51
Jerusalem tungah Heenepna Kammalte
1 Topa in,
“Ngup tu dei a, kei kungah hu ngen tu in hong pai note awng,
ka thuson hong ngai tavun.
Nong paina uh suangpi,
hong kitaw na suangkhuk sia ngaisun vun.
2 Na taanghpupi Abraham le note pianna Sarah ngaisun vun.
Abraham ka sap lai in, ama in ta sel hi,
Ahihang keima in ama thupha ka pia a, tate ka pia hi;
Ama ii suan le paalte ka pungsak hi.
3 “Keima in a lalsa Jerusalem ah a teangte theampo ka hesuak tu hi.
Ama ii ngam sia sennealngam ahihang
Eden huan taw kibangin, huan khat ka suaksak tu hi,
Tualai ah lungdamna le thinnopna om tu a,
kei tungah lungdam hong ko in pokna la hong sak tu uh hi.
4 “Ka mite awng, hong ngai tavun, ka thusonte ngai vun:
Minamte tungah thu ka hil hi;
keima thukhamte in amate tungah khuavak puak tu hi.
5 Keima manlangin kong pai tu a, amate ka ngum tu hi;
ka ngalzawna tu hun hong nai zo hi.
Keima in minamte ka uk tu hi.
A khuala na ah a om ngamte in ka pai tu hong ngak hi;
amate in ka ngup tu lametna taw hong ngak uh hi.
6 Vantungte ento vun; leitung en vun!
Vantungte sia meikhu bangin mang vadi tu hi;
leitung sia puan lui taw kibangin paat vadil tu a,
a mite theampo sia tho bangin thi tu uh hi.
Ahihang keima ii ngupkhiatna ka piak sia kip tawntung tu hi;
ka ngalzawna sia a tawntung atu ahi tu hi.
7 “Thumaanna he in, na thinsung uh ah keima thuhilna a vom mite awng,
ka thu hong ngai tavun.
Mite in hong selno in hong lan ciangin lau heak vun;
8 amate sia ngetlungte ii neak puan bangin mang vadi tu uh hi!
Ahihang kong paipui ngupkhiatna sia kip tawntung tu hi;
ka ngalzawna sia a tawntungin kho tu hi,” ci hi.
9 Khanglo in, Topa awng, ko hong hu ta'n!
Na vaangletna zanghin ko hong ngum ta'n;
taanghlai hun a na zak ngei bangma in zangh in.
Tuipi ngulpui Rahab saatin a neensem pa sia nangma na hi hi.
10 Na hutsa mite in tui a kaantan thei natu in,
tui kaantanna lampi khat vawt a,
tuipi a kangsak sia zongh nangma na hi hi.
11 Na suataksak mite lungdamin thinnopna taw au a,
lasa in Jerusalem theng tu uh hi.
Amate a tawntungin heena khuangaina taw
kipealin lungdam tawntung tu uh hi.
12 Topa in,
“Keima in nang hong thahatsak pa ka hi hi.
Banghang lopa sangin ngei a nungta ngawl zaw, a thithei mihing kiita tu nu ziam?
13 Note hong piangsak, vantungte a phalhkeak,
leitung ii tawdapte a pha Topa mangil zo nu ziam?
No hong zothawte ii thin uukna le
no hong siasak nuamte, banghang kiita tawntungin nungta tu nu ziam?
Amate thin uukna in note bangma hong thutha thei nawn ngawl tu hi.
14 Thongtaakte sia
kisuatak pal tu hi;
amate khansau in,
nungta in an neak tu a kicing nei tu uh hi.
15 “Keima in Topa
na Pathian ka hi hi;
tuipi saukeak in
a tuihualte ka hawksak hi.
Keima min sia Vaanglianbelpa Topa ahi hi!
16 Keima in vantungte ka phalhkeak a, lei ii tawdapte ka pha hi;
Jerusalem tungah, ‘Nang in keima mihing na hi hi!
Nang tungah thu kong hil zo a, ka khut taw nang kong dal hi,’ ka ci hi,” a ci hi.
Jerusalem ii Thuakna A Tawpna
17 Jerusalem awng, khanglo in!
Nangma le nangma kiphong in tho in!
Topa ii a thin uukna taw hong piak daan piakna hai na dawn zo hi;
na taalsuk zo a, nang hong hoisak vatut hi. Ref 51:17 Tpl 14:10; 16:19
18 Nang lam hong pui tu kuama om ngawl a,
na mite sungah na khut pan
nang hong kai tu kuama om ngawl hi.
19 Nang tungah tuasiatna a thuapin hong tung zo hi:
na ngam sia ngal in siasak zo a, na mite pukthi zo hi.
No, hesuakna hong lak tu kuama om ngawl hi.
20 Lamking theampo ah na mite thazawm in puk uh a;
amate sia savaipa thaang sungah sangai awk taw kibang hi.
Amate in Pathian ii thin uuk tutna thuak zo uh hi.
21 Zukham bangkeakin a hoi vatut
ngimna a thuak no, Jerusalem mite awng,
22 Topa na Pathian uh in
no hong sungsia a
tuaciang, “Ka thin uukna taw
kong piak hai sia ka la kik hi.
No hong hoisak vatut sapittui sia na ne nawn buatu uh hi.
23 Tua hai sia, no hong nengcipte,
note lampi tungah hong sial a
ninteak bangin hong siikcipte tungah ka pia tu hi,” ci hi.