12
Jephthah le Ephraim mite
1 Ephraim pasalte sia ngal kido natu kinging hi; amate in Jordan ngun kaantan in, Zaphon sangah zuan a, Jephthah mun ah, “Ammon te sim tu ngamngi kaantan in pai napi, banghangin ko hong paa ngawl ni ziam? Na inn taw hong halcip tu khu hi!” ci hi.
2 Ahihang Jephthah in amate munah, “Ka mite le kei sia Ammon te taw nasia takin kihauna nei khu hi. Hong sam khi hi, ahihang kei hong suatak ngawl nu hi.
3 Hong suatak ngawl tu ci in ka mu ciang ka nuntakna aitaa in amate do tu in ngamngi kaantan khu hi, tuaciang Topa in amate hong zosak hi. Tua ahikom tu in kei hong sim tu in banghangin hong pai nu ziam?” ci hi.
4 Tua zawkciang Jephthah in Gilead mite theampo khawmtua a, Ephraim mite simin zo uh hi. Ephraim te in, ‘Ephraim le Manasseh a om no Gilead te sia Ephraim te a taisante nu hi’ ci uh hi.
5 Ephraim te a suatak ngawl natu in, Gilead te ii Jordan a kaantan thei natu mun teng la uh hi. Ephraim mite khat pawpo suakta nuamin kaantan tu a ngen le, Gilead te in, “Nang Ephraim te na hi ziam?” ci in dongh hi. Ama in, “Hi ngawl khi hi” a ci le,
6 tuasia ciang, “Shibboleth ci in” ci in sawl hi. Ahihang ama in “Sibboleth” ci hi, banghang ziam cile ama in tua kammal sia a maan in a lo thei bua hi. Tuasia ciang ama manin Jordan kaantanna teng mun khat ah thatlum uh hi. Tua hun sungin Ephraim mite 42,000 that uh hi.
7 Jephthah in Israel te kum luk sung lampui hi. Tua zawkciang ama thi a, Gilead ngam a khua sungah phum uh hi.
Ibzan, Elon le Abdon
8 Jephthah zawkciang Bethlehem pan Ibzan in Israel te lampui hi.
9 Ama in tapa 30 le tanu 30 nei hi. Ama in a tanute sia phung dangte taw teangsak hi, a tapate atu phung dang panin mo 30 pui hi. Ibzan in Israel te kum sali lampui hi,
10 tua zawkciang ama thi a Bethlehem ah kiphum hi.
11 Ibzan zawkciang Zebulun pan Elon in Israel te kum sawm sung lampui hi.
12 Tua zawkciang ama thi a, Zebulun ngam Aijalon ah kiphum hi.
13 Elon zawkciang, Pirathon pan Hillel tapa Abdon in Israel te lampui hi.
14 Ama in tapa 40 le tupa 30 nei a, tuate in laa 70 tungah to uh hi. Abdon in kum liat sung Israel te lampui hi.
15 Tuaciang ama thi a, Amalek te mualtung ngam, Ephraim ngamsung Pirathon khua ah kiphum hi.