53
1 Mihingte in,
“Tu a ih thupuak sia akua in um thei tu ziam?
Hi thu sungah Topa ii khut akua in mu thei tu ziam? Ref 53:1 Rom 10:16; Jn 12:38
2 Leingum sungah zung a tha thingkung no khat bangin
ama ii naseampa a khanto sia Topa deina ahi hi.
Ama ih thusim tu in zatakhuaina ahibuale mealhoina nei ngawl hi.
Ih thinbot natu ngaibanna bangma nei ngawl hi.
3 Ama ih zawngsak a, ih nial hi;
ama in natna ngimna thuak hi.
Ama sia kuama in en beak ngawlin —
bangma ahi ngawl bang keakin bangma in ih heang bua hi.
4 “Ahihang ama in ei ii ih thuak tu natna teng thuakin,
ih ngim natu teng pua hi.
Tua kimlai in ama thuakna sia
Pathian ii daan piak hi ci in ih ngaisun hi. Ref 53:4 Mt 8:17
5 Ahihang eite ii mawna khialnate hangin ama liamna thuak a,
ih siatna hangin vuakna thuak ahi hi.
Ama ii daan thuakna taw eite ih dam a,
ama ii vuak a thuakna liammate hangin eite ih ciidam thiang hi. Ref 53:5 1 Pe 2:24
6 Eite ih vekpi in a mangthang tuute taw ih kibang a,
eima uukna san tek ah ih pai hi.
Ahihang eite theampo ii thuak tu a kilawm
daan thuakna sia ama ii tungah Topa in suan hi. Ref 53:6 1 Pe 2:25
7 “Ama sia nasia tak kivawtsia a, ahihang kiniamkhiakna taw thuak hi;
kam khat zongh huthe ngeingawl hi.
Ngaw tu bekin a om tuuno khat bang le
a mul meet tu bekin a kikoi tuu khat bangin,
ama in kam khat beak pau ngawl hi. Ref 53:7 Tpl 5:6
8 Ama sia kimanin thina thuak tu in thu kikhen a, kipaipui hi,
ama tung a piang tu thu sia
kuama in awlmawk ngawl hi.
Ih mite ii mawna khialnate hu in ama sia thina thuak hi. Ref 53:7-8 Sawl 8:32-33
9 Ama in leilot thu khat zongh son ngeingawlin,
ahibuale khialna khat zongh vawt ngeingawl hi napi,
mi seksolte taw thaan sungah kisial khawmin,
sumhaute taw kiphum khawm hi,” ci in zo kik uh hi. Ref 53:9 1 Pe 2:22
10 Topa in, “Hi bang a thuak natu sia keima deina ahi hi;
a thina sia mawna maisak natu in biakpiakna ahi hi.
Tua ahiciang ama in a suan le a paalte mu tu hi;
Ama a khansau in, ama tungtawnin ka tupna taangtung tu hi.
11 A khan sungah natna ngimna a thuak zawkciang,
ama in lungdamna nga kik tu hi;
a thuakna a luithawthong ahi ngawl sia ama in he tu hi,
Ama sia a thumaan keima naseampa hi a ka lung hong kimsak pa hi.
Ama in mihing tam mama ii thuak tu daan piakna sia thuak tu a,
ama thuakna hangin amate mawna ka maisak tu hi.
12 Tua ahiciang ama sia milian le
a vaanglian mite sungah upatna dinmun kipia tu hi.
Ama in lungkim takin a nuntakna pia a,
mihing siate thuak bangin thuak hi.
Ama in mimaw mikhial tam mamate ii dinmun la a,
amate ii mawna khialna a kimaisak natu in
thungetsak hi,” ci hi. Ref 53:12 Mk 15:28; Lk 22:37