52
Pathian in Jerusalem Suatak tu
1 Jerusalem awng, thahat in a, lian kik in!
Pathian ii a thiangtho khuapi awng, puan et hoi silh in!
Pathian um ngawl mite
na kongpite sungah tum kik ngei nawn ngawl tu uh hi. Ref 52:1 Tpl 21:2,27
2 Jerusalem awng, nangma le nangma kisuaktasak in!
Leivui sung pan thoto in a, na kumpi tokhum tungah to in!
A kiman Zion mite awng, no hong khiina thikkhaute suut vun!
3 Vaanglianpipa Topa in a mite tungah, “Sal na tan uh lai, no atu in sum hong kipiaksak ngawl hi; tuasia bangma in no hong kisuatak natu in bangma hong kipiaksak ngawl tu hi.
4 Egypt ngam sungah ngamdangmite bangin a teang tu in na pai uh lai in, noma uk thu in na pai uh hi; ahitazong, Assyria te in zawthawk thu taw no hong lakeak a, no atu in bangma hong pia ngawl hi.
5 Tu in Babylon ah tuabang ma in piang hi: note sia ngalmatte na hi uh a, no atu in bangma hong kipia ngawl hi. No hong ukte kiphasak, kihisak in kei hong melsia tawntung uh hi. Ref 52:5 Rom 2:24
6 Khatvei ciangin note tungah thu hong sonpa, keima Pathian ka hina thu na tel tu uh hi,” ci hi.
7 Mualte kaantan in thupha, kilemna thu puak a hong pai
kamtaipa khat ih mu tu sia lamdang lawlawm hi!
Ama in ngalzawna thangsak a, Zion tungah,
“Na Pathian sia kumpi ahi hi!” ci hi. Ref 52:7 Nah 1:15; Rom 10:15; Eph 6:15
8 Khuapi a cingte au uh a, lungdam in au khawm tek uh hi!
Zion ah Topa hong heak kik sia amate in a mit tek taw mu thei uh hi.
9 A kisia Jerusalem awng, lungdam in au keak vun!
Topa in a khuapi suatak tu a, a mite heeneam tu hi.
10 Topa in ama ii a thiangtho
vaangletna zangh tu hi;
ama in a mite ngum tu a,
leitung theampo in mu tu uh hi.
11 Biakinn vanh a pua note theampo awng, Babylon nusia vun.
A kikhaam vanhte thutha heak vun;
a thiangtho in om vun a, tuaciang nusia vun. Ref 52:11 2 Cor 6:17
12 Tutung sia manlang bingbung in nusiat kul ngawl tu hi;
suatak tu hanciam ngawl tu nu hi.
Topa na Pathian in note lam hong pui tu a,
na kiim na paam uh pan hong dal tu hi.
Ngim thuak Naseampa
13 Topa in,
“Ka naseampa in ama ii nasepna zo tu hi;
ama sia nasia takin kipatoai tu hi.
14 Mihing tam mama in ama
a mu uh ciang lamdang sa leih uh hi;
ama sia mihing taw
kibang ngawl za dongin a mealhem hi.
15 Ahihang tu in minam tam mama in ama lamdang sa tu uh a,
kumpite sia lamdang sa in pau thei ngawl liang tu uh hi.
A heak ngeingawl na pawlkhat amate in mu in tel tu uh hi,” ci hi. Ref 52:15 Rom 15:21