56
Pathian ii Mite sungah Minam Theampo Kihel tu
1 Topa in a mihingte tungah, “Khuangei ngawlin note hong ngum tu ka hikom, a thumaan le a thutang sia seam vun.
2 Sabbath tang tawntungin a zangh khial ngawl mite thupha ka pia tu hi. A sia bangma a ngamta ngawlte thupha ka pia tu hi,” ci hi.
3 Pathian ii mite taw a kikop sa ngamdangmi khat in, “ Topa in kei sia ama ii mite taw Pathian hong biakhawmsak ngawl tu hi,” ci heak hen.
A kingetsa pa khat in ta nei thei ngawl tu ahikom, Pathian ii mite sungah a kihel thei ngawl tu ci in ngaisun ngei heak hen.
4 Topa in tuabang a ngaisun pa tungah, “Sabbath na tanna taw kei nong zatak vawt a, ka thuciamna sia thumaan tak lenin kei nong lungdamsak le,
5 Ka Biakinnpi sung le ka mihingte sungah na min sia tanute tapate na neina taw teptee tu sangin khuangei kiciamtee zaw tu hi. Nang hong kimangil ngei nawn ngawl tu hi,” ci hi.
6 Topa in ama mihingte sungah a kihel, ama it in a na a seam, Sabbath tang a, ama ii thuciamna kip takin a len ngamdangmite tungah:
7 “Biakna taw kisai ka mual thiangtho Zion ah kong paipui tu a, ka thungetna inn sungah kong thinnuamsak tu hi, ka biaknatau tungah nong piak biakpiaknate kong saang tu hi. Ka Biakinnpi sia minam theampo atu in thungetna inn kici tu hi,” ci hi. Ref 56:7 Mt 21:13; Mk 11:17; Lk 19:46
8 Ngamdang a saltanna pan ama mihing Israel te inn ah a ciapui pa, Vaanglianpipa Topa in, amate taw kikop tu in midangte kong paipui lai tu hi ci in kamciam pia zo hi.
Israel ii Lampuite Kipuavawk
9 Topa in ngamdang minamte tungah ngamsa bangin hong pai in ama mite a neaktum natu in son zo hi.
10 Ama in, “Ka mite kidop natu thupia tu in, a kingaisun lampuite theampo, a mittaw siat uh hi! Amate in bangma he ngawl uh hi. Amate sia ngual a nak ngawl, inncing uite taw kibang a, lulumin mangman bek uh hi. Amate in mumut ma nuamsa uh hi!
11 Amate sia a deiza a nga ngeingawl, a duhop uite taw kibang uh hi. Hi lampuite in telthiamna bangma nei ngawl uh hi. Amate uuk bang tekin ngamta in a phattuam natu tek zong uh hi.
12 Hi sapittui khamte in, ‘Sapittui tawm la sin tawng i, tuaciang ih dawn zawkza dawn tawng! Tuni sangin zing ciang nuam zaw kan tu hi!’ ci uh hi,” ci hi.