak numei khat ii tapa ahi hi. A pa Gilead in
2 a zi taw tapa dang nei a, amate hong khan uh ciang Jephthah sia inn panin hawlkhia uh hi. Amate in ama mun ah, “Nang in ih pa ngamh bangma lua thei ngawl tu ni hi; nang sia nu dang khat ii ta ni hi,” ci uh hi.
3 Jephthah zongh a suapuite kung pan tai in Tob ngam ah teang hi. Tua munah mihing mannung ngawl pawlkhat ama in pawlvawt a, tuate taw kithawl uh hi.
4 Ammon te ii Israel te sim tu in a kuan sia tua zawk hun tawmvei zawkciang ahi hi.
5 Hi thu hong pian ciangin Gilead ngam lampuite in Tob ngam panin Jephthah cia pui kik tu in hong pai hi.
6 Amate in, “Ammon te ih do zawk natu in hong pai ta'n a, hong lampui ta'n,” ci uh hi.
7 Ahihang Jephthah in, “Nong etsat lawlawm hu in ka pa inn sung pan hong hawlkhia nu hi. Tu in na ngim nga uh ciang banghangin kei kungah hong pai nu ziam?” ci in zo hi.
8 Amate in Jephthah mun ah, “Nang kungah tu in kong pai uh sia banghang ziam cile, ko taw pawlin Ammon te nong sim pui natu le Gilead mi teng nong lampui tu dei khu hi” ci uh hi.
9 Jephthah in, “Ammon te sim tu in nong ciapui uh a, Topa in zawna hong pia le no hong ukpa suak tu khi hi,” ci hi.
10 Amate in, “Lungkim khu hi. Topa sia koma tetti hi,” ci in zo kik hi.
11 Tua ahikom Jephthah sia Gilead lampuite taw tonkhawm a, mipite in ama sia lampuipa le a ukpa in koi uh hi. Jephthah in Mizpah khua Topa mai ah a deina teng son hi.
12 Tuaciang Jephthah in Ammon kumpipa kungah kamtaite paisak a, “Ko nong kihau puina sia bang thu ziam? Banghangin ka ngam uh hong sim ni ziam?” cisak hi.
13 Jephthah ii kamtaite tungah Ammon kumpi pa in, “Egypt panin Israel te hong pusua lai in, amate in ka ngam sia Arnon ngun pan Jabbok ngun le Jordan ngun dong hong laaksak hi. Tu in tuasia kam tam ngawlin nong piak kik uh kul tu hi,” ci in zo hi.
14 Jephthah in Ammon kumpipa kungah kamtaite paisak kik a,
15 hi bangin zo kik hi: “Israel in Moab ahibuale Ammon te leitang laaksak ci thu sia maan ngawl hi.
16 A thupiang tatak sia hi bang hi: Israel te in Egypt a nusiat uh ciang, sennealngam kaantan in pai a, Aqaba Tuidok ah, tua mun pan Kadesh hong theng uh hi.
17 Tuasia ciang Edom kumpipa tungah kamtaite paisak a, a ngam kaantan thei natu ngen hi. Ahihang Edom kumpipa in amate a kaantansak bua hi. Amate in Moab kumpipa tungah zongh ngen uh hi, ahihang kuama in a ngam kaantan tu a oai bua uh hi. Tua ahikom Israel te sia Kadesh ah taam uh hi.Ref 11:17 Mi 20:14-21
18 Tuaciang amate sia sennealngam kaantan in, Edom le Moab ngamte kiimkot a, Moab ii nisuana sang Arnon ngun langkhat a thet dong paitan uh hi. Amate in tua munah ngiaphual saat ahihang Arnon a kaantan bua hi, banghang ziam cile tuasia Moab ngamngi ahihang hi. Ref 11:18 Mi 21:4
19 Tuasia ciang Israel te in Heshbon a om Amor kumpipa Sihon tungah kamtaite paisak a, a ngam kaantan in amate ngamsung a tot natu ngen uh hi.
20 Ahihang Sihon in Israel te tuabangin a paisak bua hi. Ama in a ngalkap buppi khawmtua in kuan a, Jahaz ah ngiaphual saat in, Israel te sim hi.
21 Ahihang Topa, Israel te ii Pathian in Sihon ngalkaphonpi sia Israel te in zosak hi. Tua ahikom Israel te in tua ngam a teang Amor te ii ngam nei theampo la uh hi.
22 Amate in Amor te ii ngam theampo, thangsang Arnon pan saksang ah Jabbok dong, tuaciang nisuana sang sennealngam pan nitumna Jordan dong la uh hi. Ref 11:19-22 Mi 21:21-24
23 Tua hi a, Israel a mite atu Amor te a notkeak sia Topa Israel te ii Pathian ahi hi.
24 Tuasia la kik tu in hanciam tu ni ziam? Na pathian Chemosh ii hong piak teng keam thei ni hi. Ahihang ko ka hi uh le Topa ka Pathian hong piaksa teng keam tu khu hi.
25 Zippor ii tapa Moab kumpipa Balak sangin nangma phazaw kisa ni ziam? Ama in Israel sia thato ngeingawl hi, ahi ziam? Ama in ko hong sim tu in hong kuan ngei na ziam?Ref 11:25 Mi 22:1-6
26 Kum zathum tawntung Israel te in Heshbon le Aroer, tuaciang a kiim a paam khuate le Arnon ngun vaal a khuapi teng la hi. Hi hunte theampo sungah banghangin la kik ngawl ni ziam?
27 Kei sia no tungah bangma tat khial hong nei ngawl khi hi. Kei tungah ngal nong phot uh sia noma khial zaw nu hi. Topa sia thukhenpa hi. Ama in tuni in Israel te le Ammon te kilaklaw ah thu khensat tu hi.”
28 Ahihang Jephthah ii kam thaak huvau Ammon kumpipa in awlmawk ngawl hi.
29 Tuasia ciang Topa ii thaa sia Jephthah tungah hong theng hi. Ama in Gilead le Manasseh kaantan in pai a, Gilead ngam Mizpah ah hong heak kikin, Ammon ah paitan hi.
30 Jephthah in Topa tungah kamciam pia a: “Ammon te nong zosak le,
31 zawna taw ka cia ciang, ka inn panin kei hong muak tu in hong pusuak phit mihing sia meihal biakpiakna in kong pia tu hi. Ama sia sangaw biakpiakna in nang kong pia tu hi,” ci hi.
32 Tuabangin Jephthah in Ammon te sim tu in ngun kaantan a, Topa in zawna pia hi.
33 Ama in amate sia Aroer pan Minnith kiim ngamte, a vekpi in khuapi kul teng Abel Keramim dong vaat pheang hi. Tua kithalupna nasia mama a, Ammon te sia Israel te in zo hi.
Jephthah ii Tanu
34 Jephthah sia Mizpah ah hong cia kik ciangin ama muak tu in a tanu sia daalkual khuangno tum kawmin laam a hong pusuak hi. Ama sia Jephthah ii khat bek a hin ta ahi hi.
35 Ama in a tanu a mu ciang heena taw a puansilh eautham a, “Aw, ka tanu! nang in ka thin hong tamhthamsak ni hi! Kei hong thinnasak tu sia banghang nang keak hi luilam ni ziam? Topa tungah a ciliap huai kamciam ka piaksa hi a, tuasia dawk kik thei nawn ngawl khi hi!” ci hi. Ref 11:35 Mi 30:2
36 A tanu in, “ Topa tungah kamciam pia zo na hi le Ammon na ngalte tungah Topa in phulamna hong pia zo ahiciang kei tungah vawt tu na ci bangin vawt in,” ci hi.
37 Ahihang ama in a pa mun ah, “Hi na khat kei atu hong hisak lai ta'n. Ngaknu thiangtho in ka thi tu sia, ka lawmte taw mual tungah vak kawkoai a, khuangai in ka om thei natu, keima a tuamin tha nii hun hong pia ta'n” ci hi.
38 Ama in a tanu sia tha nii sung, a paisak hi. Ama le a ngualtamhte sia mual tungah kaato uh a, khuangai in om uh hi, banghang ziam cile ama sia pasal nei ngawl le ta nei ngawlin thi tu ahihang hi.
39 Tha nii zawkciang ama a pa kungah hong cia kik hi. A pa in Topa tungah a kamciam bangin vawt a, ama sia ngaknu thiangtho in thi hi.
Hi sia in Israel ngam ah ngeina khat hong pianna hi a,
40 kum simin Israel ngaknute sia ni li sung veu Gilead khua mi Jephthah ii tanu atu a khuangaina lakna in pusuak uh hi.