31
Pathian in Jerusalem Sungsia tu
1 Egypt ngam ah huna ngenin a paite a lal ahi hi! Amate in Egypt te ii ngalkap thahatna — siphute, siphu ngalleangte le ngalkapte suang uh hi. Ahihang amate in Israel mite ii a thiangtho Pathian ahi, Topa suang ngawlin huna zongh ngen ngawl uh hi.
2 Topa in a sep sia he hi! Ama in siatna tungsak hi. Ama in mi tatsiate le a panpuite daan ka pia tu ci in a tawn bangin seam hi.
3 Egypt te sia pathiante hi ngawlin — leitung mihing bekma hi. Amate ii siphute in a pianzia tumdang hi ngawl hi. Topa in a dian tak ciang, a thahat ngam topsuk tu a, tuasia ii a hu a thazawm ngam sia zong puk tu hi. Tua te ngeal kilalcipsak khawm tu hi.
4 Topa in kei tungah, “Tuucingte bang zata in a au hial zongin, amate in tawpi khat sia ama ii a thalupsa nganluang kung pan bengkeak zo ngawl hi; tuasia bangma in, keima, Vaanglianbelpa Topa ii Zion Mual ka kepna pan hong khaktan thei kuama om ngawl hi.
5 Vacim khat in a bu tung pan a note a cin bangma in keima, Vaanglianbelpa Topa in, Jerusalem sungsia in ka hung tu hi,” hong ci hi.
6 Pathian in, “Israel mihingte awng, kei tungah nong maw zo uh a, nong langpan zo uh hi. Ahitazong tu in kei kung hong zuan kik tavun!
7 Ngunn le khamh taw na vawt sa uh ahi mawna a piangsak milim teng note theampo ii na vawkkeak tu uh hun khat hong theng tu hi.
8 Assyria sia ngal sungah kilalcipsak tu hi, ahihang mihingte thahatna taw hi ngawl hi. Assyria te ngal kisimna pan tai tu a, a tangvalte sia sila in kikai tu hi.
9 A kumpilianpa lau in tai tu a, a ngalkap maangte lauthawng mama ahikom ngalsimna in a zak a laandial nusia tu uh hi,” ci hi. Jerusalem khua ah kibia a, sangaw biakpiakna atu a kihal mei ii Topa — tua Topa pau zo hi.