55
Pathian ii Piak Hesuakna
1 Topa in,
“A dangko theampo awng, hong pai tavun — hi lai ah tui om hi!
Hong pai tavun, no sum nei ngawlte awng — an lei vun a ne vun!
Hong pai tavun! sapittui le khuinoai lei vun —
nang atu bangma man ngawl tu hi! Ref 55:1 Tpl 21:6; 22:17
2 Banghangin ngilva dangva na ngawl po in sum zangh thawthong nu ziam?
Banghangin na thalaw sa sumte zangh napi ngilkial lalai nu ziam?
Hong ngai tavun a, kong ci bangin seam vun,
tua hile an limbel na ne tu uh hi.
3 “Tu in ngai vun, ka mite awng, ka kungah hong pai tavun;
ka kungah hong pai tavun tua hile nuntakna na nga tu uh hi!
Note taw thuciamna kho khat ka vawt tu a,
David tungah ka kamciamsa thuphate kong pia tu hi. Ref 55:3 Sawl 13:34
4 Keima in ama sia minamte lampui le a ukpa khatin ka koi a,
ama tungtawnin mihonpite tungah ka vaangletna ka lak hi.
5 Tu in note in ngamdang minamte na sam tu uh hi;
khatvei lai in amate in note hong he ngawl uh hi,
ahihang tu in note taw kikop tu in hong tai tu uh hi!
Keima, Topa na Pathian, Israel te ii a thiangtho Pathian in,
hi te theampo ka piangsak tu a; minthanna le upatna note kong pia tu hi,” ci hi.
6 Tu in Topa hong nai ahiciang,
ama kung zuan vun a, ama tungah thungen vun.
7 Mi seksolte in amate ii nuntakna zia nusia tahen a,
a ngaisutna zia kheal tahen.
Topa ih Pathian kungah amate in zuan tahen;
Topa in hong hesuak thei a,
mawna hong maisak papai hi.
8 Topa in, “Ka ngaisutnate note ii
ngaisutna taw kibang ngawl a,
ka paiziate note ii paizia taw kilamdang hi.
9 Leitung panin vantungte a saan za in,
keima paizia le ka ngaisut ziate sia
no ii paizia le no ii ngaisutna
ziate sangin saang zaw pek hi.
10 “Ka kammal sia leitung tuibuak tu in
van pan hong taaksuk vuuk le nguatui taw kibang hi.
Tuate in ankungte khangtosakin
ciin tu anciite le neak tu an piangsak hi. Ref 55:10 2 Cor 9:10
11 Keima pau kammal sia zongh tuabang ma hi tu a —
sep tu a ka ngealna bangin taangtung a;
ka sawl teng theampo seam tu hi.
12 “Lungdamna taw Babylon na nusia tu uh hi;
kilemna taw khuapi pan hong kipaipui tu hi.
Mualliante le mualnote in lasa tu uh a,
thingkungte lungdam in au tu uh hi.
13 Tu laitakin lingte omna munah cypress kungte po tu hi;
lingkungte luangin myrtle kungte poto tu hi.
Tua in a tawntung a kho tu lim khat hi tu a,
Keima Topa ii sep sate hong phawk kiksak khat hi tu hi,” ci hi.