58
A maan An tanna
1 Topa in, “A nging theiza in au vun! Israel ka mite tungah a mawna a khialnate son vun!
2 Amate in ka pai ziate heak tu le ka thukhamte zui tu sia ka lawp uh ci in ni simin kei hong bia uh hi. Amate in kei hong biak sia nuamsa a, tuaciang a maan thukhamte ka piasak nuam uh hi ci hi,” ci in son hi.
3 Mite in, “ Topa in hong phawk ngeingawl ahile eite in banghangin an tang tu hi ziam? Ama in hong awlmawk ngawl ahile banghangin eite in an ne ngawlin om tu hi ziam?” ci in dongh uh hi.
Topa in amate tungah, “A maan tak ci leang an na tan kawmin noma aituam phattuam natu te na del uh a, na naseamte na zawthawk vawt uh hi.
4 Na an tanna in nang hong ngoltolsak a, ngual taw kihau in hong kibuansak hi. Hi bang an tannate nam taw nong thungetnate ngai tu in nong um uh ziam?
5 An na tan ciang noma le noma ngim kipia na hi uh hi; lopate bangin na lu na kunsuk uh a, na lup natu in khau-ip puan le vutte na pha uh hi. Tua sia an tang na ci uh sia ahi ziam? Tuasia taw lungkim tu in nong um uh ziam?
6 “Kei dei an tanna sia hi bang ahi hi: zawthawkna thikkolte le thukhaikim ngawl a kivawtna hakkolte suutin, zawthawk vawt a thuakte suataksakna ahi hi.
7 Ngilkialte na an uh hawm vun a, inn nei ngawl mizawngte atu in na inn uh hon vun. Puan silh tu a nei ngawl mite puan pia vun a, na beete na hu thada heak vun. Ref 58:7 Mt 25:34
8 “Kong deisakna sia zing ni bangin na tungah hong taang tu a, na liamna mate dam pal tu hi. Note hong ngum tu in note taw kong omkhawm tawntung tu hi; keima hong om in na kiim na paam theampo panin kong dal tu hi.
9 Thu na nget uh ciang, kong zo tu hi. Nong sam uh ciang kong zo kik tu hi.
“Ngual na zawthawk vawtna, ngual na zawnsaknate le kam sia na paunate theampo na kheal uh le;
10 ngilkialte an pia in, kitaangsapna a nei mite na lungkimsak uh le; na kiimkot uh a khuazing sia sun khuavak a suak tu hi.
11 Tuaciang note lam kong pui tawntung tu a, naphate taw kong lungkimsak tu hi. A ciidam a thahatin kong koi tu hi. Tui tam a nga huan khat, a kang ngeingawl ciktui khat taw na kibang tu uh hi.
12 Taanghlai pekin a siate na mite in sa kik tu a, a tawdappha luite tungah sa kik tu uh hi. Note sia khua uumna pangte a sa kik, inn sia sate a puua kik mihingte hong kici tu hi,” ci hi.
Sabbath Tanna Thaman
13 Topa in, “Sabbath sia thiangthosakin tua ni in noma meet natu bek zong ngawlin; ka ni thiangtho ni sia man neisakin, khualhaw ngawl, naseam ngawl ahibuale tua ni in kam mannung ngawl pau ngawlin na omna taw zatakna na pia uh le,
14 keima na, na sepna uh panin hong pai lungdamna na nga tu uh hi. Leitung mun theampo ah hong ki upat tu in kong vawt tu a, na taanghpupi Jacob tungah ka piak leitang sia lungdam nuamsa in na lua tu uh hi. Topa, keima in ka son zo hi,” ci hi.