30
Egypt taw A manh nei ngawl Thuciamna
1 Topa in: “Judah ngamukte a lal ahi hi, banghang ziam cile amate in kei hong langpan uh hi. Amate in kei ngealna ahi ngawlte zui in, kei deina langpanin thuciamnate vawt a, mawna khat zawkciang khat vawt thawthua uh hi.
2 Amate in kei ngaisutna hong dongh ngawlin huna ngen tu in Egypt ah pai uh hi. Egypt te ii huuk tu a thangai manin, Egypt kumpipa muang uh hi.
3 Ahihang kumpipa in amate hu zo ngawl tu a, Egypt te ii huukna in siatna taw tawp tu hi.
4 Amate ii tongciinte sia Egypt te ii khuapite ahi, Zoan le Hanes theng zo napi,
5 Judah mite in huna a muanmawk uh bang a pia zo ngawl, a muanhuai ngawl minam khat sia a muan thaak phawphot uh a kisiik tu hi,” ci in son zo hi.
6 Hi thu sia thangsang sennealngam sungah a om nganhingte taw kisai Pathian thupuak ahi hi: “Tongciinte sia tawpite teenna, a nguu nei ngulte le a leang thei ngulpui omna, a lauhuai ngam sungah vak kawkoai uh hi. Amate huna mal khat zongh a pia zo ngawl minam khat a piak tu in a manham letsongte, a kalaoh le a laate tungah suanh uh hi.
7 Egypt te ii a piak huna sia lui thawthong ahi hi. Tua ahikom Egypt sia, ‘Bangma hong law thei ngawl Ngulpui’ ci in min ka phua hi,” ci hi.
Thuni ngawl Mihingte
8 Tua mihingte bang taw kibang ziam cisia laibu khat sungah at in ci in Pathian in kei hong sawl hi, tua hile mihingte bangza in tatsia ziam ci in tepteena kho khat om tu hi.
9 Amate in Pathian langpan tawntung, leilot tawntungin, Topa hilnate nial tawntung uh hi.
10 Amate in kamsaangte a thim khipkhep natu in sawl uh hi. Amate in, “A maan sia bang ziam ci in ko hong son heak vun. Koma zaak nopte bek hong son tavun. A maan bua zong koma ii om ngei bangin hong omsak tavun.
11 Ka lampi uh hong awn tavun a, hong khak heak vun. Na Israel te ii a thiangtho Pathian ii thu za nuam ngawl khu hi,” ci uh hi.
12 Ahizong Israel te ii a thiangtho Pathian in, “Kei kong sonte thusim ngawlin zawthawk tatna le theamna na suang uh hi.
13 No, a maw na hi uh hi. No sia a kektham suk pang saang khat taw kibang nu hi; thakhat thu in puk tu nu hi.
14 Zan niknek ahikom meikhuk sung pan meikam lua tham natu ahizong, tuikuang sung pan tui sua tham natu ahizong a bek lian zongh a om ngawl leibeal khat bangin nang hong kitamhthamsak tu hi” ci hi.
15 Vaanglianpipa Topa Israel te ii a thiangtho Pathian in mihingte tungah, “Hong heak kik tavun a, keima hong muang hiithiat tavun. Tua hile na tha uh hat tu a, ngammuang tu nu hi,” ci hi. Ahihang nong nial uh hi!
16 Tuasia luangin, siphu tai ngang mama tung to in na ngalte khut sung pan suatak tu na sawm uh hi. Maan nu hi — suatak natu ahile noma sep tu ma hi! Na siphute ngang khop hi ci in ngaisun nu hi, ahihang no hong delte ngang zaw lai tu hi!
17 Ngalte ngalkap khat na mu uh ciang no, a tulkhat in na taikeak tu uh a, tuaciang ngalte nga in note theampo hong taikeaksak zo tu hi. Mualdawn ah a kiphut laandial mung om liiliai khat simngawl buang, na ngalkap honte sung panin bangma kinusia ngawl tu hi.
18 Tuabang hi napi note hong hesuak tu in Topa in hong ngak veve hi. Ama sia note tungah hesuakna lak tu in a kinging sa in om hi, banghang ziam cile ama in a tawntungin a maan seam hi. Topa tungah muanna a nei te in mi lungdamte ahi hi.
Pathian in A Mihingte Thupha pia tu.
19 No Jerusalem ah a teang mihingte kap nawn ngawl tu nu hi. Topa sia hesuak thei a, ama tungah huna ngenin na kaa uh ciang ama in hong zo tu hi.
20 Topa in haksatna hunte no hong phulsak zo tu a, ahizong ama mama tua munah note hong hil tu in om tu hi, tua ahiciang note in ama na zon uh kul nawn ngawl tu hi.
21 Lam ziat, ahibuale lam vei ah na pial tha uh le na nungsang pan ama in, “A lampi in hisia hi. Zui in,” hong cina aw na za tu hi.
22 Ngunn taw kizut in khamh taw a kituam, na milimte na la tu uh a, tuaciang ninteak bangin vawkkeak in, “Ka muna ah om heak vun!” ci in na ausan tu uh hi.
23 Anciite na poai po uh ciang po a, khang a an tam na laak natu in Topa in nguazusak tu hi, tuaciang na ngante in a tat natu mun zai nei tu uh hi.
24 Na lo hong thawsak khuitalte le laate in a phabel le a limbel lopate ne tu uh hi.
25 Na ngalte ii kulhte a kilaak ni ciang le a mite a kithalup ni ciang, muallian le mualnote theampo tung panin luitui luang tu hi.
26 Tha in nitaan za ma in taang tu a, ni in a taan ngeina sangin a zaa salivei in taang zaw tu hi, ni sali sung nitaanna bup sia ni khat a kingawm taw kibang tu hi. Topa in a mihingte tungah a thuaksak liammate tuamsakin a damsak ciangin hi thu theampo hong piang tu hi.
Pathian in Assyria te Daan pia tu
27 Topa ii vaangletna le minthanna sia a khuala panin kimu thei hi. Mei le meikhu in Topa ii thin uukna lak hi. Ama pau a, a kammalte mei taw kibangin kuang hi.
28 Tuipawm in na theampo a taikeak bangin a mai ah vui vasak hi. Tua in minamte phialmang in susia ngawpin, amate ii a sia a ngealnate bosak hi.
29 Ahizong Pathian ii mihing, note in, poai thiangtho khaam ni zan a, na vawt uh bangin lungdam in la na sa tu uh hi. Israel te a huu Topa sia Biakinnpi ah a pai uh lai in tamngai aw zui in a paite bangin na lung uh dam tu hi.
30 Topa in ama ii vaangletna aw mihing theampo in zasak tu a, ama ii thin uuk tutna thuak tu hi. Meikuangte, meei puakthamte, ngialtang kiate, a biing a bealin sun bangin nguazuknate om tu hi.
31 Assyria mite in Topa ii aw a zaak uh ciang le a daan piakna a nasia mama sia a thuak uh ciang lau tu uh hi.
32 Topa ii amate ngim a piak kikik ciang, ama mite in khuang le tengtongh aw zui in lungdam tu uh hi. Pathian ama tatak ma in Assyria mite sim tu hi.
33 Nidang pek panin Assyria kumpilianpa kihal natu mei phualpi mun khat kivawt zo hi. Tua mun sia thukin zai a, thing a vum in kiseng hi. Topa ii husan ahi a kipee tan meikuang in tua mei taw tu hi.