59
Kamsaangpa in Mite ii Mawna Khialna Ningkhiin
1 Topa sia note hong ngum tu in thaneam leih in, huna na ngetna aw za tu in nangong leih tu in ngaisun heak vun!
2 Na mawna na khialnate uh hangin ama in hong za ngawl ahi hi. Pathian bia tu na hanciam uh ciang Pathian taw hong khentan sia na mawnate uh ahi hi.
3 Note in leilot thu sonna, thazaw suanna, le mihing thana taw na maw uh hi.
4 Thukhenzum ah na kaa uh hangin note sang pan thumaanna na nei bua uh hi. Thu na zaw natu in leilot thu na suang uh hi. Ngualdang nat natu na tup uh bang na seam uh hi.
5-6 A sia vawt tu na sawmnate sia nguu nei ngulpui khat ii tuuite bang ahi hi. A tuui khat sutham lete ngul khat pusuak hi! Ahihang a sia na tup na sawmte in nang tungah phattuamna hong pia ngawl tu hi — tuate sia momkhau taw a kitak puan bangin a luithawthong hi tu hi.
7 A sia vawt tu na tum tawntung uh a, tuasia vawt tu kaal na ngakla thei uh hi. Khialna mawna nei ngawl mite thalup tu na haisaang ngei bua uh hi. Na paina pawpo uh a sia a lalin na nusia uh a, Ref 59:7-8 Rom 3:15-17
8 note omna po ah kuama ngammuang ngawl hi. Na sep theampo uh maan ngawl hi. Note in lamkoai khat na zui uh a, tua lampi a zuite kuama thin muang ngeingawl tu hi.
Mihingte in A mawna Pualaak
9 Mihingte in, “Ei hong zawthawk vawtte khut sung panin Pathian in banghangin hong ngum ngawl ziam ci thu tu in ih he hi. Eite, lam ih pai natu in khuavak ih lam en hi, ahihang khuazing bekma om a,
10 mittawte bangin ih zawt kawkoai hi. Eima in suntang takpi in zan bang keak le, mithi khua, khuazing sung om bang keakin ih lutu hi.
11 Eite lauthawngin ih thinngim hi. Zawthawk vawtna pan le ahi ngawlin hong kivawtna pan hong ngum tu in Pathian ih thangai a, ahihang bangma piang ngawl hi.
12 “ Topa awng, nang tungah khialna lian kong vawt uh tam mama hi. Ko ii mawna khialnate in kote hong kawk hi. Tuate pha takin ka he siat uh hi.
13 Nang kong langpan uh a, hong nialin, na nung kong zui bua uh hi. Midangte zawthawk vawtin nang kung pan lam ka pial uh hi. Ka ngaisutnate uh khial hi; ka thu son uhte leilot thu ahi hi.
14 Thukhaikimna kinilkeak a, a maan thu in hong neak thei ngawl hi. Thumaan thutak in mihon kikhopna sungah lutu a, thumaanna in tua munah om natu mun nga zo ngawl hi.
15 Thumaanna tawm leilam ahikom a sia a vawt nawn ngawlte in ngual ii vawtsiatna lian thuak hi,” ci uh hi.
Topa in A mite Suatak tu Kithoai
Topa in hi thu mu zo a, thukhaikimna om ngawl ahikom a lungkim ngawl hi.
16 Zawthawk vawtna a thuak mite a hu tu in mihing khat beak zong om ngawl a mu ciang Topa in lamdang sa hi. Ref 59:16 Is 63:5 Tua ahikom amate suatak tu le ngalzawna nga natu in ama in a vaangletna zangh tu hi.
17 Ama in thukhaikimna sia ngaldalna thik laktong puasilh bangin silh tu a, ngupna vaangletna sia thik lukhu bangin khu tu hi. Ngimna a thuak mite luangin phulaakna le daan piakna, a pha ngawlte a pha vawt nopna thinsung sia, puan bangin silh tu hi. Ref 59:17 Eph 6:14,17; 1 Th 5:8
18 Ama in a ngalte sia a khuala na ngam ah a teangte ngawngawn a ngamtatna taw kizui in daan pia tu hi.
19 Ni suana pan nitumna dongah a teang mite theampo in ama le a vaangletna lian sia kiita tu uh hi. Ama in nguntui pawm bang le, vuipi bangin hong pai tu hi.
20 Topa in a mite tungah, “Keima in note hong dal tu le mawna khialnate pan a kisiik note theampo ngum tu in, Jerusalem ah kong pai tu hi. Ref 59:20 Rom 11:26
21 Note taw thuciamna khat ka vawt hi: ka vaangletna le ka thuhilnate a tawntung atu in note kong pia zo hi, tu pan kipan note in ka thu nong ni tu uh a, na tate le na suan na paalte in a tawntungin ka thu hong nit natu uh in na hil tu uh hi,” ci hi.