57
Israel te ii Milim Biakna sia Kiningkhiin
1 Miphate thi a, kuama in tua thu tel ngawlin, ngaisut zongin nei ngawl uh hi. Ahihang amate a thi uh ciang, khuangai tuasiatna lian bangma in amate nasak thei ngawl hi.
2 Ngamtat pha in a nungtate in a thi uh ciang thinnopna le tawlngakna mu uh hi.
3 No, mimawte awng, thu khenna thuak tu in hi munah hong pai tavun! Note in aisaante, nupa kipalngulte, le pumpi zuak numeite sangin na phazaw tuan bua uh hi.
4 Note in akua ciammui zazaan nu ziam? No, leilot mite in akua selno nu ziam?
5 Ta hong hausak pathiante ka bia uh hi ci in, tua thingkung thiangthote nuai ah numei le pa khialna na vawt uh hi. Luitui luanna hui ah a om suang hawngte sungah na tanote biakpiakna in na pia uh hi.
6 Tua mun panin suangnealte la in pathiante bangin na bia uh hi. Biakpiakna in amate tungah sapittui na buak uh a antang na puak uh hi. Hi bang teng theampo diksa tu in nong um uh ziam?
7 Mual saangte tungah biakpiakna pia tu le numei le pa khialna vawt tu in na pai uh hi.
8 Na inn mai kongkha sung sangah a mu thada huai na milimte na koi uh hi. Noma in kei nong nusia uh hi; na puante suutin sum taw na thapsa na deite uh taw lumkhawm tu in na lupna zai tung na zuan uh hi. Tuabangin tua munah na pumpi deina ah na lungkim uh hi.
9 Note in paaknamtui le sathaute kinoai in Molech pathian bia tu in na pai uh hi. Biak tu pathiante a zong tu in mun theampo, mithi khua ngawngawn ah kamtaite na paisak uh hi.
10 Tua pathian dangte na zonna uh in na toi uh a, ahizong na tawp thong ngei bua uh hi. A mu thada huai na milimte uh in thahatna hong pia ci in ngaisun na hikom na tha a zawm ngei bua uh hi.
11 Topa in, “Kei nong theam a, kei nong makngil cip natu uh in note hong lausak, tua pathiante sia a kuate ziam? Khuangei hial ka thim om hithiat manin kei hong zakta nawn ngawl nu ziam?
12 Na sep na vawt uh sia a maanin na ngaisun uh hi, ahihang na ngamtatna ka pholaak tu a, tuasia ciang na milimte in nang hong hu zo ngawl tu hi.
13 Huna ngen a na au ciang, tua na milimte in nang hong hun tahen! Vuimut khat in amate seamkeak tu hi! Ahihang kei hong muangte sia tua leitang tungah teang tu a, ka Biakinnpi sungah kei hong bia tu uh hi,” ci hi.
Pathian ii Huna le Damsakna Kamciam
14 Topa in, “Ka mite ka kungah hong heakkik tahen. Amate lampi a nokkhaksak theampo khiin vun! Lam ziik vun a, zak vahial thei tu in koi vun!
15 “Keima in a saang le a thiangtho, a tawntung a nungta Pathian ka hi hi. Keima in a saang le a thiangtho na munah ka teang hi, ahihang mite ii hong muanna le lametna a nga kik thei natu in mawna kisiik kik a, a kiniamkhiak vadeam mite taw zongh in ka teang khawm hi.
16 Keima in ka mite nuntakna ka pia a, amate mawsiat tawntung ngawlin, amate tungah a tawntungin ka thin uuk ngawl tu hi.
17 Amate ii mawna le duhopna hu in amate tungah ka thin uuk hi, tua hu in amate daan pia in ka nusia hi. Ahihang amate a thin uh pui in a ngamtat ngei bangin ngamta veve uh hi.
18 “Amate ngamtatnate ka mu zo hi, ahihang amate ka damsak tu hi. Amate lampui in hu in, a hee a kapte ka heeneam tu hi.
19 A naina le a khuala na ah a omte theampo tungah, thinnopna ka pia hi! Ka mihingte ka damsak tu hi. Ref 57:19 Eph 2:17
20 Ahihang mi ngilote sia a kilok tawntung, a tuihualte ii buan le nin a paipui, a thim ngeingawl tuipi taw kibang hi.
21 Mawneite atu in ngammuanna om ngawl hi,” Topa in ci hi. Ref 57:21 Is 48:22